Samuel u sha Uhar 7:1-29
7 Tor tem hen ya na* kundu kundu+ shi Yehova ne un mmem sha mbahyomov mba ve kase un la cica cii yô,
2 tor kaa a profeti Natan+ ér: “Nenge, m ngu tsan ken iyou i sedar,+ kpa Areki u Aôndo u mimi la yô, gema ngu ken tenti.”+
3 Natan gema kaa a tor ér: “Za, za er hanma kwagh u u we ken ishima u eren cii, sha ci u Yehova ngu a we.”+
4 Hen tugh mbura je, Yehova ôr kwagh a Natan kaa ér:
5 “Za, za ôr a ortom wam Davidi wer, ‘Ka kwagh u Yehova a kaa je ne, ér: “Ka we i gbe u u maam ya u me lu ker yee?+
6 Hii sha iyange i m due a ior i Iserael ken Igipiti kera la je zan zan nyian,+ m ngu a lu ken iyou ga, kpa ka m zenden ken tenti man ken tabernakel.+
7 Sha ashighe a m lu zenden vea Mbaiserael* la cii, ma shighe ngu u yange m pine ma or môm ken mbahemenev mba uipyaven mba Iserael, u m tsua nan mer nana kuran ior av Iserael la mer, ‘Er nan ve ne maam iyou i sedar ga’ vee?”’
8 Hegen yô, ka kwagh u u ôr a ortom wam Davidi je ne, wer, ‘Ka kwagh u Yehova u akum a sha a kaa je ne, ér: “Yange m za tôô u ken toho shighe u u lu nengen sha ilev la+ mer va hingir orhemen u ior av Iserael.+
9 Shi me lu a we hanma ijiir i u lu zan cii,+ shi me bee a mbahyomov ou cii sha ishigh you kera;+ shi me er iti you ia za gwa,+ er iti i uityaghermbaiorov mba shin tar nahan.
10 Me tsua ijiir sha ci u ior av Iserael, me ver ve her, nahan vea lu her shi kwagh môm a kera za ve iyol ga; shi aferaior aa kera na ve ican er ngise ve na ve ican,+
11 hii sha iyange i m ver mbaajiriv+ sha ior av Iserael la nahan ga. Shi me na u mmem sha mbahyomov ou cii.+
“‘“Yehova shi kaa a we ér, Yehova una maa u ya.*+
12 Ayange a ou aa been,+ a iin we vea uter ou yô, me va a wan* wou, wan wou kpôô kpôô,* shighe u u kera lu ga yô; me ver tartor na, mayange ua tenger ga.+
13 Ka un una maa ya sha ci u iti yam ye,+ nahan me ver ikyônough ki torough ki tartor na, kia lu gbem sha won, mayange kia tenger ga.+
14 Me hingir ter na, un di una hingir wan wam.+ Aluer una er kwaghbo yô, me tsaha un sha akpa u ior, shi me gbidye un sha mbaakpa mba ônov mba iorov.*+
15 Mayange me kar a erdoo wam hen a na kera, er yange m kar a mi hen Saulu,+ un u m dugh un sha ishigh you kera la nahan ga.
16 Ya wou man tartor wou ua lu sha ishigh you gbem sha won; ikyônough ki torough you kia lu gbem sha won.”’”+
17 Natan ôr Davidi akaa ne cii, shi ôr un mpase u sha mnenge ne cii.+
18 Tsô Tor Davidi nyôr za tema sha ishigh ki Yehova kaa ér: “Yehova Ter u Hemban Cii, mo m ngu nyi je? Man ya wam yô, ngu di nyi je ve, u erem akaa kpishi nahana?+
19 Nahan kpa, we Yehova Ter u Hemban Cii, u de ga, shi u ôr wer ya u ortom wou una lu her zan zan ken hemen ica je; Yehova Ter u Hemban Cii, kwagh ne ka kwaghwan* u a lu sha ci u uumace cii yô.
20 Ka nyi shi ortom wou Davidi una ôrô? Gadia we Yehova Ter u Hemban Cii, u fam vindi vindi.+
21 U er akaa a vesen ne cii shi u pase ortom wou a+ sha ci u kwaghôron wou, man er i doo ishima you la.*
22 Ka nahan ve, we Yehova Ter u Hemban Cii, u hembe sha mimi ye.+ Or môm ngu er we ga,+ shi Aôndo ugen kpa ngu ga, saa we;+ hanma kwagh u ato a ase a ongo cii tese nahan.
23 Man ka ikyurior i han sha tar i lu er ior ou Iserael?+ Aôndo yange za, za yima ve ér ve hingir ior nav,+ nahan na i fa iti na+ sha akaa a vesen man a kpilighyol a a er sha ci ve la.+ U zenda akuraior man mbaaôndo vev kera sha ci u ior ou, mba yange u yima ve u due a ve ken Igipiti sha ci wou la.
24 U ver ior ou Iserael hingir ior ou gbem sha won;+ nahan we Yehova, u hingir Aôndo ve.+
25 “Hegen yô, Yehova Aôndo, er kwagh u u tende zwa wer u er sha kwagh u ortom wou man ya na la gbem sha won; shi ma u er vough er u tende zwa nahan.+
26 I kende a iti you sha gbem sha won,+ sha er ior vea kaa ér, ‘Yehova u akum a sha ka Aôndo u Iserael yô,’ shi ma i we imaagh ki ya u ortom wou Davidi sha ishigh you ma i taver gbang gbang.+
27 Gadia we, Yehova u akum a sha, Aôndo u Iserael, u pase ortom wou wer, ‘Me maa u ya.’*+ Ka nahan ve ortom wou a taver ishima,* a er msen ne hen a we ye.
28 Hegen yô, we Yehova Ter u Hemban Cii, u ngu Aôndo u mimi, shi mkaanem ou ka ma mimi,+ shi u tôndo zwa a ortom wou wer u na un akaa a dedoo ne.
29 Sha nahan yô, i doo u u veren ya u ortom wou doo doo, shi ma i ze hemen u lun nahan gbem sha won sha ishigh you;+ gadia we Yehova Ter u Hemban Cii, u tôndo zwa, shi ma u ne iveren, nahan iveren la ma i lu sha ya u ortom wou gbem sha won.”+
Ngeren mba shin kpe
^ Shin “ya u tor.”
^ Zwa Heberu, “ônov mba Iserael.”
^ Shin “na u hementor.”
^ Zwa Heberu, “vor.”
^ Zwa Heberu, “u una due ken atô u iyol you yô.”
^ Shin a fatyô u kaan ér, “Adam.”
^ Shin “tindi.”
^ Shin “er i zough sha awashima wou yô.”
^ Shin “na u hementor.”
^ Zwa Heberu, “a zough a ishima.”
