27 JANAR 2022 | PËRDITËSUAR MË 29 MAJ 2025
RUSI

PËRDITËSIM—VËLLANË TONË E SHPALLIN FAJTOR | Dy vëllezër ndiejnë dorën e Jehovait dhe ruajnë guximin

LUAJ

Më 27 maj 2025, Gjykata Krahinore e Kirsanovskit në Rajonin e Tambovit shpalli fajtor vëllain Anton Kuzhelkov dhe e dënoi me 6 vjet e gjysmë vënie në provë. Për momentin nuk i kërkohet të futet në burg. Gjithashtu, procesi gjyqësor kundër vëllait Nikolai Prohorov u ndal për shkak të betejës së tij të vazhdueshme me kancerin.

Tabelë kronologjike

21 dhjetor 2020

Kundër Antonit dhe Nikolait ngrihet çështja penale për organizim të veprimtarive të një organizate ekstremiste
24 dhjetor 2020

Hetuesit kontrollojnë 19 vende, ndër to edhe shtëpinë e Antonit. Antonin e çojnë në një vend 350 kilometra larg, për ta marrë në pyetje. Ndërkohë Nikolain e urdhërojnë të mos largohet nga zona, pasi e kishin marrë në pyetje
25 dhjetor 2020

Antonin nuk e lejojnë të kthehet në shtëpi, por e dërgojnë në një qendër paraburgimi
30 gusht 2021

Antonin e transferojnë në një qendër tjetër paraburgimi

Të dhëna

Anton Kuzhelkovi

Lindur: 1993 (Sortavalë, Republika e Karelias)

Biografia: Më i madhi nga dy vëllezërit e tij. Kur ishte fëmijë, i pëlqente peshkimi dhe rrëshqitja në borë. I ati e mësoi të punonte në ndërtim

U pagëzua në vitin 2007 dhe u martua me Aljonën më 2015

Komente personale nga bashkëshortja e Antonit, Aljona a

Cilat sfida ke hasur teksa përpiqeshe të vizitoje Antonin?

Kur na lejonin takime të shkurtra, duhej të shkoja te hetuesi 2 herë në muaj që të merrja leje. Çdo rast ishte tejet stresues. Përveç kësaj, nëse doja të shkoja në qendrën e paraburgimit, fillimisht duhej të kisha një dokument që provonte se isha negative pas testimit për COVID-19. Mirëpo, këto teste janë të kushtueshme.

Tani, të gjitha vizitat i kanë pezulluar dhe kjo është shumë e trishtueshme. Nga ana tjetër kanë nisur seancat e tij gjyqësore dhe më lejojnë të futem në sallën e gjyqit. Por, gjyqi po bëhet në një qytet 100 kilometra larg shtëpisë.

Çfarë po e ndihmon bashkëshortin tënd t’ia dalë mbanë në burg?

Lutjet specifike nga zemra, madje ndonjëherë edhe përgjërimet me lot. Në çdo situatë që po kalon, po sheh dorën e Jehovait. . . . Përpiqet të kënaqet edhe me krijimin. Për shembull, kur del për ecje në oborrin e burgut, shpesh kënaqet duke parë zogjtë. . . . Mediton për mençurinë e Krijuesit dhe për ilustrimin e Jezuit për harabelat. . . . Këto po e ndihmojnë të ruajë gëzimin.

Nikolai Prohorovi

Lindur: 1964 (Morshan, Rajoni i Tambovit)

Biografia: Ka shërbyer në ushtri. I pëlqen noti dhe udhëtimet

U martua me Jelenën më 2008 dhe kanë një djalë e një vajzë. Filloi të studionte Biblën pasi u prek nga sjellja e shkëlqyer e Dëshmitarëve të Jehovait dhe u pagëzua në vitin 2008

Komente personale

Mund të na tregosh një rast specifik kur përjetove ndihmën e Jehovait?

Edhe në momentet [e mia] më sfiduese, Jehovai gjithmonë [më] ka siguruar mbështetjen e tij të fuqishme. . . . Në një rast isha vetëm për vetëm me agjentë të qeverisë, që kishin synim të më bënin bashkëpunëtor me ta ose të paktën të pranoja se kisha «kryer krim». . . . Po rrija ulur e po vrisja mendjen nëse do t’i qëndroja besnik Jehovait apo jo, sepse kisha shumë frikë. Iu luta Jehovait dhe i kërkova të më jepte forcë dhe paqe. Një nga policët më pa me kokën ulur e më pyeti: «Për çfarë po lutesh?» Iu përgjigja: «U luta të mos mëshiroj veten.» Pastaj më erdhi ndër mend Isaia 54:17. Kuptova se s’mund të më bënin asgjë. Aq siguri më dha shkrimi, saqë e vunë re edhe agjentët. Më në fund nuk më kërcënuan më. Madje më kërkuan të mos u mbaja mëri.

Në ç’mënyra të kanë ndihmuar bashkëbesimtarët ty dhe gruan?

Kongregacioni na ka ndihmuar jashtë mase. Edhe pse rrezikonin të tërhiqnin vëmendjen e organeve qeveritare, kjo nuk i pengoi shumë në kongregacion të na kontaktonin. Gjithashtu na kanë telefonuar nga tërë Rusia dhe jashtë saj.

Gjatë kësaj periudhe të vështirë na kanë mbështetur të gjithë. Vinin në seancat gjyqësore që të na jepnin zemër. . . . Kjo shfaqje e dashurisë së sinqertë nga vëllazëria e krishterë, ishte një dëshmi e shkëlqyer për këdo që mori pjesë në gjyq. Nuk diskutohet fare që mbështetja e tyre më ka ndihmuar mua dhe gruan time, të jemi besnikë [gjatë kësaj periudhe të vështirë].

Jemi të sigurt se Jehovai do të vazhdojë t’u japë guxim dhe mbështetje vëllezërve tanë të shtrenjtë që po përndiqen.—Proverbat 1:33.

a Vëlla Kuzhelkovi është në paraburgim në këtë moment. Prandaj ishte e pamundur të siguronim komente nga ai.

Mund të të pëlqejë edhe . . .

LAJME

Burgosen për shkak të besimit—Rusi

Dëshmitarët e Jehovait në Rusi janë burgosur për shkak të besimit. Lexo historinë e tyre dhe shih listën e printueshme ku renditen të gjithë Dëshmitarët që janë në burg në këtë moment.

LAJME