Samuel u sha Uhar 23:1-39
23 Ka mkaanem ma Davidi ma masetyô je ne:+
“Kwaghôron u Davidi wan u Yese,+Kwaghôron u or u i kende a nan sha,+Or u Aôndo u Yakob u i shigh un mkurem,+Or u wan atsam+ a Iserael a doon u ungwan la.
2 Jijingi u Yehova ôr kwagh sha ikyev yam;+Kwaghôron na lum sha nombor.+
3 Aôndo u Iserael ôr kwagh;Vande u Iserael+ kaa a mo ér:
‘Shighe u orperapera nan lu hemen uumace,+Or u cian Aôndo nan lu hemen yô,+
4 Ka i lu er iwanger i pepe, zum u iyange i te,+Abeen a pepe a lu ga la nahan.
Ka i lu er iwanger i i te, shighe u ura u nee u tende kera,U ne toho u mende sha tar la nahan.’+
5 Iyou yam ngi er iyou i i lu sha ishigh ki Aôndo la gaa?
Gadia a ya ikyur i tsôron a mo,+A er hanma kwagh cii a ver, kwagh u geman sha mi ngu ga.
Sha ci u kwagh ne una nam myom man msaanyol,Ka nahan ve an-ya wam a vese ye gaa?+
6 Kpa a haa agbilinaior cii kera+ er mbaasaa nahan,Sha ci u a fatyô u kôron ve sha ave ga.
7 Shighe u or nan bende a ve yô,Nana lu a iyôgh ki nôngon num a mi man ityôgh ki iwange,Shi i nande ve sha usu vindi vindi hen ijiir ve.”
8 Ka ati a mbautyaav mba ageev mba Davidi je ne:+ Yoshebe-bashebeti Ortakemoni, un lu orhemen u mbautyaav mba utar mbara.+ Lu un wua iorov 800 sha iwange na hen shighe ugen la ye.
9 Or u dondon ken a na yô, lu Eleasar+ wan u Dodo,+ wan u Ahohi, un lu môm ken mbautyaav mba ageev mba utar, mba ve lu vea Davidi shighe u ve laha Mbafiliti la. Yange ve kohol her u nôngon ityav, nahan ior mba Iserael mba yevese yô,
10 a tile her a za hemen u wuan Mbafiliti zan zan uwegh va kpe un, kpa uwegh nagh kôr sanker gbang.+ Nahan Yehova va a mhembe* u vesen sha iyange la;+ maa ior hide dondo un ijime gba kuran akaa a mba i wua ve la.
11 Or u dondon ken a na yô, lu Shama wan u Agee Orharari. Mbafiliti kohol imôngo ken Lehi, hen sule ugen u alev a kiriki lu her kpishi yô; maa ior yevese Mbafiliti.
12 Kpa a tile hen atô u sule la her, a nôngo ér i de ngohol u ga. Lu wuan Mbafiliti, nahan Yehova va a mhembe* u vesen sha iyange la.+
13 Iorov utar ken atô u mbahemen 30 sen za hen Davidi hen bar u Adulam+ sha shighe u sundan iyiav la, ikyumutya i Mbafiliti gema haa afo shin Pev* u Refaim.+
14 Hen shighe ne, Davidi lu hen ijiir i taver u nyôron her,+ Mbafiliti gema haa afo hen Betelehem.
15 Maa Davidi kaa ér: “Mea me mngerem ma shin ijôr i i lu ikyua a hundagar u Betelehem la nahan ma i doomo!”
16 Tsô mbautyaav mba ageev mba utar mbara nyôr ken afo a Mbafiliti sha agee, za kese mngerem shin ijôr i i lu ikyua a hundagar u Betelehem la va na Davidi; kpa a venda u man ma, a gema ma a haa kera sha ishigh ki Yehova.+
17 A kaa ér: “Mayange me er imbakwagh ne ga, Yehova! M ma awambe+ a nomso mba ve ver uma ve sha zongo, ve za kese mngerem ve va nem nee?” Nahan a venda u man ma. Ka akaa a yange mbautyaav nav mba ageev mba utar mbara er je la.
18 Abishai+ anmgbian u Yoabi wan u Seruya,+ lu orhemen u mbautyaav mba utar mbagen. Yange wua iorov 300 a iwange na, nahan un kpa iti na za gwa, er mba utar mba hiihii mbara nahan.+
19 Er hemba lun a icivir a mba utar mbagen mbara shi lu orhemen ve nahan kpa, a nyôr sha ian i mba utar mba hiihii mbara ga.
20 Benaia+ wan u Yehoyada lu or u taver ishima,* u er akaa a vesen kpishi ken Kabeseel yô.+ Yange wua Ariel or u ken Moabi la ônov mba nomso uhar, shi hungwa shin ihyungwamnger, za wua begha sha iyange i senou lu haan yô.+
21 Shi yange wua Origipiti ugen. Or ne gba ikyôr hemba er uumace ve lun yô. Er Origipiti ne lu a iwange ken uwe nahan kpa, a za ta num sha a na a gbough, maa a ngohol iwange i Origipiti ne lu a mi ken uwe la, a gema iwange na shon a wua un a mi.
22 Benaia wan u Yehoyada er akaa ne, nahan iti na za gwa er mbautyaav mba ageev mba utar mbagen mbara nahan.
23 Er hemba lun a icivir a mbautyaav mba ikyundugber mbara nahan kpa, nyôr sha ian i mbautyaav mba utar mbara ga. Nahan kpa, Davidi ver un lu orhemen u mbakuran un.
24 Asahel+ anmgbian u Yoabi lu môm ken mbautyaav mba ikyundugber mbara: Elhanan wan u Dodo, or u ken Betelehem+
25 man Shama Orharodi man Elika Orharodi
26 man Helese+ Orpaleti man Ira+ wan u Ikeshi Ortekoa
27 man Abieser+ Oranatoti+ man Mebunai Orhusha
28 man Salmon Orahohi man Maharai+ Ornetofa
29 man Helebi wan u Baanahi Ornetofa man Itai wan u Ribai, or u ken Gibea u Mbabenyamin,
30 man Benaia+ Orpiraton man Hidai or u hen iwagh i Gaashi+
31 man Abi-albon Orarbati man Asemaveti Orbahurim
32 man Eliaba Orshaalebon man ônov mba Yashen mba nomso man Yonatan,
33 man Shama Orharari man Ahiam wan u Sharar Orharari
34 man Elifeleti wan u Ahashebai wan u Maakati man Eliam wan u Ahitofel+ Orgilo
35 man Hesero Orkarmel man Paarai Orarebi
36 man Igal wan u Natan or u ken Soba man Bani Orgadi
37 man Seleki Oramon man Naharai Orbeeroti, u tôôn Yoabi wan u Seruya ikyav mbi utyaav la,
38 man Ira Oriteri man Garebi Oriteri,+
39 kua Uria+ Orhiti la—kohol cii lu iorov 37.
