Samuel u sha Uhar 13:1-39
13 Hen shighe ne, Abesalom wan u Davidi u nomso la, lu a anmgbian u kwase u doo ashe yô; i yilan un ér Tamar.+ Tamar doo Amnon+ wan u Davidi u nomso la ishima.
2 Kwagh u Tamar, anmgbian u Amnon u kwase la ya un ishima zan zan je yô hingir angev, gadia lu iniunkwase, nahan taver Amnon u kuren isharen i lu a mi sha a na la.
3 Hen shighe ne, Amnon lu a huror, i yilan un ér Yehonadabi,+ un lu wan u Shimea,+ anmgbian u Davidi; Yehonadabi lu or u wan ayom kpishi.
4 Tsô a kaa a na ér: “Er nan we wan u tor nahan, ka u ure hanma pepe pepe yum nahana? Ôrom ga.” Amnon gema kaa a na ér: “Tamar anmgbian u anngôm Abesalom u kwase+ la doom ishima.”
5 Yehonadabi gema kaa a na ér: “Za yav sha gambe wou, er inja er u gba angev nahan. Teru una vaan u nengen a we yô, kaa a na wer, ‘Wea lumun yô, de anmgbian wam u kwase Tamar, a va a va nam kwaghyan. Aluer a va er kwaghyan u oruange* sha ave a na, sha ashe a am yô, me ya.’”
6 Tsô Amnon yav, gba eren er a gba angev nahan, maa tor va nyôr u nengen a na. Nahan Amnon kaa a tor ér: “Wea lumun yô, de anmgbian wam u kwase Tamar, a va a va kaam beredi uhar mba lun er ishima nahan sha ave a na, sha ashe a am, m ya.”
7 Nahan Davidi tindi i za kaa Tamar hen ya ér: “Wea lumun yô, za hen ya u anmgbian wou Amnon, za er un kwaghyan.”*
8 Tsô Tamar za hen ya u anmgbian na u nomso Amnon, ape yav inya la. Nahan a tôô ijenmwe, a nungwa a er uberedi sha ashe a na, a kaa.
9 Tsô a tôô a wa sha pelengi a za na un. Kpa Amnon venda ér una ya ga, a gema a kaa ér: “Hanma or nana due!” Maa hanma or due undu un.
10 Amnon maa kaa a Tamar ér: “Va a kwaghyan* la ken iyou i tsan ne, sha er me ya kwaghyan u u er la yô.” Tsô Tamar tôô uberedi mba er ve lu er ishima nahan la, za a mi za na anmgbian na Amnon, ken iyou i tsan la.
11 Tamar ze a mi hen a na ér a ya yô, a kôr un a kaa ér: “Va yav a mo, ingyôr yam.”
12 Kpa a kaa a na ér: “Ei, anngôm! De heen mo ga, sha ci u mba eren imbakwagh ne ken Iserael ga.+ De eren kwagh u ihyeenegh ne ga.+
13 Ior vea tsa a hungur a ihyeen yam ne kpa? Shi we kpa a nenge u ér u ngu môm ken nomso mba ken Iserael mba ve hee yô. Wea lumun yô, za lam a tor, gadia una venda u nan we mo ga.”
14 Kpa a venda u keghen ato a na. Er a hemba un agee yô, a kighir un a yav a mi, a hee un.
15 Nahan Amnon gba kôron un ihyom kpoghuloo je yô, ihyom i kôr un la gema hemba dooshima u lu a mi sha a na la. Amnon kaa a na ér: “Mough; yem kera!”
16 Tsô a kaa a na ér: “Ei, anngôm, aluer u zendam hegen yô, a hemba vihin a kwagh u u er a mo ne!” Kpa a venda u keghen ato a na.
17 Tsô a yila gumor ugen u lu ortom na yô, a kaa a na ér: “Kar a wankwase ne sha ishigh yagh kera, shi wuhe hunda.”
18 (Hen shighe ne, Tamar hua ikyondo i elemeen i doon ashe,* sha ci u lu akondo a anuunaukase a tor huan je la.) Nahan ortom u Amnon la due a na ken won, maa wuhe hunda.
19 Tsô Tamar haa mtwem sha ityo,+ shi ande ikyondo i elemeen i doon ashe i hua la; maa a kaa ave sha ityo, a kar a gba yemen. Er lu yemen la, lu vaan genger genger.
20 Nahan anngô na Abesalom+ pine un ér: “Ka anmgbian wou Amnon ashen u lu vea na gaa? Anngôm, de ôron or kwagh sha kwagh ne ga; Amnon ka anmgbian wou.+ Ishima i de ze u iyol sha kwagh ne gbem ga.” Maa Tamar lu kwagh na hen ya u anmgbian na Abesalom, kera lu eren kwagh vea ior ga.
21 Tor Davidi ongo akaa ne cii yô, ishima vihi un kpishi.+ Kpa soo u eren kwagh u una vihi wan na Amnon ishima ga, sha ci u a doo un ishima, gadia lu wan na u iunda.
22 Nahan Abesalom ôr kwagh môm a Amnon ga, u bo shin u dedoo kpaa ga; gadia Abesalom kôr Amnon ihyom,+ sha ci u a hee anngô na u kwase Tamar.+
23 Anyom ahar nga kar yô, mba tôndon iyôngo i Abesalom aive lu hen Baal-hasor, ikyua a Eferaim,+ maa Abesalom lôhô ônov mba tor cii ér ve va.+
24 Tsô Abesalom za hen tor za kaa ér: “Wanye wou ngu tôndon iyôngo na aive. Tor man mbatomov nav vea lumun yô, ve za vea mo.”
25 Kpa tor kaa a Abesalom ér: “Ei, wan wam. Aluer se cii se za yô, se za hingir we ikyav.” Er Abesalom zamber a na gbem nahan kpa, a lumun u zan ga, kpa a gema a ver un doo doo.
26 Abesalom gema kaa ér: “Aluer u ngu zan ga yô, de anmgbian wam Amnon a za vea vese, wea lumun yô.”+ Tor maa pine un ér: “A za vea we ér nyi?”
27 Kpa Abesalom zer a na her gbem, nahan a tindi Amnon man ônov mba tor mba nomso cii za vea na.
28 Maa Abesalom kaa a mbatomov nav ér: “Nengen nen, Amnon una va maan wain a saan un iyol yô, me kaa a ven mer, ‘Wua nen Amnon!’ Maa wua un nen kpee je. De cie nen ga. Ka mo m ne ne zwa gaa? Tile nen dông shi taver nen ishima.”
29 Tsô mbatomov mba Abesalom er a Amnon vough er Abesalom kaa nahan; maa ônov mba tor mba nomso mbagenev mbara cii mough, hanmô ve nan henda alfadari* u nan, nan yevese nan yem.
30 Er ve lu yemen sha gbenda la, i za kaa a Davidi ér: “Abesalom wua ônov mba tor mba nomso cii, or ve môm nan war ga.”
31 Tsô tor mough ande akondo a na, yav inya, shi mbatomov nav cii tile her a na, a akondo a anden iyol.
32 Nahan kpa, Yehonadabi+ wan u Shimea,+ anngô u Davidi la kaa ér: “Terem a de henen ér i wua ônov mba nomso mba tor, agumaior la cii ga, sha ci u ka Amnon tseegh a kpe ye.+ Ka Abesalom a ne zwa ér i er kwagh ne ye. Yange wa ishima u eren kwagh ne+ sha iyange i Amnon hee anmgbian na u kwase+ Tamar+ la je.
33 Nahan terem tor a de ne ishima* sha kwagh u i kaa ér, ‘Ônov mba tor mba nomso cii kpe la ga’; ka Amnon tseegh a kpe ye.”
34 Hen shighe ne, Abesalom yevese yem kwagh na.+ Shighe kar yô, orkuran gar la kende ashe sha, maa a nenge ior kpishi lu van sha gbenda ken ijime na, ikyua a uwo.
35 Tsô Yehonadabi+ kaa a tor ér: “Nenge! Ônov mba tor hide. Ka vough er wanye wou a kaa nahan.”
36 Yehonadabi ôron kwagh been nahan maa, ônov mba tor va nyôr, ve lu vaan genger genger, shi tor man mbatomov nav cii vaa je gande.
37 Kpa Abesalom yevese yem hen Talmai+ wan u Amihudi, tor u Geshur. Davidi vaa ku u wan na ayange kpishi.
38 Abesalom yevese yemen hen Geshur+ yô, a za tsa her anyom atar.
39 Ken masejime yô, sar Tor Davidi tsung u zan za nengen a Abesalom, sha ci u ishima pever un sha ku u Amnon.
