U Hiihii u Peteru 2:1-25
2 Nahan yô, dugh nen hanma iferkwagh+ man aie man atseregh man iyuhwe man angereke ken a ven kera.
2 Er atumba ka a sar anikyundanev mba forototo nahan,+ ne kpa atumba a wang,* a a lu mkaanem ma Aôndo la, a̱ sar ne tsung, sha er ne vese ne kuma u a yima ne yô,+
3 aluer ne vande benden* nengen er Ter a doo yô.
4 Ior venda un u a lu iwen i uma la,+ kpa Aôndo tsua un, shi a nenge un ér a gba kwagh tsung.+ Er ne lu van hen a na yô,
5 ka ne ne lu awen a uma a i lu maan iyou i ken jijingi a mi ye,+ sha u ne̱ hingir icighannongo u upristi, sha er ne naan iniav mbi ken jijingi+ mbi doon Aôndo ken Yesu Kristu yô.+
6 Gadia i kaa ken Ruamabera ér: “Nenge! M ngu veren iwen ken Shion, iwen i i tsough i yô, ka iwen i injaa i sha zongo i imaagh ki taver, hanma or u nan ne i jighjigh cii yô, nana va ahenge* mayange ga.”+
7 Nahan yô, ngu ne iwen i injaa, sha ci u ne mba mbananjighjigh; kpa hen mba ve ne jighjigh ga yô, ngu “iwen i mbamaankwagh ve vende i la;+ i hingir iwen i hange hange i sha zongo”+
8 man “iwen i nan gbeev mbu nôngon kua vande u tan nguhar ker.”+ Ve mba nôngon gbeev sha ci u ve wa mkaanem ma Aôndo ikyo ga. Ambaaior la cii kape mkur ve una lu je la.
9 Kpa ne yô, ne mba “ior mba i tsough ne yô, ne mba nongo u upristi mba lun ator, icighanikyurior,+ nongoior u Aôndo a tsegha sha ci na iyol na,+ sha u ne̱ yôô aeren a dedoo”*+ a Un u a yer ne ne dugh ken ime ne ve ken iwanger na i doon tsung la.+
10 Gadia yange ne lu a̱ lu nongoior ga, kpa hegen ne mba nongoior u Aôndo;+ yange i lu a̱ zungwe ne mhôônom ga, kpa hegen yô, i zungwe ne mhôônom.+
11 Ne mba doon mo ishima, ne mbavan a va man ushirmbaiorov cii,+ m ngu kaan a ven mer, za nen hemen u palegh asaren a iyolough+ a a lu nôngon ityav a ven la.+
12 Za nen hemen u tesen ieren i dedoo hen atô u akuraior,+ sha er zum u ve kaa ér ne mba mbaeren akaabo kpa, vea nenge a aeren a en a dedoo la sha ashe a ve,+ nahan vea gema a wuese Aôndo sha iyange i una va u sôron ne la yô.
13 Wa nen ayol a en sha ikyev i ior mba i ver ve sha ian i utaha la cii, sha ci u Ter;+ a̱ lu tor kpaa,+ sha ci u nan hemba ne,
14 shin a̱ lu ugomna kpaa, sha ci u ka un a tindi ve ér ve̱ tsahan mbaeren akaabo, kpa ve̱ gema ve̱ wuese mba ve eren akaa a dedoo la ye.+
15 Gadia Aôndo soo ér ne eren kwagh u dedoo, sha er ne cir abumeaior a a ôron abumeakaa sha a ven la zwa* yô.+
16 Ne kera mba ikpan ga,+ yô de kôron nen ave sha* mlu wen u kpan ga la eren nen kwagh u bo ga,+ kpa lu nen ikpan i Aôndo.+
17 Naan nen hanma or cii icivir,+ mzough u anmgbianev cii a̱ doo ne ishima,+ cian nen Aôndo,+ naan nen tor icivir.+
18 Mbatomov ve̱ wa ayol a ve sha ikyev i mbavesen vev, ve̱ cian ve er i doo u a cian ve la cii,+ i̱ de lu mba ve doo inja shi ve fe kwagh la tseegh ga, kpa kua mba ve taver kwagh la kpaa.
19 Gadia aluer or ngu yan ican* shi mba nzughul a nan kpa nan wa ishima her sha er nana lu a imoshima i wang sha ishigh ki Aôndo yô, ka kwagh u dedoo.+
20 Gadia aluer mba gbidyen ne sha ci u ne er isholibo, man ne mba wan ishima yô, ka a inja sha nyi?+ Kpa aluer ne mba wan ishima a ican sha ci u ne er kwagh u dedoo yô, kwagh ne ka kwagh u doon Aôndo.+
21 Jighilii yô, ka kwagh u i yer ne ér ne er je ne, sha ci u Kristu je kpa yange ya ican sha ci wen,+ a ver ne ikyav ér ne dondon angahar a na vough vough.+
22 Yange er ma isholibo ga,+ shi i zua a aie ken zwa na ga.+
23 Zum u i laha un* la,+ a laha mba ve laha un* la ga.+ Zum u lu yan ican la kpaa,+ ta hwa ga, kpa wa iyol na sha ikyev i Un u a ôron ijir+ sha perapera la.
24 Yange tôô asorabo a ase+ sha iyol na zum u i mande un sha kon la,+ sha er se lu kpenegh ken isholibo,* se gema se lu uma ken perapera yô. Man lu “sha avav a na i bee ne angev ye.”+
25 Gadia yange ne lu er iyôngo i i tsum nahan,+ kpa hegen ne hide hen orkuran+ man or u nengen sha uuma enev.
Ngeren mba shin kpe
^ Ka atumba a i nungwa ma kwagh ugen sha mi ga, mngerem kpaa ga je la.
^ Shin “karen.”
^ Zwa Grika, “a hee nan.”
^ Zwa Grika, “uerdoo,” ka aeren a na man ityom na i i kom iwuese la je la.
^ Zwa Grika, “kper sha zwa.”
^ Shin “de yeren nen ken.”
^ Shin “or ngu zungwen; or ngu ken ishimavihin.”
^ Shin “i lam a na caveraa.”
^ Shin “ve lam a na caveraa.”
^ Shin “sha er a bee a isholibo ken a vese kera.”
