Samuel u sha Uhar 2:1-32
2 Davidi been yô, a pine Yehova ér:+ “M kôndo m za lu hen môm ken agar a Yuda?” Yehova gema kaa a na ér: “Kôndo za.” Davidi maa pine ér: “M za hana?” A kaa ér: “Za ken Heberon.”+
2 Tsô Davidi kôndo za her vea kasev nav mba uhar mbara, Ahinoam+ kwase u ken Yesereel, man Abigail+ kwasecôghol u Nabal, Orkarmel la.
3 Davidi shi yem a ior mba ve lu vea na la,+ hanma ve a ya u nan ve za tema ken agar a a kase Heberon la.
4 Tsô ior i Yuda za her za shighe Davidi mkurem hingir tor sha ya u Yuda.+
Ve kaa a Davidi ér: “Ka ior mba Yabeshi-gileadi yange ve ii Saulu ye.”
5 Nahan Davidi tindi mbaôron-loho hen ior mba Yabeshi-gileadi kaa a ve ér: “Yehova a ver ne doo doo, sha ci u ne tese ter wen Saulu dooshima tsung sha u iin un.+
6 Yehova a tese ne dooshima tsung, shi a er kwagh a ven sha mimi. Mo kpa, me tese ne erdoo sha ci u kwagh u ne er ne.+
7 Nahan taver nen ave a en, shi lu nen nomso mba taver asema, gadia ter wen Saulu kpe, nahan ya u Yuda shighem mkurem ér mo m tema tor sha a ve.”
8 Kpa Abiner+ wan u Ner, kurutya u ikyumutya i Saulu vande za tôôn Ishibosheti,+ wan u Saulu va a na yande Mahanaim,+
9 va na un tor sha Gileadi,+ man sha Mbaashur, man sha Yesereel,+ man sha Eferaim,+ man sha Benyamin, kua sha Iserael cii.
10 Ishibosheti wan u Saulu la, lu anyom 40 shighe u tema tor sha Iserael la; yange hemen anyom ahar. Nahan kpa, ya u Yuda yô sue Davidi.+
11 Shighe u* Davidi tema tor sha ya u Yuda ken Heberon yô lu anyom ataankarahar man iwer ataratar.+
12 Shighe kar yô, Abiner wan u Ner man mbatomov mba Ishibosheti wan u Saulu la, mough hen Mahanaim+ za ken Gibeon.+
13 Yoabi+ wan u Seruya,+ man mbatomov mba Davidi kpa due za zua vea ve hen ityungu i Gibeon; kwe u môm tema ityungu la yande ne, kwe ugen la di tema ityungu shon yande la.
14 Ken masejime yô, Abiner kaa a Yoabi ér: “De agumaior ne a mough sha, a nôngo num ayol a ve sha ishigh yasegh.” Maa Yoabi kaa ér: “Ve mough ve nôngo.”
15 Tsô ve mough ve per, i ôr iyenge ve, iorov 12 tile sha ityough ki Benyamin man Ishibosheti, wan u Saulu; iorov 12 mbagen di tile sha ityough ki mbatomov mba Davidi.
16 Maa ve kôr ayol a ve sha ityo, hanma ve nan tsua sanker u nan, nan kuma or u nan lu nôngon num a nan la ken imbusu; tsô ve cii ve gba hen inya. Nahan i yila ijiir shon i i lu ken Gibeon ne ér Helkati-hasurim.
17 Num u i nôngo sha iyange ne la cier iyol je gande. Nahan ken masejime yô, mbatomov mba Davidi hemba Abiner man ior i Iserael num.
18 Ônov mba Seruya+ mba nomso mba utar mbara lu her—lu Yoabi+ man Abishai+ man Asahel;+ Asahel yange a yevese fele fele er ihyo ka i yevese ken toho nahan.
19 Asahel zenda Abiner ijime. Shighe u lu zendan Abiner la, a goom ken iyan shin ken imese ga.
20 Abiner gem ashe ijime yô, a pine ér: “Asahel ka wee?” A gema a kaa ér: “Een, ka mo.”
21 Tsô Abiner kaa a na ér: “Goom ken iyan wou shin ken imese wou, za kôr or môm ken agumaior la, ngohol hanma kwagh u nan lu a mi cii yem a mi.” Kpa Asahel de u zendan un ga.
22 Abiner shi kaa a Asahel ér: “De u zendan mo ijime. U ngu keren wer m wua u ga? Me wua u nahan, me fatyô u kenger anngôu Yoabi sha ishi kpa?”
23 Kpa Asahel de u zendan un ga, nahan Abiner gema ityô i iwange, tume un sha uya,+ maa iwange la pev un kar due ken ijime; tsô a gba a kpe her ave ave je. Hanma or nana va nyôr hen ijiir i Asahel gba kpe la yô, nan tile nan tamber her.
24 Maa Yoabi man Abishai, kar gba zendan Abiner. Iyange lu miren shighe u ve za nyôr sha igyungu i Ama i i ne ishigh sha Gia, sha gbenda u yemen ken taaikyôngo u Gibeon la.
25 Shi Mbabenyamin kohol imôngo tile ken ijime i Abiner hen ijiir la; ve kohol gungur môm ve za tile sha ityough ki igyungu igen.
26 Tsô Abiner yila Yoabi genger genger kaa ér: “Se de sanker a wua se gbem sha wono? U fa er i lu ishimavihin tseegh kwagh ne una va a mi gaa? Ior vea zenda anmgbianev vev ijime, a kuma shighe nan ve u kaa a ve wer ve de?”
27 Yoabi gema kaa ér: “Mimi je, er Aôndo u mimi a lu u uma ne, luun er wea ôr kwagh ga yô, ior ma ve de u zendan anmgbianev vev ga, zan zan saa kper pepe.”
28 Tsô Yoabi tôngo korough, nahan ior nav de u zendan Iserael ijime, maa num bee.
29 Tsô Abiner man ior nav zende tugh mbura cii, zan zan ve za kar hen Araba+ ve yem ve za per Yordan, shi ve zende ve kar shin pev la cii.* Ken masejime yô, ve za nyôr hen Mahanaim.+
30 Yoabi den u zendan Abiner ijime yô, a kohol ior cii ijiir i môm. Dugh Asahel sha yô, shi mbatomov mba Davidi mbagen 19 lu ga.
31 Kpa mbatomov mba Davidi hemba Mbabenyamin man ior mba Abiner num; ve wua ior vev 360.
32 Tsô ve tôô Asahel+ ve za ii un ken uwar u ter na, u u lu ken Betelehem la.+ Maa Yoabi man ior nav zende tugh mbura cii, zan zan ve za nyôr Heberon+ shighe u sev av yô.
