U Sha Uhar hen Timoteu 2:1-26
2 Nahan yô wan wam,+ za hemen u zuan a tahav sha erdoo u hemban u Kristu Yesu la;
2 shi akaa a yange u ungwa hen a mo, a ior kpishi ve er shiada sha a la,+ wa sha ikyev i nomso mba lun a mimi iyol, sha er ve kpa vea kuma u tesen mbagenev tsembelee yô.
3 Kegh iyol u yan ican+ sha inja i orshoja u dedoo+ u Kristu Yesu.
4 Orshoja môm nan nyer iyol* ken kpenga u eren* ga, sha er a doo or u a tee nan shoja la a nan yô.
5 Shi ken anumbe a eren je kpa, mba gbe nan hanma or u nan gbe gesa cii iyua ga, saa or u nan gbe gesa shon sha atindi a anumbe shon la.+
6 Ka orsule u nan eren tom kpoghuloo la ka nan hii yan atam a u ye.
7 Henen sha kwagh u m lu ôron ne gbem; Ter una na u fa akaa* cii.
8 Umbur wer yange i nder Yesu Kristu shin ku,+ shi un lu wan* u Davidi,+ er loho u dedoo u m lu pasen ne u tese nahan,+
9 man ka sha ikyaa i loho shon m lu yan ican shi i wuhem ken purusu inja er m ngu iferor nahan ye.+ Nahan kpa, mkaanem ma Aôndo yô, ma uikyangen ga.+
10 Sha ityôkyaa ne yô, m ngu wan ishima a akaa cii her sha ci u mba i tsough ve la,+ sha er ve kpa vea zua a myom u i zuan a mi sha ikyev i Kristu Yesu la, a iengem i tsôron yô.
11 Kwaghôron ne ka u mimi: Aluer se kpe a na imôngo yô, ka keng shi se va lu uma vea na imôngo;+
12 aluer se za hemen u taver ishima yô, shi se va ya tor vea na imôngo;+ aluer se venda un yô, un kpa una venda se;+
13 aluer se mba eren kwagh a na sha mimi ga kpa, un yô, una za hemen u eren kwagh sha mimi her, gadia una fatyô u hendan a iyol na ga.
14 Za hemen u umbur ve akaa ne, waan ve kwagh sha ishigh ki Aôndo ve̱ palegh u gban anyiman sha kwagh u asemberakaa, ieren ne ngi a iwasen sha ma gbenda môm ga, sha ci u ka i vihi* mba ve keghen ato la.
15 Nôngo sha afatyô wou cii eren kwagh u Aôndo una lumun we yô, lu ortom u lun a kwagh môm u yan kunya sha mi ga, u a fe u pasen mkaanem ma mimi tsembelee yô.+
16 Kpa venda akaaôron a gbilinigh, a a hendan a icighankwagh la,+ gadia akaaôron la ka a na or nan gbaan ica a Aôndo nan seer a seer,
17 shi ka a samber er ivav i yan or iyol nahan. Hameneu man Filetu kpa mba ken mba ve samber a akaaôron la yô.+
18 Ior mban undu mimi, mba kaan ér i vande nderen ior shin ku kera,+ shi mba vihin jighjigh u nan u mbagenev.
19 Nahan kpa, imaagh ki taver ki Aôndo a we la ki tile her, i nger sha mi ér, “Yehova* fa mba ve lu mba nav yô,”+ shi, “Hanma or u nan yilan sha iti i Yehova* yô,+ nana̱ venda kwagh u ifer.”
20 Ken zegeya yô, mkam ka ma lu ker ma i er sha zanaria man azurufa tseegh ga, kpa kua ma i er sha ikyon kua sha inya yô, ma gen ka i lu ma eren akaa a icivirigh a mi, ma gen di i lu ma eren akaa a icivirigh ga a mi.
21 Nahan aluer or palegh ikyagh ki i eren akaa a icivirigh ga a mi la yô, nana lu ikyagh ki eren kwagh u icivirigh a mi, ki i tsegh ki, ki lu or u nan lu a ki la a iwasen, i ser ki sha ci u eren hanma tom u dedoo a mi yô.
22 Nahan yevese asaren a agumaior la, gema eren kwagh u perapera shi za hemen u lun a jighjigh u nan shi tesen dooshima shi keren bem, a mba ve yilan sha iti i Ter a ishima i wang la imôngo.
23 Heela tseegh ga, venda anyimanakaa a ibume man a gbilinigh la,+ gadia er u fe nahan, akaa la nga ve a ayôôso.
24 Gadia gba u kpan u Ter nana lu or u nôngon num ga, kpa gba u nana eren kwagh a ior cii kundu kundu,*+ nana kuma u tesen, shi nana kôron iyol tsaha zum u i er nan kwagh u vihin yô,+
25 shi nana kôôm mba ve gbe anyiman la sha ishima i legh legh.+ Tsô alaghga Aôndo una na vea gema ishima, vea hingir u zuan a mfe u vough u mimi la,+
26 nahan vea va mase kaven er ve osough ken kwaghhônon u Diabolo yô, gadia a vande kôron ve sha u ve̱ er ishima na.+
Ngeren mba shin kpe
^ Zwa Grika, “kangen iyol i nan.”
^ Shin a fatyô u kaan ér, “ken akaa a i eren ayange ayange la.”
^ Shin “una na u mkav sha akaa.”
^ Zwa Grika, “vor.”
^ Shin “ka i tim.”
^ Nenge Ngeren u Seer u A5 la.
^ Nenge Ngeren u Seer u A5 la.
^ Shin “sha kwaghfan.”
