U Sha Uhar hen Timoteu 1:1-18
1 Paulu, apostoli u Kristu Yesu, sha ishima i Aôndo, sha kwagh u ityendezwa i uma u ka i zua a mi ken Kristu Yesu la,+
2 ngu ngeren hen Timoteu, wan u doon ishima la ér:+
Aôndo Ter man Kristu Yesu Ter wase ve̱ tese u erdoo u hemban shi ve̱ zungwe u mhôônom shi ve̱ na u bem.
3 M wuese Aôndo, un u m lu eren un icighantom er uter av kpa yange ve eren la, shi m ngu eren u a imoshima i wang, m hôr u eren msen zamber sha ci wou tugh man atetan ga.
4 Er m lu umbur mliam ou yô, sarem tsung u nengen a we, sha er me iv a iember yô.
5 Gadia m ngu umbur er u ne jighjigh i lu sha atseregh ga yô,+ ka jighjigh u nan u ngôu u tamen Loisi man ngôu Yunise yange ve hii lun a mi la; we kpa m ngu a vangertiôr mer u ngu a mi.
6 Sha ityôkyaa ne yô, m ngu umbur we mer, nôngo iyua i Aôndo i yange u zua a mi zum u m penda ave sha a we la+ i̱ seer ken a we er ka a̱ kende usu ve u seer yeghen nahan.
7 Gadia jijingi u Aôndo a ne se la ka u se̱ lu mbaciankwagh ga,+ kpa ka u se̱ lu a tahav+ shi se̱ tesen dooshima shi se̱ eren kwagh sha kwaghfan.*
8 Nahan kunya u de kôron we u eren shiada sha kwagh u Ter,+ shin mo u m lu ken purusu sha kwagh na ne ga, kpa suur sha tahav mbu Aôndo,+ nahan lumun u yan ican+ sha ci u loho u dedoo.
9 A yima se shi a yila se sha u se̱ lu uicighanmbaiorov,+ ka sha ci u ityom i se er la ga, kpa ka sha ci u awashima na kua erdoo na u hemban la.+ I na se kwagh ne ken Kristu Yesu ngise ngise je,
10 kpa i nenge a kwagh ne hegen wang, sha ci u Oryiman wase Kristu Yesu due ken igbar,+ un u a kar a tahav mbu ku u lu a mi kera,+ shi a te iwanger sha kwagh u uma+ man mlu u kpen ga,+ sha loho u dedoo la+
11 u yange i tsuam ér m lu orpasen u man apostoli man ortesen u la.+
12 Ka sha ityôkyaa ne m lu yan ican sha akaa ne kpaa ye,+ kpa kunya kôrom a iyol yam ga.+ Gadia m fa Un u m ne un jighjigh la, shi m ngu a vangertiôr mer una fatyô u kuran akaa a m ne sha ikyev na la zan zan iyange la.+
13 Za hemen u dondon ikyav i kwaghôron u dedoo*+ u yange u ungwa hen a mo la, a jighjigh u nan man dooshima u or ka nana̱ lu ken mzough vea Kristu Yesu ve nan lu a mi la.
14 Kura kwagh u injaa u i we u sha ikyev sha icighan jijingi u a lu ken a vese la.+
15 U fa er nomso mba hen kpentar u Ashia cii+ ve gem ijime a mo yô, kua Fijelu man Hemojini kpaa.
16 Ter a̱ zungwe ya u Onesiforu mhôônom,+ gadia yange a shi taver mo ishima, kunya kôr un a iyol na sha ci u purusu u m nyer ne kpaa ga.
17 Kpa shighe u va ken gar u Roma la, a kerem sha gbashima a va zua a mo.
18 Ter Yehova* ma a zungwe un mhôônom sha iyange la. Shi u fa ityom i yange er sha ci wam ken Efese la cii dedoo.
