Samuel u sha Uhar 21:1-22
21 Hen shighe ne, ijen gba+ sha ayange a Davidi la anyom atar jimin. Davidi za pin Yehova kwagh u una er yô, Yehova kaa a na ér: “Iboawambe ngi sha Saulu man ya na, sha ci u yange wua Mbagibeon.”+
2 Tsô tor yila Mbagibeon+ lam a ve. (Kwagh ka a er yô, Mbagibeon lu Mbaiserael ga, kpa ve lu Mbaamor+ mba ve shi her, mba yange Mbaiserael bum ér vea wua ve ga la,+ kpa Saulu yô, gema ker u wuan ve sha ci u gbashima u lu a mi sha ior i Iserael man ior i Yuda la.)
3 Davidi pine Mbagibeon ér: “M er nyi sha ci wen, man me er nan ve me wam ne, sha er ne ver dyako u Yehova doo doo?”
4 Mbagibeon gema kaa a na ér: “Se mba kaan ser i na se azurufa shin zanaria+ sha kwagh u Saulu man ya na ve er a vese la ga; shin ka u se wua or ken Iserael kpaa ga.” Nahan a kaa ér: “Kwagh u ne ôr cii, me er sha ci wen.”
5 Maa ve kaa a tor ér: “Or u a woo se shi a nôngo ér una tim se, se de kera lu mape môm ken tar u Iserael ga la+—
6 i na se ônov mba nan mba nomso utaankaruhar. Nahan se hambe ikyom* ve+ sha ishigh ki Yehova ken Gibea+ u Saulu, un u Yehova tsua un la.”+ Tor maa kaa ér: “Me na ve sha ikyev yen.”
7 Nahan kpa, tor zungwe Mefibosheti+ wan u Yonatan, wan u Saulu la mhôônom, sha ci u kwagh u yange Davidi man Yonatan+ wan u Saulu bum sha ishigh ki Yehova la.
8 Tsô tor kôr Armoni man Mefibosheti, ônov uhar mba nomso mba Risepa+ wan u Aia u kwase mar a Saulu la, man ônov utaan mba Mikal*+ wan u Saulu u kwase mar a Aderiel,+ wan u Barshilai, Ormehola la.
9 Maa a na ve sha ikyev i Mbagibeon, ve hambe akom a ve sha uwo sha ishigh ki Yehova.+ Ve mba utaankaruhar mbara cii ve kpe imôngo. Yange i wua ve sha ayange a hiihii a sundan iyiav la, sha shighe u i hii u sundan barli la.
10 Tsô Risepa+ wan u Aia u kwase tôô ikyondo i zungwen* za samber sha vande, maa a lu her hii shighe u sundan iyiav la zan zan shighe u ura sen sha, nôô sha ikyom shon la; a lumun ér inyon i sha, i gba sha akom la atetan ga, shin inyamkyume i ken toho i za ikyua a akom shon tugh kpaa ga.
11 Tsô i za ôr Davidi kwagh u Risepa wan u Aia, kwase u Saulu u sha uikya la.
12 Davidi maa za ngohol akuhe a Saulu man akuhe a wan na Yonatan, hen mbahemenev* mba Yabeshi-gileadi,+ mba yange ve ii a hen tembe u Bete-shan, ape Mbafiliti yange ve hambe ikyom ve sha iyange i Mbafiliti wua Saulu sha Gilboa la.+
13 Davidi tôô akuhe a Saulu man akuhe a wan na Yonatan her hide a mi, shi ve kohol a ior mba i wua* ve la kpaa.+
14 Maa ve ii akuhe a Saulu man akuhe a wan na Yonatan ken tar u Benyamin, hen Sela,+ ken uwar u ter na Kishi.+ Mba eren hanma kwagh u tor kaa cii yô, Aôndo ungwa mbamsen mba i er sha ci u tar la yô.+
15 Tsô ityav shi gba hen atô u Mbafiliti man Mbaiserael.+ Nahan Davidi vea mbatomov nav sen za nôngo ityav a Mbafiliti, kpa Davidi za vôr.
16 Orgen ken tsombor u Refaim+ u i yilan un ér Ishebi-benobi yô, lu a iwange i togula, yuhwa kuma ushekel 300,*+ shi lu a sanker u he, wa ishima u wuan Davidi.
17 Fese je, Abishai+ wan u Seruya va wase un,+ gber Orfiliti la kende inya, wua un. Ior mba Davidi bum a na hen shighe la kaa ér: “Mayange de kera dugh ze ityav vea vese ga!+ Se soo ser imenger i Iserael i pir ga!”+
18 Tsô shi ityav mbigen gba hen atô u Mbaiserael man Mbafiliti+ hen Gobi. Hen shighe la, Shibekai+ Orhusha la wua Sav, or u ken tsombor u Refaim+ la kende inya.
19 Shi ityav mbigen va gba hen atô u Mbaiserael man Mbafiliti+ hen Gobi, maa Elhanan wan u Yaare-Oregim Orbetelehem la, wua Goliati Orgiti la kende inya. Ityôgh ki iwange i Goliati kehe er kon u mbatumenakondo nahan.+
20 Shi ityav gba hen Gati. Orgen lu hen ijiir ne, or ne gba ikyôr hemba er uumace ve lun yô; hanma uwegh nagh lu a ahôaveegh 6, shi hanma nguhar nagh lu a ahôangahar 6, kohol cii lu 24; un kpa lu or u ken tsombor u Refaim.+
21 Or ne zer lahan Iserael,+ nahan Yonatan wan u Shimei,+ anmgbian u Davidi, wua un kende inya.
22 Ior mba unyiin mban cii, lu ior mba ken tsombor u Refaim, ken Gati. Ve kpe sha uwegh ku Davidi man sha uwegh ku mbatomov nav.+
