Echonan (Loke e Apòstelnan A Hasi) 1:1-26
1 Kerido Teófilo, den e promé relato ku mi a skirbi, mi a konta bo tur loke Hesus a hasi i loke el a siña hende+
2 te dia ku Dios a tum’é den shelu.+ El a ser tumá den shelu despues ku el a duna e apòstelnan* ku el a skohe+ instrukshon. El a duna nan e instrukshonnan ei pa medio di spiritu santu.
3 Despues ku el a sufri te na morto, el a duna nan hopi prueba pa mustra bon kla ku e tabata na bida.+ Nan a mir’é durante 40 dia, i e tabata papia ku nan tokante e Reino di Dios.+
4 Ora e tabata huntu ku nan, el a duna nan e siguiente òrdu: “No bai for di Herúsalèm.+ Sigui warda riba loke mi Tata a primintí,+ sí, loke mi a papia di dje ku boso.
5 Pasobra Huan a batisá hende ku awa, pero aki poko dia, boso lo ser batisá ku spiritu santu.”+
6 Ora nan a bolbe reuní huntu, nan a puntr’é: “Señor, ta aworakí lo bo bolbe establesé* e reino na Israel?”+
7 El a kontestá nan: “Boso no tin nodi di sa e tempu ni e temporada.* Ta mi Tata so tin outoridat pa determiná esei.+
8 Pero boso lo risibí poder ora spiritu santu* baha riba boso.+ I boso lo ta mi testigunan+ na Herúsalèm,+ na henter Hudea i Samaria,+ i te na e partinan di mas leu di tera.”+
9 Ora el a kaba di bisa e kosnan ei, el a subi bai shelu miéntras ku nan tabata wak e. Un nubia a tap’é, i nan no por a mir’é mas.+
10 Nan a keda wak na laira miéntras ku e tabata subi bai shelu. Diripiente, tabatin dos hòmber bistí na blanku+ pará banda di nan.
11 E hòmbernan a bisa nan: “Hòmbernan di Galilea, pakiko boso ta para wak shelu? Hesus, kende tabata ku boso i ku Dios a tuma den shelu, lo bolbe* di mesun manera ku boso a mir’é bai shelu.”
12 Anto nan a bai for di Seru di Oleifi, i nan a bolbe Herúsalèm.+ Seru di Oleifi no tabata keda masha leu di Herúsalèm; e tabata na un distansia ku hende tabatin mag di biaha riba dia di sabat.*
13 Ora nan a yega, nan a subi bai den e kamber ariba di e kas kaminda nan tabata keda. E hendenan einan tabata: Pedro, Huan, Santiago, Andres, Felipe, Tomas, Bartolomeo, Mateo, Santiago (yu di Alfeo), Simon (ku hende tabata yama “Entusiasmá”*) i Húdas* (yu di Santiago).+
14 Nan tabata uní, i nan tur huntu a sigui hasi hopi orashon den e dianan ei. Nan tabata huntu ku algun hende muhé,+ ku e ruman hòmbernan di Hesus i ku Maria, mama di Hesus.+
15 Un di e dianan ei, Pedro a lanta para meimei di e rumannan. (Nan tabata un grupo di mas o ménos 120 hende.) El a bisa nan:
16 “Ruman hòmbernan, spiritu santu a profetisá pa medio di David tokante Húdas,+ i tabata nesesario pa e palabranan ei di Skritura kumpli. Húdas tabata esun na kabes di e hendenan ku a arestá Hesus.+
17 Húdas tabata un di nos,+ i el a sirbi huntu ku nos.
18 (E hòmber ei a kumpra un tereno ku e pago ku el a haña pa su maldat.+ El a kai riba su kabes, i su barika a baster i tur su shirishirinan a bini afó.+
19 Tur e habitantenan di Herúsalèm a haña sa loke a pasa. P’esei, nan a yama e tereno ei Akeldama, ku na nan idioma ta nifiká, “tereno di sanger.”)
20 Pues, den e buki Salmo ta pará skirbí: ‘Laga su lugá di biba bira desolá, i no laga niun hende biba den dje,’+ i tambe: ‘Laga un otro hende tuma su responsabilidatnan.’*+
21 P’esei, mester remplasá Húdas ku un di e hòmbernan ku a kompañá nos durante tur e tempu ku Señor Hesus tabata huntu ku nos.*
22 Mester ta un hòmber ku a kuminsá anda ku nos for di dia ku Huan a batisá Hesus+ te dia ku Dios a tuma Hesus den shelu.+ E hòmber ei lo duna testimonio* huntu ku nos di Hesus su resurekshon.”+
23 Pues, e disipelnan a sugerí dos hòmber: Hose, ku nan tabata yama Bársabas (konosí tambe komo Hustu), i Matías.
24 Anto nan a pidi den orashon: “O Yehova,* abo ku sa kiko tin den kurason di tur hende,+ por fabor, indiká kua di e dos hòmbernan akí bo a skohe
25 pa bira apòstel* na lugá di Húdas. Pasobra Húdas a bandoná su asignashon pa hasi loke e tabata ke.”+
26 Pues, nan a tira lòt,+ i e lòt a kai na fabor di Matías. I nan a agreg’é na* e grupo di 11 apòstel.
Nota
^ Òf: “lo bo bai restorá.”
^ Òf: “e dianan stipulá.”
^ Lit.: “lo bini.”
^ Òf: “Zeloso; Diligente.”
^ Yamá tambe Tadeo.
^ Òf: “su tarea komo superintendente.”
^ Lit.: “tabata drenta i sali entre nos.”
^ Lit.: “lo ta testigu.”
^ Lit.: “pa risibí e sirbishi i puesto di apòstel.”
^ Òf: “a kont’é huntu ku.” Es desir, nan a konsider’é meskos ku e otro 11 apòstelnan.
