Samuel u sha Uhar 14:1-33
14 Hen shighe ne Yoabi wan u Seruya,+ kav ér sar tor tsung u nengen a Abesalom.+
2 Tsô Yoabi tindi i za ken Tekoa+ i za va a kwase u wan ayom ugen, maa a kaa a na ér: “Wea lumun yô, er inja er u ngu vaan ku nahan, hua akondo a zungwen ku, shi de shighen mkurem ga.+ Er inja er u ngu kwase u nan zungu ku u or u nan shighe gôgônan nahan.
3 Nahan nyôr za ôr tor kwagh ne.” Maa Yoabi ôr un kwagh u una za ôr yô.*
4 Tsô kwase u ken Tekoa la nyôr u za nengen a tor, a ngurum a wa ityough inya, maa a yav inya a kaa ér: “Aye tor, wasem!”
5 Tor gema pine un ér: “Ka nyi i ze iyolo?” Kwase la maa kaa ér: “Mo m ngu kwasecôghol; gadia nomom kpe kera.
6 Mo, wanyekwase wou, yange m lu a ônov mba nomso uhar. Iyange igen yô, ve uhar ve lu nôngon num ayol a ve ken toho, or u kôron ve num nan lu ga, nahan u môm hemba ugen la wua un.
7 Hegen yô, mba hen tsombor la cii mough num a mo wanyekwase wou, mba kaan ér, ‘Va a u a woo anmgbian na la, sha er un kpa se wua un sha ci u a woo anmgbian na yô,+ aluer ka u or u yan dyako nana kera lu ga je kpaa!’ Ve soo ér vea pir ikyausu i m mase shin a mi la,* nahan vea undu or môm her u a yila nan sha iti i nomom shin nana lu uma sha tar kpaa ga yô.”
8 Tor maa kaa a kwase la ér: “Hide yem hen ya wou, nahan me ôr a er kwagh sha kwagh wou.”
9 Kwase u ken Tekoa la gema kaa a tor ér: “Aye terem tor, de ibo i lu i yam man i ya u terem, kpa tor man ikyônough nagh ki torough yô, ve lu a ishô.”
10 Tor maa kaa ér: “Aluer or shi ôr kwagh a we yô, va a nan hen a mo, nahan mayange nana kera za u iyol ga.”
11 Kpa kwase la kaa ér: “Wea lumun yô tor, umbur Yehova Aôndo wou, sha er or u oron iyev i awambe la+ a de va timin ior zan zan wuan wan wam ga yô.” Davidi gema kaa ér: “Mimi je, er Yehova a lu u uma ne,+ gwarce môm u wan wou una gba hen inya ga.”
12 Kwase la maa kaa ér: “Terem tor wea lumun yô, shi de wanyekwase wou a ôr u kwagh.” Nahan a kaa ér: “Ôr ase!”
13 Kwase la maa kaa ér: “Nahan er nan u we ishima u eren imbakwagh ne a ior mba Aôndo?+ Tor ka una ôr kwagh nahan yô, a ya ibo sha ci u tor ngu a hide a wan na u i zende un kera la ga.+
14 Se kpe kpee a bunde ga! Se hingir er mngerem ma i hee hen inya, ma a kera fatyô u zuan a mi ga la nahan. Kpa Aôndo una tôô uma u or kera ga, shi ka a ker atôakyaa a a ne ve, i gbe u una hide a or u i zende nan hen a na kera la.
15 M nyôr heen mer me ôr terem tor kwagh ne, sha ci u ior tam mciem iyol. Nahan wanyekwase wou kaa ér, ‘De m va lam a tor. Alaghga tor una er kwagh u kpankwase na a kaa la.
16 Shi alaghga tor una kegh ato, una yima kpan na sha ikyev i or u a lu keren u timin mo man wan wam u nomso u môm môm, sha er a de ye dyako u Aôndo a ne se la ga yô.’+
17 Maa wanyekwase wou kaa ér, ‘Kwaghôron u terem tor a na i pever mo iyol,’ sha ci u terem tor ngu er ortyom u Aôndo u mimi nahan, gadia ka a pav kwagh u dedoo a ver kposo a kwagh u bo. Yehova Aôndo wou a lu a we.”
18 Tsô tor kaa a kwase la ér: “De yeren mo kwagh môm sha kwagh u m lu pinen we ne ga.” Kwase la gema kaa ér: “Terem tor una lumun yô, a ôr kwagh.”
19 Nahan tor pine ér: “Ka Yoabi a kaa ér we u va ôr akaa ne cii ye ga?”+ Kwase la kaa ér: “Mimi je, er terem tor a lu uma ne, ka vough er terem tor a kaa nahan,* sha ci u ka ortom wou Yoabi a kaa a mo ér m er nahan, shi a tam mkaanem man cii a we ken zwa u wanyekwase wou ye.
20 Ortom wou Yoabi er kwagh ne sha er una sôr akaa yô. Kpa terem ngu a kwaghfan er ortyom u Aôndo u mimi nahan, shi a fa hanma kwagh u a lu zan hemen hen tar ne cii.”
21 Tor maa kaa a Yoabi ér: “Ka sha mi, me er kwagh shon.+ Za, za hide a Abesalom gumor la.”+
22 Tsô Yoabi ngurum wa ityough inya, maa yav inya wuese tor, Yoabi kaa ér: “Terem tor, nyian ortom wou fa er i doo u a mo yô, sha ci u tor er kwagh u ortom na a kaa yô.”
23 Yoabi maa mough yem ken Geshur,+ za kua a Abesalom hide a na ken Yerusalem.
24 Nahan kpa, tor kaa ér: “A yem hen ya na, kpa mo yô a de nengen a ishigh yagh ga.” Nahan Abesalom hide hen ya na, a nenge a ishigh ki tor ga.
25 Hen shighe ne, ken Iserael cii, or môm lu u i wuese nan ér nan doo or hemba Abesalom ga; lu a ihyogholough iyol ga, hii shin akevangahar a na zan zan nyôr sha ityo.
26 Yange una hondo ityough yô, ice i sha ityough nagh i yuhwa i kuma ushekel 200,* sha myohom ma iwen i karen kwagh i tor.* A hondo ice ne ken mbee u hanma inyom—sha ci u i yuhwa un kpishi.
27 Yange i mar Abesalom ônov mba nomso utar+ man wan u kwase môm; i yilan u kwase la ér Tamar. Yange doo kwase kpen kpen.
28 Abesalom lu ken Yerusalem her zan zan anyom ahar jimin, kpa a nenge a ishigh ki tor ga.+
29 Tsô Abesalom tindi ér i za ôr Yoabi a va hen a na, sha er una tindi un hen tor yô, kpa Yoabi lumun u van ga. Shi a tindi sha kwa har ér i za ôr un a va, kpa Yoabi venda u van.
30 Ken masejime yô, Abesalom kaa a mbatomov nav ér: “Sule u Yoabi dondo a u wam; a kaha barli her. Za, za nande nen u.” Nahan mbatomov mba Abesalom za nande sule shon.
31 Tsô Yoabi mough za hen ya u Abesalom za pine un ér: “Er nan ve mbatomov ou ve za nandem sule?”
32 Abesalom gema kaa a Yoabi ér: “Nenge! M tindi loho ne hen a we mer, ‘Va m tindi u hen tor, za pine un wer: “Er nan jim m mough ken Geshur m hidi?+ Guda yange ma m lu ker her. De m za nenge a ishigh ki tor, nahan aluer m ngu a ibo yô, a wuam.”’”
33 Tsô Yoabi za hen tor za ôr un. Maa tor yila Abesalom. Abesalom ve hen tor yô, a ngurum a wa ityough inya sha ishigh nagh, maa a yav inya sha ishigh ki tor. Nahan tor suse Abesalom zwa.+
Ngeren mba shin kpe
^ Shin “tam mkaanem wa un ken zwa.”
^ Ka ishimaverenkeghen i masetyô i ônov je la.
^ Shin “or môm nana fatyô u geman ken imese shin ken iyan sha kwagh u terem tor a kaa ne ga.”
^ I kuma er ukilogeram 2.3 nahan. Nenge Ngeren u Seer u B14 la.
^ Alaghga lu myohom ma karen kwagh a mi ma i ver hen ya u tor, shin lu shekel u “tor” u lu kposo a ushekel mbagenev yô.
