Samuel u sha Uhar 24:1-25
24 Tsô ishima vihi Yehova a Iserael pev+ shighe u orgen tuur Davidi ken ijime, kaa ér:* “Za, za ôr iyenge+ i Iserael man Yuda”+ la.
2 Nahan tor kaa a Yoabi,+ kurutya u lu vea na la ér: “Wea lumun yô, zende ken uipyaven mba Iserael cii, hii hen Dan zan zan nyôr Bersheba,+ za nger ati a ior, sha er me fa iyenge i ior yô.”
3 Kpa Yoabi gema kaa a tor ér: “Yehova Aôndo wou a seer iyengeior kwa 100, nahan terem tor a nenge a mi sha ashe a na. Kpa er nan ve terem tor a soo u eren imbakwagh ne nahana?”
4 Kpa kwaghôron u tor hemba taver a kwaghôron u Yoabi man ukurmbautyaav mba ikyumutya la. Tsô Yoabi man ukurmbautyaav mba ikyumutya la due sha ishigh ki tor kera, yem u za ngeren ati a ior i Iserael.+
5 Ve per Yordan ve za haa afo hen Aroer,+ ken iyan u* gar u lu hen atô u pev* la, maa ve yem vegher u Mbagadi la zan zan ve za nyôr Yaser.+
6 Maa ve yem hen Gileadi,+ man ken tar u Tatim-hodeshi zan zan ve za nyôr Dan-yaan, ve ningir ve yem Shidon.+
7 Shi ve za hen iyou i taver i Tiru+ man agar a Mbahivi cii+ man a Mbakaanan. Ken masejime yô, ve za kure ken Negebi+ u Yuda, hen Bersheba.+
8 Ve zende ken tar la cii iwer itiankarinyiin, maa ayange 20 nga been yô, ve hide ken Yerusalem.
9 Yoabi maa na tor iyenge i ior mba i nger ati a ve la. Iserael cii lu a mbautyaav mba lun a sanker 800,000, ior i Yuda gema lu iorov 500,000.+
10 Kpa Davidi ôron iyenge i ior been cii yô, ishima* na un ibo.+ Davidi maa kaa a Yehova ér: “M er isholibo i vesen+ sha kwagh u m er ne. Hegen yô Yehova, wea lumun yô, de wanye wou a kwaghbo,+ gadia m er kwagh sha ibume kpishi.”+
11 Davidi nderen pepe yô, Yehova ôr kwagh a profeti Gadi,+ ornengen Davidi mbampase la, kaa ér:
12 “Za, za kaa Davidi wer, ‘Ka kwagh u Yehova a kaa ne, ér: “Tsua kwagh môm ken akaa a atar ne, u m va a mi sha a we yô.”’”+
13 Tsô Gadi va hen Davidi va kaa a na ér: “U soo wer ijen i gba ken tar wou anyom ataankarahara?+ Shin u soo wer u yevese mbahyomov ou iwer itiar, ve ve gema ve zendan we ijime?+ Shin u soo wer bouange a va sha tar wou ayange atara?+ Nahan hen sha kwagh u me za ôr Un u a tindim la zulee.”
14 Davidi maa kaa a Gadi ér: “Ishima zam iyol sha kwagh ne tsung. Wea lumun yô, de Yehova a tsaha se,+ sha ci u zungu mhôônom kpishi;+ kpa de deen wer orumace nana tsaham ga.”+
15 Tsô Yehova tindi bouange+ va sha Iserael, hii pepe zan zan nyôr sha shighe u i ver la, nahan iorov 70,000 kpe,+ hii hen Dan zan zan nyôr Bersheba.+
16 Ortyom dughun uwegh sha Yerusalem ér una tim un yô, Yehova vaa afanyô* sha kwaghtseren la,+ nahan a kaa a ortyom u lu timin ior la ér: “Kuma nahan! Shir a uwegh ough inya hegen.” Ortyom u Yehova gema lu ikyua a vande u gbidyen iyiav u Arauna,+ Oryebushi la.+
17 Davidi nengen a ortyom u lu wuan ior la yô, a kaa a Yehova ér: “Ka mo m er isholibo ye, shi ka mo m er kwagh u shami ga ye; kpa iyôngo ne yô,+ ka nyi i ere? Wea lumun yô, tsaham a ya u terem tseegh.”+
18 Tsô Gadi va hen Davidi sha iyange la va kaa a na ér: “Kôndo za ta Yehova atse a nan nagh sha vande u gbidyen iyiav u Arauna, Oryebushi la.”+
19 Davidi ongo kwaghôron u Gadi yô, a kôndo a za er Yehova kaa nahan.
20 Arauna te ashe yô, a nenge tor man mbatomov nav lu van hen a na. Maa fese je, Arauna due za gure tor inya, wa ityough inya.
21 Arauna pine ér: “Er nan ve terem tor a ve hen wanye naa?” Davidi gema kaa ér: “M va mer me va yam vande u gbidyen iyiav hen a we, sha er me maa Yehova atse a nan nagh, nahan bouange u a ve sha ior la una bee yô.”+
22 Kpa Arauna kaa a Davidi ér: “M na terem tor ú gbilin; a na nagh ku a soo u nan sha mi la cii.* Ibua i nan nagh ku nanden a mi ingin, shi kpande u gbidyen iyiav man igbur i wan ibua sha mon kpa ingin, sha ci u keer usu a mi.
23 Terem tor, akaa ne cii Arauna na tor a.” Maa Arauna kaa a tor ér: “Yehova Aôndo wou a er a we doo doo.”
24 Nahan kpa, tor kaa a Arauna ér: “Ei, saa me yam akaa ne cii sha ishe i a hen a we. Me fatyô u nan Yehova Aôndo wam iniav mbi nanden a u kimbin kwagh sha mi shio ga.” Tsô Davidi yam vande u gbidyen iyiav man ibua la sha ushekel mba azurufa 50.*+
25 Nahan Davidi maa Yehova atse a nan nagh,+ a na iniav mbi nanden man iniav mbi bem her. Nahan Yehova ungwa msen u i er sha ci u tar la yô;+ maa bouange u va sha Iserael la bee.
