Samuel u sha Uhar 8:1-18
8 Shighe kar yô, Davidi hemba Mbafiliti ityav,+ maa ve hingir sha ikyev na,+ shi Davidi ngohol Metegama sha ikyev i Mbafiliti kera.
2 Yange hemba Mbamoabi ityav,+ nahan a kaa ve, ve yav inya sha nongo, maa a tôô kor a kar ve; sha er una wua iorov uhar ken atô u iorov utar, una de or môm uma yô.+ Tsô Mbamoabi hingir mbashiren Davidi, shi ve taan un kpandegh.+
3 Davidi hemba Hadadeser wan u Rehobi, tor u Soba+ ityav shighe u lu yemen sha gbenda u za hiden ngohol haregh u hen Ifi u Uferati la.+
4 Davidi ngohol un mbahendananyinya 1,700, kua ushoja mba zenden angahar 20,000. Davidi maa tôndo anyinya a kpelan akekeautya la cii igbila shin angahar, mase shin 100 tseegh.+
5 Mbashiria mba ken Damaseku+ mba ve u va wasen Hadadeser tor u Soba ityav yô, Davidi wua Mbashiria 22,000.+
6 Davidi maa ver mbautyaav hen Shiria u ken Damaseku, nahan Mbashiria hingir mbashiren Davidi shi tan un kpandegh. Hanma ijiir i Davidi una za cii Yehova a na un mhembe.*+
7 Heela tseegh ga, Davidi ngohol mbatomov mba Hadadeser ipyerutya i lun gbilititi i sha zanaria, va a mi ken Yerusalem.+
8 Tor Davidi kura togula kpishi ken Beta man Berotai, agar a Hadadeser la.
9 Tsô Toi, tor u Hamati+ ungwa ér Davidi hemba ikyumutya i Hadadeser cii ityav.+
10 Nahan Toi tindi wan na Yoram hen Tor Davidi ér a za fa er a lu yô, shi a sugh un sha ci u Davidi nôngo ityav a Hadadeser hemba un (gadia Hadadeser nôngon ityav a Toi), shi a va Davidi a ikyav mbi sha azurufa man zanaria kua togula.
11 Tor Davidi tsegha akaa ne sha ci u Yehova, kua azurufa man zanaria mba yange tsegha ken akaa a a ngohol hen akuraior, a a hemba a ityav la cii:+
12 yange ngohol a hen Shiria man Moabi,+ shi ngohol a hen Mbaamon man Mbafiliti+ man Mbaamaleki,+ shi zua a a ken ishar i ya Hadadeser+ wan u Rehobi, tor u Soba la.
13 Davidi shi na iti na za gwa shighe u za wua Mbaedom 18,000 shin Pev u Bar,+ hide la.
14 Davidi shi ver akumautya ken Edom. A ver akumautya ken Edom cii, nahan Mbaedom cii hingir mbashiren Davidi.+ Hanma ijiir i Davidi una za cii, Yehova a na un mhembe.*+
15 Davidi za hemen u lun tor u Iserael cii,+ shi Davidi lu ôron ior nav cii+ ijir sha mimi man sha perapera.+
16 Yoabi+ wan u Seruya lu hemen ikyumutya la, shi Yehoshafati+ wan u Ahiludi lu orngeren.
17 Sadoki+ wan u Ahitubi, man Ahimeleki wan u Abiata, ve lu upristi, Seraia gema lu akawe.
18 Benaia+ wan u Yehoyada lu hemen Mbakereti man Mbapeleti.+ Ônov mba Davidi mba nomso di hingir mbatomov mba tagher tagher.*
