U Hiihii u Peteru 5:1-14
5 Sha nahan yô, er mo kpa m lu ortamen, shi yange m nenge atsan a Kristu ya la sha ashe a am, shi mo kpa i lu u me va zua a icivir i a va nenge a mi ken a vese la yô,+ m ngu zamber* a mbatamen mba ve lu ken a ven la mer:
2 Kuran nen ikyumuile i Aôndo+ i̱ i̱ lu sha ikyev yen la, eren nen tom u nengen sha i̱, i̱ de lu inja er i kighir ne a kighir ga, kpa eren nen u a ishima i dedoo sha ishigh ki Aôndo;+ i̱ de lu sha ci u keren mtsera u sha anyighe ga,+ kpa i maa ne iyol u eren nahan;
3 de eren nen tahav sha mba ve lu dyako u Aôndo la ga,+ kpa gema lu nen ikyumuile ikyav.+
4 Nahan zum u orkuran u tamen la+ una va ande yô, ne zua a injar i iengem i been mayange ga la.+
5 Ne agumaior kpaa, wa nen ayol a en sha ikyev i mbatamen.*+ Kpa ne cii haa nen iyolhiden ijime iyol sha gbenda u ne eren kwagh a mbagenev la,* sha ci u Aôndo kôr iyolmoron ihyom, kpa mba ve hiden a iyol ijime yô, tesen ve erdoo u hemban.+
6 Nahan, er uwegh ku Aôndo ku ageegh ku lu sha a ven yô, hide nen a ayol a en ijime, sha er una kende a ven sha, zum u shighe a kuma yô.+
7 Shi gema nen ishimanyian yen cii, haa nen sha a na,+ sha ci u kwagh wen gba un ishima.+
8 Lu nen tsevaa, kuran nen!+ Orhyom wen, Diabolo, ngu zenden er begha u tan kume nahan, keren or u una ya yô.+
9 Kpa hendan nen a na+ sha u nan jighjigh taveraa, fa nen ner anmgbianev enev mba ve lu ken mzough tar sha won cii la* mba yan ican shon ne i môm.+
10 Kpa ne yaan ican sha anshighe kpuaa yô, Aôndo u a tesen erdoo u hemban sha hanma gbenda cii, u a yer ne sha u ne̱ zua a icivir i tsôron+ ken mzough vea Kristu la, un iyol na una tsaase ne una bee. Una na ne tile dông,+ una na ne taver ishima,+ una na ne tenger ga.
11 Agee a̱ za hemen u lun a na gbem sha won. Amen.
12 Ka sha ikyev i Sivanu,*+ u m nenge mer ngu anmgbian u mimi la, m nger ne washika u tiônôô ne sha u taver ne ishima shi eren shiada sha gbashima mer kwagh ne ka erdoo u hemban u Aôndo mimi ye. Tile nen sha mi dông.
13 Kwase* u a lu ken Babilon, u i tsough un er ne nahan la, ngu sughun ne, wan wam Marku+ kpa ngu sughun ne.
14 Sugh nen hanma wen, kuve nen ayol.*
Aôndo a̱ na ne bem, ne mba ne lu ken mzough vea Kristu la cii.
