Samuel u sha Uhar 10:1-19
-
Davidi hemba Amon man Shiria ityav (1-19)
10 Shighe kar yô, tor u Mbaamon+ kpe, maa wan na Hanun kar tema tor sha ityough nagh.+
2 Tsô Davidi kaa ér: “Me tese Hanun wan u Nahashi erdoo, vough er ter na kpa tesem erdoo nahan.” Nahan Davidi tindi mbatomov nav ér ve za sur un ishima sha ku u ter na la. Kpa mbatomov mba Davidi mba za nyer ken tar u Mbaamon yô,
3 mbahemenev mba Mbaamon kaa a Hanun tor ve ér: “U hen wer Davidi tindi ior ér ve va sur u ishima nahan, ka u nan teru icivirii? U fa er Davidi a tindi mbatomov nav hen a we ér ve va nenge gar ne, ve gba un mker, shi ve ngohol un gaa?”
4 Tsô Hanun kôr mbatomov mba Davidi hondo ve indyer vegher môm,+ shi tôndo akondo a ve hua la gba sha asenatôô, maa a na ve ian ér ve yem.
5 Mba va ôron Davidi kwagh ne yô, fese je a tindi ior ve za kohol ve, gadia i hee ior mbara je gande; nahan tor kaa a ve ér: “Lu nen ken Yeriko+ zan zan indyer yen ia hiden a menden yô, ne hide.”
6 Shighe kar yô, Mbaamon kav ér kwagh ve vihi Davidi ishima tsung, nahan Mbaamon za kimbi Mbashiria mba ken Bete-rehobi,+ man Mbashiria mba ken Soba+ inyaregh ér ve va wase ve ityav, ve lu ushoja mba zenden angahar 20,000; man ior mba tor u Maaka+ 1,000; kua ior mba ken Ishitobi* 12,000.+
7 Davidi ongo kwagh ne yô, a tindi Yoabi vea ikyumutya la cii, kua mbautyaav nav mba hemban lun a agee la cii.+
8 Nahan Mbaamon due za kase u nôngon ityav hen hunda u nyôron ken gar la. Mbashiria mba ken Soba man mba ken Rehobi, kua Ishitobi* man Maaka, di gema haa sha ajiir a ve kposo kposo ken toho.
9 Yoabi nengen ér mbautyaav mba van ken hemen man ken ijime u va tan ityav sha a na yô, a tsua akumautya a hemban fan ityav ken Iserael cii, a za a ve, ve za kase u nôngon ityav a Mbashiria.+
10 A gema ior mbagenev mbara cii a wa sha ikyev i anmgbian na Abishai,+ sha er a za vea ve, ve za kase ityav sha Mbaamon yô.+
11 Maa Yoabi kaa ér: “Aluer Mbashiria mba va nôngon u hemban mo yô, we va wasem; kpa aluer Mbaamon mba va nôngon u hemban we yô, mo me za wase u.
12 Gba u se tile dông shi se taver ishima+ sha ci u ior asev man sha ci u agar a Aôndo wase, nahan Yehova una er kwagh u a doo sha ashe a na yô.”+
13 Tsô Yoabi man ior nav gba kporom zan u za nôngon ityav a Mbashiria, kpa ve yevese sha ishigh nagh kera.+
14 Mbaamon mba nengen ér Mbashiria yevese yô, ve kpa ve yevese Abishai, ve hide ve nyôr ken gar. Tsô Yoabi de Mbaamon, cin hide ken Yerusalem.
15 Mbashiria mba nengen ér Iserael hemba ve ityav yô, ve hide ve kohol imôngo.+
16 Maa Hadadeser+ tindi ér i za ôr Mbashiria mba ve lu hen haregh u Ifi la,*+ nahan Shobaki, kurutya u ikyumutya i Hadadeser hemen ve gbenda ve va hen Helam.
17 Mba ôron Davidi kwagh ne yô, fese je a kohol Iserael cii, a per Yordan a za hen Helam. Tsô Mbashiria mough kase ityav a Davidi; ve nôngo ityav a na.+
18 Kpa Mbashiria yevese Iserael; maa Davidi wua mbahendan-akekeautya mba Mbashiria 700, kua mbahendananyinya vev 40,000, shi a wua Shobaki, kurutya u ikyumutya ve la her.+
19 Utor mba ve lu mbatomov mba Hadadeser la cii, mba nengen ér Iserael hemba ve ityav yô, ve za ker bem a Iserael, maa ve hingir sha ikyev ve;+ nahan cier Mbashiria iyol, ve kera wase Mbaamon ityav ga.
