Samuel u sha Uhar 16:1-23
16 Davidi karen ityough ki uwoogh kira+ kpuaa yô, Shiba+ ortom u Mefibosheti+ va her a ujaki uhar mba i kange ve shidi* yô u va kohol un; kange ikpenberedi 200 sha mi, kua azen a atam a wain a uman 100, man azen a atamaikyon a uman a inyom 100* man ityegh ki wain ki vesen.+
2 Maa tor pine Shiba ér: “Er nan u ve a akaa nee?” Shiba gema kaa ér: “M va a ujaki mban mer ior mba hen ya u tor ve hendan, kua uberedi man atamaikyon a uman a inyom sha ci u agumaior a ya, man wain sha ci u ior mba vea vôr ken taaikyôngo yô ve ma.”+
3 Nahan tor pine ér: “Wan* u orvesen wou ngu hana?”+ Shiba gema kaa a tor ér: “Ngu ken Yerusalem sha ci u a kaa ér, ‘Nyian ya u Iserael una hide a hementor u terem una nam.’”+
4 Tor maa kaa a Shiba ér: “Nenge! Hanma kwagh u Mefibosheti cii hingir u wou.”+ Shiba gema kaa ér: “M gure sha ishigh you. Ma i ze hemen u doon we a mo her terem tor.”+
5 Tor Davidi va nyer hen Bahurim yô, orgen hen tsombor u ya u Saulu, due lu tuhwan Davidi genger genger zan ikyua a na;+ i yilan or ne ér Shimei,+ lu wan u Gera.
6 Or ne shi lu keren Davidi awen man mbatomov mba Tor Davidi cii, kua ior cii, man nomso mba ageev mba ve lu un ken iyan man ken imese la cii.
7 Shimei lu tuhwan un kaan ér: “Yem heen kera, yem heen kera, we or u lun a iboawambe ne! We gbilinor ne!
8 Yehova hide a iboawambe i ya u Saulu cii sha ityough you, un u u ngohol un tor, u kar u tem sha ian na la, kpa Yehova gema hemen wou la na sha ikyev i wan wou Abesalom. Hegen yô, kwagh tser u, sha ci u u ngu or u lun a iboawambe!”+
9 Tsô Abishai wan u Seruya+ kaa a tor ér: “A er nan man iwa i kpen ne+ ia tuhwan terem toro?+ Wea lumun yô, de m za m za gber un ityough.”+
10 Kpa tor gema kaa ér: “Ka nyi yen sha kwagh ne, ne ônov mba Seruya?+ De un nen a tuhwam+ sha ci u Yehova kaa a na ér,+ ‘Tuhwa Davidi!’ Nahan ka an nana pine ér, ‘Er nan ve u lu eren kwagh ne?’”
11 Davidi maa kaa a Abishai kua mbatomov nav cii ér: “Wan wam u a dugh ken iyol yam je kpa ngu keren mo a ku,+ man hide Orbenyamin+ ne ve, una kera kerem a ku ga yee? De un nen a tuhwam sha ci u Yehova kaa a na ér a er nahan!
12 Alaghga Yehova una nenge a ican yam,+ nahan Yehova una hide a er a mo doo doo, a kera lu er i tohom nyian genger genger ne ga.”+
13 Nahan Davidi man ior nav lu senen zan sha gbenda la her, Shimei gema lu zenden van hen kpe uwoogh ikyua a na, tuhwan un genger genger,+ keren awen shi tsendan inya kpishi.
14 Ken masejime yô, tor man ior mba ve lu vea na la cii ve za nyôr ape ve lu zan la, ve vôr gbeda gbeda, nahan ve mem.
15 Hen shighe ne, Abesalom man ior i Iserael cii za nyôr ken Yerusalem, Ahitofel+ kpa lu vea na.
16 Hushai+ Orakiti,+ ijende i Davidi* la ve hen Abesalom yô, Hushai kaa a Abesalom ér: “Tor a lu uma gbem!+ Tor a lu uma gbem!”
17 Maa Abesalom pine Hushai ér: “Ka gbenda u tesen ijende you dooshima nee? Er nan u yem vea ijende you ga?”
18 Tsô Hushai kaa a Abesalom ér: “Ei, m ngu ken vegher u un u Yehova man ior mban kua ior i Iserael cii ve tsough la. Me lu vea na.
19 Shi m ngu kaan mer, Ka an i gbe u me er nan tomo? Kera ka wan na ga zee? Me er u tom vough er yange m er teru tom nahan.”+
20 Abesalom maa kaa a Ahitofel ér: “Ôrom ase kwagh u me er yô.*+ Ka nyi se ere?”
21 Tsô Ahitofel kaa a Abesalom ér: “Yav a kasev mba sha uikya mba teru+ a undu her ér ve nengen sha ya* la. + Nahan Iserael cii una ungwa ér kwagh wou vihi teru ishima, maa ishima ia seer taver mba ve lu dondon we ijime la.”
22 Tsô ve tim Abesalom tenti sha tembe-youghough u sha,+ nahan Abesalom yav a kasev mba sha uikya mba ter na+ la sha ashe a Iserael cii.+
23 Sha ayange la, i nengen kwaghwan u Ahitofel+ ér ka kwaghôron u Aôndo u mimi.* Kape kwaghwan u Ahitofel cii gba Davidi man Abesalom kwagh je la.
Ngeren mba shin kpe
^ Hemban je yô, atam a tuur, man alaghga je yô atam a ivilegh kpaa.
^ Ka kwagh u pendan zendenya sha igyundu teman sha mi.
^ Shin “wan u wan.”
^ Shin “or u wan Davidi kwagh.”
^ Shin “wam ase kwagh.”
^ Shin “ya u tor.”
^ Shin “i lu inja er or ngu pinen Aôndo u mimi la kwagh u nana er nahan.”
