Tene Kurashi Mediante Fe i Temor di Dios

“Sea fuerte i tene kurashi! . . . [Yehova] bo Dios ta ku bo.”—JOSUÉ 1:9.

1, 2. (a) For di un punto di bista humano, kon grandi Israel su chèns di sali viktorioso riba e kananeonan tabata? (b) Ki siguransa Josué a haña?

NA AÑA 1473 promé ku nos era, e nashon di Israel tabata kla pa drenta e Tera Primintí. Relashoná ku e difikultatnan ku nan lo a konfrontá, Moisés a rekordá e pueblo: “Awe bo ta bai krusa Hordan pa drenta i kore ku nashonnan mas grandi i mas poderoso ku bo, statnan grandi ku ta fortifiká te na shelu, un pueblo grandi i haltu, e yu hòmbernan di e anakeonan . . . di kendenan bo a tende bisa: ‘Ken por keda para dilanti di e yu hòmbernan di Anak?’” (Deuteronomio 9:1, 2) Sí, e guereronan gigante ei tabata famoso! Ademas, algun kananeo tabatin ehérsito bon ekipá, ku kabai i garoshi di guera ku tabatin kuchú di heru na nan wil.—Huesnan 4:13.

² Israel, di otro banda, tabata anteriormente un nashon di katibu i a kaba di pasa 40 aña den desierto. Pues, for di un punto di bista humano, nan tabatin masha tiki chèns di sali viktorioso. Sin embargo, Moisés tabatin fe; e por a “mira” Yehova ta guia nan. (Hebreonan 11:27) Moisés a bisa e pueblo: “SEÑOR bo Dios ta Esun ku ta krusa bo dilanti . . . E lo destruí nan i e lo someté nan bo dilanti.” (Deuteronomio 9:3; Salmo 33:16, 17) Despues di Moisés su morto, Yehova a sigurá Josué ku e tabatin Su apoyo, bisando: “Lant’ariba awor, krusa e Hordan aki, abo i henter e pueblo aki, bai na e tera ku mi ta duna nan—e yunan di Israel. Ningun hende lo no por para bo dilanti tur e dianan di bo bida. Meskos ku mi tabata ku Moisés, asina lo mi ta ku bo.”—Josué 1:2, 5.

3. Kiko a kontribuí na Josué su fe i kurashi?

³ Pa Josué por tabatin Yehova su sosten i guia, e mester a lesa i meditá riba e Lei di Dios i aplik’é den su bida. Yehova a bis’é: “E ora ei lo bo hasi bo kaminda prosperá, i e ora ei lo bo tin éksito. No ta ami a ordená bo? Sea fuerte i tene kurashi! No tembla ni desmayá, pasobra SEÑOR bo Dios ta ku bo unda ku bo bai.” (Josué 1:8, 9) Josué a skucha Dios, i esei a dun’é kurashi i el a resultá di ta fuerte i eksitoso. Sin embargo, mayoria hende di su generashon no a skucha. Komo resultado, nan no tabatin éksito i nan a muri den desierto.

Un Pueblo sin Fe i sin Kurashi

4, 5. (a) Ki diferensia tabatin entre e aktitut di e dies spionnan i e aktitut di Josué i Kalèb? (b) Kon Yehova a reakshoná riba e pueblo su falta di fe?

⁴ Kuarenta aña promé, ora ku Israel a yega serka di Kánaan pa promé biaha, Moisés a manda 12 hòmber bai spioná e pais. Dies a bin bèk morto spantá. Nan a sklama: “Henter e pueblo ku nos a mira einan ta hòmbernan di gran estatura. Tambe nos a mira gigantenan ayanan (e yu hòmbernan di Anak ta bin for di e gigantenan); i nos a bira manera tirakochi den nos mes bista.” Ta “henter e pueblo” tabata gigante? Nò, e anakeonan so. Akaso e anakeonan tabata desendiente di e gigantenan ku a biba promé ku Diluvio? Klaru ku nò! Pero tòg, dor di e deklarashonnan eksagerá aki di e spionnan, miedu a plama den henter e kampamentu. E pueblo kier a asta bai Egipto bèk, e pais di nan sklabitut!—Numbernan 13:31–14:4.

⁵ Sin embargo dos di e spionnan, Josué i Kalèb, tabata ansioso pa drenta e Tera Primintí.  Nan di: ‘E kananeonan ta manera pan pa nos. Nan protekshon a wòrdu kitá for di nan, i Yehova ta ku nos; no tene miedu di nan.’ (Numbernan 14:9) Akaso Josué i Kalèb tabata optimista sin ningun base? Definitivamente ku nò! Huntu ku e restu di e nashon, nan a mira kon Yehova pa medio di e Dies Plaganan a humiá e poderoso nashon di Egipto i su diosnan. Despues nan a mira Yehova hoga Fárao i su ehérsito militar den Laman Kòrá. (Salmo 136:15) Ta bisto anto ku no tabatin èksküs pa e miedu ku e dies spionnan i esnan influensiá dor di nan a desplegá. Yehova a sinti su mes hopi ofendí i a ekspresá esei bisando: “Kuantu tempu mas nan lo no kere den mi, apesar di tur e señalnan ku mi a hasi meimei di nan?”—Numbernan 14:11.

6. Den ki manera kurashi ta ligá ku fe, i kon nos por mira esei den e tempu aki?

⁶ Yehova a bai stret na e rais di e problema: e aktitut kobarde di e pueblo a revelá nan falta di fe. Sí, fe i kurashi ta estrechamente ligá ku otro. Nan ta asina ligá ku otro ku apòstel Juan por a skirbi relashoná ku e kongregashon kristian i e guera spiritual ku e tin: “Esaki ta e viktoria ku a vense mundu—nos fe.” (1 Juan 5:4) Awe, fe manera esun di Josué i Kalèb a pone ku e bon nobo di Reino ta ser prediká rònt mundu pa mas ku seis mion Testigu di Yehova, hóben i bieu, físikamente fuerte i físikamente suak. Ningun enemigu no a logra silensiá e ehérsito poderoso i yen di kurashi aki.—Romanonan 8:31.

No “Hal’atras”

7. Kiko “hal’atras” ta nifiká?

⁷ Yehova su sirbidónan djawe ku kurashi ta prediká e bon nobo pasobra nan ta di mesun opinion ku apòstel Pablo, kende a skirbi: “Nos no ta di esnan ku ta hal’atras pa destrukshon, sino di esnan ku tin fe pa preservashon di e alma.” (Hebreonan 10:39) E ekspreshon “hal’atras” ku Pablo a menshoná, no ta nifiká hal’atras djis debí na un sintimentu temporal di miedu, ya ku hopi sirbidó fiel di Dios tabatin miedu na sierto okashonnan. (1 Samuel 21:12; 1 Reinan 19:1-4) Mas bien, manera un dikshonario bíbliko ta splika, e ke men “retirá, sali afó,” “neglishá di tene na e bèrdat.” E dikshonario ta agregá ku “hal’atras” por ta basá riba e idea di ‘baha bela di un boto i asina redusí su velosidat.’ Pues e por referí na bai mas sosegá den Dios su sirbishi. Klaru ku personanan ku tin un fe fuerte no ta pensa mes di ‘bai mas sosegá’ ora ku difikultat surgi, sea ku ta persekushon, malesa òf kualke otro prueba. Mas bien, nan ta sigui padilanti den Yehova su sirbishi, sabiendo ku e ta profundamente interesá den nan i sa nan limitashonnan. (Salmo 55:22; 103:14) Abo tin e klase di fe ei?

8, 9. (a) Kon Yehova a fortifiká e fe di e kristiannan di promé? (b) Kiko nos por hasi pa fortifiká nos fe?

 ⁸ Na un okashon e apòstelnan a sinti ku nan tabata falta fe, p’esei nan a bisa Hesus: “Oumentá nos fe!” (Lukas 17:5) Nan a haña kontesta riba nan petishon sinsero, foral na Pentekòste di aña 33 di nos era, ora ku e spiritu santu primintí a bin riba e disipelnan i a duna nan un komprondementu mas profundo di Dios su Palabra i propósito. (Juan 14:26; Echonan 2:1-4) Ku nan fe fortifiká, e disipelnan a start ku un kampaña di prediká ku a hiba e bon nobo na “henter kreashon bou di shelu,” apesar di oposishon.—Kolosensenan 1:23; Echonan 1:8; 28:22.

⁹ Pa nos por fortifiká nos fe i sigui padilanti den nos ministerio, nos tambe tin ku studia i meditá riba e Skritura i pidi den orashon pa haña spiritu santu. Ta solamente dor di graba Dios su bèrdat den nos mente i kurason—manera Josué, Kalèb i e disipelnan kristian di promé a hasi—nos lo tin e fe ku ta duna nos e kurashi nesesario pa perseverá den nos guera spiritual i sali viktorioso.—Romanonan 10:17.

Fe Ta Mas ku Djis Kere

10. Kiko berdadero fe ta enserá?

¹⁰ Manera personanan fiel den tempu bíbliko a demostrá, fe ku ta hiba na kurashi i perseveransia ta enserá mas ku djis kere den Dios. (Santiago 2:19) E ta rekerí pa nos siña konosé Yehova su personalidat i tene pleno konfiansa den dje. (Salmo 78:5-8; Proverbionan 3:5, 6) E ta nifiká kere ku henter nos kurason ku loke mas ta kumbiní nos ta di hasi kaso di Dios su lei- i prinsipionan. (Isaias 48:17, 18) Tambe fe ta enserá tene pleno konfiansa ku Yehova lo kumpli ku tur su promesanan i ta bira “Esun ku ta rekompensá esnan ku ta busk’é.”—Hebreonan 11:1, 6; Isaias 55:11.

11. Den ki manera Josué i Kalèb a ser bendishoná pa nan fe i kurashi?

¹¹ Berdadero fe ta krese. E ta krese segun ku nos ta apliká e bèrdat den nos bida, ta “purba” e benefisionan, ta “mira” kontesta riba nos orashonnan i den otro maneranan mas ta sinti Yehova su guia den nos bida. (Salmo 34:8; 1 Juan 5:14, 15) Nos por tin sigur ku e fe di Josué i Kalèb a bira mas profundo segun ku nan a purba òf eksperensiá Dios su bondat. (Josué 23:14) Pensa riba e puntonan aki: Nan a sobrebibí e biahe trabahoso di 40 aña dor di desierto, manera Dios a primintí ku lo sosodé. (Numbernan 14:27-30; 32:11, 12) Nan por a partisipá aktivamente den e konkista di Kánaan ku a dura seis aña. Finalmente, nan a disfrutá  di bida largu i bon salú i asta a haña un herensia personal. Wak kon Yehova ta rekompensá esnan ku sirbié fielmente i ku kurashi!—Josué 14:6, 9-14; 19:49, 50; 24:29.

12. Kon Yehova ta ‘engrandesé su palabra’?

¹² Dios su bondat amoroso ku el a demostrá na Josué i Kalèb ta pone nos kòrda e palabranan di e salmista: “Bo a engrandesé bo palabra riba henter bo nòmber.” (Salmo 138:2) Ora Yehova usa su nòmber pa garantisá un promesa, e kumplimentu di e promesa ei ta ser “engrandesé” den e sentido ku lo e surpasá tur ekspektativa. (Efesionan 3:20) Sí, Yehova nunka ta desapuntá esnan ku ‘deleitá nan mes’ den dje.—Salmo 37:3, 4.

Un Hòmber Ku A “Agradá Dios”

13, 14. Dikon Enok tabatin mester di fe i kurashi?

¹³ Nos por siña hopi kos tokante fe i kurashi dor di konsiderá e ehèmpel di un otro testigu prekristian, esta, Enok. Probablemente Enok tabata sa, asta promé ku el a kuminsá profetisá, ku su fe i kurashi lo ser poné na prueba. Kon bin e tabata sa? Pasobra Yehova a deklará den Edén ku lo tin enemistat, òf odio, entre esnan ku ta sirbi Dios i esnan ku ta sirbi Satanas e Diabel. (Génesis 3:15) Tambe Enok tabata sa ku e odio aki a kuminsá for di prinsipio di historia humano ora ku Kain a asesiná su ruman hòmber Abel. De echo nan tata, Adam, a biba kasi 310 aña mas despues ku Enok a nase.—Génesis 5:3-18.

¹⁴ Sin embargo, apesar di e echonan aki, Enok ku kurashi a sigui ‘kana ku Dios’ i a kondená “e kosnan duru” òf ofensivo ku hende tabata bisa kontra Yehova. (Génesis 5:22; Hudas 14, 15) E posishon sin miedu aki na fabor di adorashon berdadero aparentemente a pone Enok haña hopi enemigu, i su bida a kuminsá kore peliger. Den e kaso aki, Yehova a spar e profeta di e agonia di morto. Despues di revelá na Enok ku “e tabata agradá Dios,” Yehova a “traslad’é” for di bida pa morto, kisas durante un trans profétiko.—Hebreonan 11:5, 13; Génesis 5:24.

15. Ki ekselente ehèmpel Enok a pone pa sirbidónan di Yehova djawe?

¹⁵ Inmediatamente despues di a menshoná ku Enok a ser trasladá, Pablo a bolbe enfatisá e importansia di fe, bisando: “I sin fe ta imposibel pa agradá [Dios].” (Hebreonan 11:6) Sí, ta fe a duna Enok e kurashi pa kana ku Yehova i proklamá Su mensahenan di huisio den un mundu ku no tabata kere den Dios. Den esaki, Enok a pone un ekselente ehèmpel pa nos. Nos tambe tin un trabou paresido pa hasi den un mundu ku ta kontra di adorashon berdadero i ku ta yená ku tur sorto di maldat.—Salmo 92:7; Mateo 24:14; Revelashon 12:17.

Kurashi Ku Ta Bin di Temor di Dios

16, 17. Ken Abdias tabata, i den ki sirkunstansia el a haña su mes?

¹⁶ Fuera di fe, tin un kualidat mas ku ta produsí kurashi. Esei ta temor respetuoso di Dios. Laga nos konsiderá un ehèmpel sobresaliente di un hòmber temeroso di Dios ku a biba den tempu di profeta Elias i Rei Akab. Akab tabata goberná e reino di nort di Israel i durante su reinado, adorashon di Baal a korumpí e reino ei na un eskala sin presedente. De echo, 450 profeta di Baal i 400 profeta di Asera (e palu sagrado, un símbolo di e órgano  seksual maskulino), tabata ‘kome na mesa di Jezabel,’ esposa di Akab.—1 Reinan 16:30-33; 18:19.

¹⁷ Jezabel tabata un enemigu kruel di Yehova, i el a purba kaba ku adorashon berdadero for di e pais. El a asesiná algun profeta di Yehova i asta a purba mata Elias, kende a skapa riba instrukshon di Dios dor di hui bai na otro banda di Riu Hordan. (1 Reinan 17:1-3; 18:13) Bo por imaginá kon difísil lo tabata den e tempu ei pa sostené adorashon berdadero den e reino di nort? Pió ainda, kiko si bo tabata traha den e palasio di rei? Esei tabata e situashon den kua Abdias, * un hòmber temeroso di Dios ku a fungi komo mayordomo di e kas di Akab, a haña su mes.—1 Reinan 18:3.

18. Kiko a hasi Abdias eksepshonal komo un adoradó di Yehova?

¹⁸ Abdias indudablemente tabata kouteloso i a la bes diskreto den su adorashon di Yehova. Pero asina mes, e no a komprometé su fe. De echo, 1 Reinan 18:3 ta bisa nos: ‘Abdias tabatin gran temor pa Yehova.’ Sí, Abdias su temor di Dios tabata eksepshonal! E temor saludabel aki en buèlta a dun’é un kurashi ekstraordinario, manera a keda demostrá djis despues ku Jezabel a asesiná e profetanan di Yehova.

19. Kiko Abdias a hasi ku a demostrá su kurashi?

¹⁹ Nos ta lesa: “A sosodé ku dia Jezabel a destruí e profetanan di SEÑOR, Abdias a kohe shen profeta i a skonde nan na sinkuenta-sinkuenta den un kueba, i a proveé pan i awa pa nan.” (1 Reinan 18:4) Manera bo por imaginá, tabata un tarea hopi peligroso pa sekretamente alimentá shen hòmber. Abdias no solamente mester a sòru pa Akab i Jezabel no gar’é sino tambe e mester a sòru pa e 850 profetanan falsu ku tabata frekuentá e palasio no deskubrié. Fuera di esei, tabatin kantidat di otro adoradó di dios falsu den e pais, for di kampesino te prens, ku sin duda lo a probechá di kualke oportunidat pa desenmaskará Abdias i asina haña fabor serka rei i lareina. Sin embargo, bou di nanishi di tur e adoradónan di ídolo ei, Abdias ku kurashi a perkurá pa e nesesidatnan di e profetanan di Yehova. Esta un kurashi e temor di Dios por duna un hende!

20. Kon Abdias su temor di Dios a yud’é, i kon su ehèmpel ta yuda abo?

²⁰ Komo ku Abdias a demostrá kurashi mediante temor di Dios, Yehova evidentemente a proteh’é for di su enemigunan. Proverbionan 29:25 [NW] ta bisa: “Temblamentu pa motibu di hende, esei ta pone un trampa, pero esun ku ta konfia den Yehova lo ser protehá.” Abdias no tabata ‘superman’; e tabatin miedu di ser gará i matá, meskos ku nos tambe lo tabatin miedu. (1 Reinan 18:7-9, 12) Sin embargo, temor di Dios a dun’é e kurashi pa vense kualke miedu di hende ku lo e por tabatin. Abdias ta un ekselente ehèmpel pa nos tur, spesialmente pa esnan ku ta adorá Yehova maske nan ta kore e riesgo di pèrdè nan libertat òf asta nan bida. (Mateo 24:9) Sí, laga nos tur hasi esfuerso pa sirbi Yehova “ku reverensia i temor.”—Hebreonan 12:28.

21. Kiko nos lo konsiderá den e siguiente artíkulo?

²¹ Fe i temor di Dios no ta e úniko kualidatnan ku ta produsí kurashi; amor por ta un motivashon asta mas grandi. Pablo a skirbi: “Dios no a duna nos un spiritu di temor [òf, “kobardia,” NW], sino di poder i di amor i di sano huisio.” (2 Timoteo 1:7) Den e siguiente artíkulo, nos lo mira kon amor por yuda nos sirbi Yehova ku kurashi durante e último dianan trabahoso aki.—2 Timoteo 3:1.

[Nota]

Bo Por Kontestá Esaki?

• Kiko a kontribuí na e kurashi di Josué i Kalèb?

• Kiko berdadero fe ta enserá?

• Dikon Enok no tabatin miedu di proklamá Dios su mensahe di huisio?

• Kon temor di Dios ta kontribuí na kurashi?

[Preguntanan di Estudio]

[Plachi na página 17]

Yehova a ordená Josué: “Sea fuerte i tene kurashi”

[Plachi na página 18]

Abdias a kuida i protehá Dios su profetanan

[Plachi na página 19]

Ku kurashi Enok a papia e palabra di Dios