Samuel u sha Uhar 19:1-43
19 Tsô i va ôr a Yoabi ér: “Tor ngu vaan shi zungwen ku u Abesalom.”+
2 Nahan ityav mbi i hemba* sha iyange ne la gema hingir ior cii ijungwen, sha ci u ve ungwa ér tor ngu zungwen ku u wan na.
3 Ior hide va nyôr ken gar ving+ sha iyange la, er ior mba ve yevese ken utya, kunya u ker ve a iyol ve nahan.
4 Tor cir kwagh sha ishi, lu vaan genger genger kaan ér: “Aye! Wan wam Abesalom! Wan wam, aye! Abesalom wan wam!”+
5 Tsô Yoabi nyôr ken iyou, za kaa a tor ér: “Nyian u hee mbatomov ou cii, ve mba ve yem uma wou, man uma u ônov ou mba nomso,+ man ônov ou mba kasev+ man kasev ou kua kasev ou mba sha uikya+ sha iyange ne la.
6 Mba ve ker u ihyom la, ve doo u ishima, u gema u kôr mba u doo ve ishima la ihyom, gadia u tese nyian wang wer, mbahemen mbautyaav ou man mbatomov ou gba u kwagh cuku ga. Sha ci u m na jighjigh mer, luun er ka Abesalom tseegh una lu uma nyian, se mbagen cii sea kpe kpa, ma i ze u iyol cuku ga.
7 Nahan mough due za ôr kwagh u una taver mbatomov ou ishima yô, sha ci u m bum ken iti i Yehova, aluer u due u za ga yô, nomsoor môm nana lu her vea we tugh mbun ga. Nahan kwagh ne una hemba vihin a hanma iferkwagh i i er u cii, hii shighe u u lu iyev la zan zan hegen.”
8 Tor maa mough za tema hen hundagar, nahan i ôr a ior cii ér: “Tor tema hen hundagar hegen.” Maa ior cii va sha ishigh ki tor.
Kpa Iserael yô yevese, hanma or yem hen ya u nan.+
9 Ior cii mba ken uipyaven mba Iserael la cii gba anyiman ayol a ve, ve lu kaan ér: “Tor yima se sha ikyev i mbahyomov asev+ shi a war se sha ikyev i Mbafiliti; kpa hegen yô, a yevese a undu tar ne sha ci u Abesalom.+
10 Shi Abesalom, un u yange se shighe un mkurem hingir tor wase la+ kpe ken utya.+ Nahan er nan hegen ne eren kwagh u hiden a tor ga?”
11 Tor Davidi maa tindi a loho ne hen pristi Sadoki+ man pristi Abiatar+ kaa ér: “Ôr a mbatamen mba Yuda+ wer, ‘Er nan kwaghôron u Iserael cii a nyer a tor hen ya na ve, ne ne lu timbir u hiden a tor hen ya naa?
12 Ne mba anmgbianev av; ne mba kuhe wam man inyam yam. Man er nan ne lu timbir u hiden a toro?’
13 Shi ôr nen Amasa ner,+ ‘U ngu kuhe wam man inyam yam gaa? Nahan aluer u kar u tile sha ityough ki Yoabi, u hingir kurutya u ikyumutya yam, hii hegen zan zan yem ken hemen ga yô, Aôndo a tsaham tsung.’”+
14 A ngohol* asema a ior i Yuda cii, er ka or môm nahan, maa ve tindi a loho hen tor, ve kaa ér: “Hide, we man mbatomov ou cii.”
15 Tsô tor mough gba hiden, a va nyôr hen Yordan, maa ior i Yuda va hen Gilgal+ u va keghen tor gbenda shi veren un gbenda a per Yordan.
16 Shimei+ wan u Gera, Orbenyamin u ken Bahurim la sen fese vea ior i Yuda u va keghen Tor Davidi gbenda,
17 shi ior i Benyamin 1,000 lu vea Shimei. Shiba+ u eren tom hen ya u Saulu la vea ônov nav mba nomso 15 man mbatomov nav 20 kpa, sen fese shin Yordan, cii man tor nyôr ye.
18 A* per ihyongo la u za peren a mba hen ya u tor yande ne, shi eren hanma kwagh u tor a soo cii. Kpa Shimei, wan u Gera, gure inya sha ishigh ki tor shighe u lu nôngon u peren Yordan la.
19 A kaa a tor ér: “Terem a de nem ibo ga, shi de umbur kwaghbo u wanye wou yange er+ sha iyange i terem tor due ken Yerusalem kera la ga. Tor a de we kwagh ne ken ishima ga,
20 sha ci u wanye wou fa wang er m er kwaghbo yô; ka nahan ve ken ya u Yosev cii, i lu mo m hii duen senen u va keghen terem tor gbenda nyian ye.”
21 Fese je Abishai+ wan u Seruya+ pine ér: “Shimei yange tuhwa un u Yehova a shigh un mkurem la, nahan gba u a wua un sha ci u kwagh ne gaa?”+
22 Kpa Davidi gema kaa ér: “Ne ônov mba Seruya, ka nyi yen sha kwagh ne+ ve ne lu nôngon kwagh a mo nyiana? Gba u a wua or ken Iserael nyianaa? M fa er nyian m tem tor sha Iserael gaa?”
23 Tor maa kaa a Shimei ér: “U kpe ga.” Shi tor bum a na kpaa.+
24 Mefibosheti,+ wan u wan u Saulu la kpa sen va u va keghen tor gbenda. Mefibosheti yange ôô angahar a na shin hondo akuzwa na shin kire akondo a na kpaa ga, hii sha iyange i tor yem la je zan zan iyange i kar hiden bem bem la.
25 Mefibosheti ve* ken Yerusalem u va sughun tor yô, tor pine un ér: “Mefibosheti, er nan ve yange u yem vea mo ga?”
26 A gema a kaa ér: “Terem tor, ortom wam+ bumem. Sha ci u wanye wou yange kaa ér, ‘De m kange shidi* sha jaki yam sha er me henda i me yem vea tor yô,’ gadia wanye wou gba iwan.+
27 Kpa a vihi wanye wou iti hen terem tor.+ Nahan kpa, terem tor ngu er ortyom u Aôndo u mimi nahan. Yô, er kwagh u u nenge i doo u la cii.
28 Terem tor ma a woo mba hen ya u terem cii, kpa u gema u na wanye wou ngu môm ken mba ve ye kwaghyan sha tebul wou yô.+ Nahan ka ian i nyi shi m lu a mi i sônon tor kwagha?”
29 Kpa tor kaa a na ér: “Er nan u ôron kwagh nahana? Ka kwagh u m soo u eren je ne, za kar inya la vea Shiba.”+
30 Mefibosheti gema kaa a tor ér: “Er hegen terem tor a hidi hen ya na bem bem yô, a gba yemen a i cii tsô.”
31 Tsô Barshilai,+ Orgileadi la mough hen Rogelim sen va hen Yordan, u va veren tor gbenda a per Yordan.
32 Barshilai bee iyol kumbur kumbur, lu anyom 80. Yange naan tor kwaghyan shighe u lu ken Mahanaim la,+ sha ci u un lu a inyaregh kpishi.
33 Tsô tor kaa a Barshilai ér: “Per vea mo, nahan me za naan we kwaghyan ken Yerusalem.”+
34 Kpa Barshilai kaa a tor ér: “Ayange* a uma wam shi a me ve, me kôndo me yem vea tor ken Yerusalem?
35 M ngu anyom 80 nyian.+ Me fatyô u fan mkposo u kwagh u dedoo a kwagh u bo kpa? Wanye wou una ya kwagh shi una ma kwagh nahan a nyoho un kpa? Me fatyô u keghen ato ungwan amo a nomso man kasev mba wan atsam kpa?+ Nahan wanye wou a za seer terem tor ikyav ér nyi?
36 Aluer wanye wou fatyô ver tor gbenda nyôr hen Yordan tseegh kpa kuma. Gba u tor una kimbim injar ne ér nyi?
37 Wea lumun yô, de wanye wou a hide a yem, nahan me za kpe ken gar wam, ikyua a uwar u terem man ngôm.+ Kpa wanye wou Kimham ngun.+ De a per vea terem tor, nahan u er a na er u nenge i doo u la cii.”
38 Tsô tor kaa ér: “Kimham una per vea mo, nahan me er a na er i doo u la cii; kwagh u u kaa wer mo m er cii, me er sha ci wou.”
39 Maa ior cii gba peren Yordan, tor peren yô, a suse Barshilai zwa,+ a ver un doo doo; Barshilai maa hide yem ken ya.
40 Shighe u tor per yem hen Gilgal la,+ Kimham per vea na. Ior i Yuda cii, man vegher u ior i Iserael môm za per a tor.+
41 Tsô ior i Iserael cii za hen tor za kaa a na ér: “Er nan ve anmgbianev asev, ior i Yuda ve ii u, ve yem a mi, shi ve ve a tor man ya na Yordan yande ne, kua ior mba Davidi ciilii?”+
42 Ior i Yuda cii gema kaa a ior i Iserael ér: “Sha ci u tor ka anmgbian wase.+ Ishima vihi ne sha kwagh ne ér nyi? Se ya kwagh u a lu u tor yôô, shin i na se ma iyua?”
43 Nahan kpa, ior i Iserael gema kaa a ior i Yuda ér: “Se mba uipyaven pue. Sha nahan yô, se hemba mban a ian sha Davidi a ven. Er nan ne er kwagh a vese dang nahana? Gba u ka se ma se hemen u za hiden a tor wase gaa?” Kpa kwaghôron u nomso mba Yuda hemba taver a u nomso mba Iserael la.
