Samuel u sha Uhar 3:1-39
3 Ityav mbi ya u Saulu man ya u Davidi lu nôngon la za hemen her; tahav mbu Davidi lu seer a seer,+ kpa tahav mbu ya u Saulu yô, lu panden a pande.+
2 Hen shighe ne, i mar Davidi ônov mba nomso ken Heberon.+ Wan na u hiihii lu Amnon.+ Yange mar un a Ahinoam,+ kwase u ken Yesereel la.
3 Wan na u sha uhar lu Kileabi, a mar un a Abigail,+ kwasecôghol u Nabal, Orkarmel la; wan na u sha utar lu Abesalom,+ i yilan ngô na ér Maaka, un lu wan u Talmai,+ tor u Geshur.
4 Wan na u sha unyiin lu Adoniya,+ wan u Hagiti; wan na u sha utaan lu Shefatia, wan u Abital.
5 Wan u Davidi u sha ataratar lu Iteream; Davidi mar un a kwase na Egela. Yange i mar Davidi ônov mban ken Heberon.
6 Er ityav mbi ya u Saulu man ya u Davidi lu zan hemen la, Abiner+ lu hemban lun a tahav hen ya u Saulu cii.
7 Saulu yange lu a kwase u sha uikya ugen; i yilan kwase ne ér Risepa,+ lu wan u Aia. Shighe kar yô, Ishibosheti+ pine Abiner ér: “Er nan ve u yav a kpankwase u tereme?”+
8 Mkaanem ma Ishibosheti mara vihi Abiner pev, nahan a kaa ér: “M ngu ityough ki iwaagh ki ken Yuda? M tese ya u teru Saulu dooshima tsung, kua anmgbianev nav man azende a na, shi m na u sha ikyev i Davidi ga zan zan iyange ne; nahan kpa, nyian u ngu nan mo ibo sha kwagh u kwase.
9 Aôndo a tsaha Abiner tsung, aluer m er kwagh a Davidi vough er Yehova bum a na nahan ga yô.+
10 Yange bum ér una kar a tartor u ya u Saulu kera, una gema a ver ikyônough ki torough ki Davidi sha Iserael man sha Yuda, hii hen Dan zan zan nyôr Bersheba.”+
11 Ishibosheti kera fatyô u ôron kwagh môm a Abiner ga, sha ci u lu cian un.+
12 Fese je, Abiner tindi mbaôron-loho hen Davidi kaa ér: “Ka an tar ne u lu u nana?” Shi a kaa ér: “Ya ikyur a mo, nahan me er kwagh u m fetyô la cii,* me gema Iserael cii una dondo u.”+
13 Davidi gema kaa ér: “Doo! Me ya ikyur a we. Ka kwagh u m soo mer er di tsô je ne; u vaan u va nengen a mo yô, vaan a Mikal+ wan u Saulu u kwase la, ga yô de ve sha ishigh yagh ga.”
14 Maa Davidi tindi mbaôron-loho hen Ishibosheti+ wan u Saulu, kaa ér: “Nam kwase wam Mikal, un u yange m za wua Mbafiliti 100 m va a ikyav,*+ m va vôso un la.”
15 Tsô Ishibosheti tindi i za kua a na hen nom na Paltiel,+ wan u Laishi i va a mi.
16 Kpa nom na lu zenden van vea na, vaan zan zan va nyôr hen Bahurim.+ Maa Abiner kaa a na ér: “Hide yem!” Tsô a hide a yem.
17 Hen shighe ne, Abiner vande tindin a loho hen mbatamen mba Iserael, kaa ér: “Yange ne soo ner Davidi a tema tor sha a ven hen shighe ugen la.
18 Nahan hegen er nen kwagh u yange ne soo la, sha ci u Yehova lu kaa a Davidi ér: ‘Ka sha uwegh ku ortom wam Davidi,+ me yima ior av Iserael sha ikyev i Mbafiliti man sha ikyev i mbahyomov vev cii ye.’”
19 Maa Abiner lam a ior i Benyamin.+ Shi Abiner za lam a Davidi ken myer hen Heberon, ôr un kwagh u Iserael man ya u Benyamin cii ve lumun u eren yô.
20 Shighe u Abiner va hen Davidi, hen Heberon vea ior 20 la, Davidi er iniongo sha ci u Abiner man sha ci u ior mba ve lu vea na la.
21 Tsô Abiner kaa a Davidi ér: “De m za kohol Iserael cii m va a ve hen terem tor, sha er vea ya ikyur a we, shi u tema tor sha ikyurior i Iserael cii, er i sar u la yô.” Tsô Davidi na Abiner gbenda yem kwagh na bem bem.
22 Abiner vea ior nav mba yemen nahan maa, mbatomov mba Davidi man Yoabi za hide ityav; ve hide a ishar kpishi. Hen shighe ne, Abiner kera lu vea Davidi ken Heberon ga, sha ci u Davidi na un gbenda, yem kwagh na bem bem.
23 Yoabi+ man ikyumutya i i lu vea na la cii mba va nyer yô, i kaa a Yoabi ér: “Abiner+ wan u Ner+ va hen tor, nahan tor na un gbenda a hide a yem kwagh na bem bem.”
24 Tsô Yoabi nyôr za pine tor ér: “Ka nyi kwagh u er nee? Abiner ashen a ve hen a we heen. Man er nan u ne un gbenda a yem doo doo?
25 U lan kwagh u Abiner wan u Ner ga! A va heen u va bumen we shi fan awashima wou cii, kua hanma kwagh u u lu eren yô.”
26 Tsô Yoabi due undu Davidi, maa tindi mbaôron-loho ér ve zenda Abiner ijime, nahan ve za kôr un hen ijôr i Shira ve hide a na; kpa Davidi fa kwagh môm sha kwagh ne ga.
27 Abiner hidi ken Heberon yô,+ Yoabi ta ibyalegh a na hen hundagar ér una lam vea na ve uhar. Nahan kpa, a kuma un sanker sha gbor her, maa a kpe;+ yange er kwagh ne sha ci u a wua* anmgbian na Asahel.+
28 Shighe kar, Davidi ongo kwagh ne yô, a kaa ér: “Mo man tartor wam, se mba a ibo sha ishigh ki Yehova sha awambe+ a Abiner wan u Ner la ga gbem sha won.
29 Iboawambe la i hide sha ityough ki Yoabi+ man ya u ter na cii. Mayange ya u Yoabi una ban a nomsoor u nan gbe angev sha ilyeegh ki yaven a or ga,+ shin orimande+ shin oriwan shin or u kpen ku u sanker, gayô or u banen a kwaghyan kpaa ga!”+
30 Nahan Yoabi man anngô na Abishai+ wua Abiner,+ sha ci u yange wua anmgbian ve Asahel ken utya+ hen Gibeon.
31 Tsô Davidi kaa a Yoabi man ior mba ve lu vea na la cii ér: “Ande nen akondo a en, gema zer nen akondo a zungwen,* vaa nen ku u Abiner.” Shighe u i kôr ikyom i Abiner sha gambe i lu yemen a mi u za iin la, Tor Davidi iyol na kpa lu zenden van ken ijime.
32 Ve ii Abiner hen Heberon; maa tor vaa genger genger hen uwar u Abiner, shi ior cii vaa.
33 Tor wa icam, vaa Abiner kaa ér:
“Gba u Abiner una kpe, inja er ngu or u nan ban a kwaghfan nahanaa?
34 Yange i kange u ave ga,Shi i kange u mshirim* shin angahar kpaa ga.
U kpe er or u aferaior a* woo nan nahan.”+
Nahan ior cii hide vaa un.
35 Tsô ior cii, va na Davidi beredi sha u surun un ishima,* er iyange lu her la. Kpa Davidi bum kaa ér: “Aluer m za a beredi shin ma kwagh ugen sha zwa cii man iyange mire yô, Aôndo a tsaham tsung!”+
36 Ior cii nenge kwagh u za hemen ne, nahan doo ve. Er hanma kwagh u tor er nahan, kape kwagh ne kpa doo ior cii je la.
37 Nahan ior cii man Iserael cii fa sha iyange la ér, tor ngu uwegh sha ku u Abiner, wan u Ner ga.+
38 Maa tor pine mbatomov nav ér: “Ne fa er orhemen man ityagheror a kpe ken Iserael sha iyange ne kpa?+
39 Iyol kpem nyian, shin er i shighem mkurem m hingir tor nahan kpaa.+ Ônov mba Seruya mba nomso+ mban wa tswam ngeem gande.+ Yehova a kimbi iferor sha ifer i nan.”+
