Say akasulat ed Deuteronomio 22:25-27 et aliwan nipaakar ed pamaneknek no kasin nankasalanan so laki, ta malinew la ya kasalanan to. Sayan ganggan et akapokus ed pamaneknek ya anggapoy kasalanan na bii. Imanoen tayoy konteksto.

Atukoy diad saray akaunan bersikulo so sakey a lakin akiakdol ed bii ya akisipanan lan miasawa “diad syudad.” Lapud satan ya ginawa to et sikatoy nankasalanan na pikakalugoran, ta samay bii et ipapasen lan wala lay asawa to. Samay bii ey? “Ag-inmeyag ed syudad imay bii.” No inmeyag komon, walay akarengel ed sikato tan inyagel da. Balet ag-inmeyag. Kanian nibagan sikatoy akikalugoran met, tan pareho ran apaneknekan ya nankasalanan.​—Deu. 22:23, 24.

Say onsublay ya nabasa ed Ganggan et duma lan situasyon: “Balet no samay laki et nabet tod uma imay bii ya akisipanan lan miasawa, tan sikatoy pinuersa na samay laki ya akdolan, nepeg ya ompatey a bukor imay laki ya akiakdol ed sikato, tan anggapoy nepeg yon gawaen ed samay bii, ta agnanggaway kasalanan a makanepegan na ipapatey. Mipara iya ed kaso na sakey a toon angabil ed kapara ton too tan pinatey to. Ta diad uma so akaabetan tod sikato, tan inmeyag so biin akisipanan a miasawa, balet anggapoy angiyagel ed sikato.”​—Deu. 22:25-27.

Diad satan ya kaso et anisiaan na saray ukom so imbaga na bii. Akin ey? Impasen dan “inmeyag so biin akisipanan a miasawa, balet anggapoy angiyagel ed sikato.” Kanian sikatoy ag-akikalugoran. Balet samay laki et nankasalanan na rape tan pikakalugoran lapud ‘pinuersa to ya akdolan’ imay bii ya akisipanan lan miasawa.

Kanian anggano akapokus iyan ganggan ed pamaneknek ya anggapoy kasalanan na samay bii, duga so impangibaga na salaysay ya say laki et nankasalanan na rape tan pikakalugoran. Makapanmatalek tayo ya saray ukom et ‘imbestigaan da itan a maong’ tan say desisyon da et ibase da ed estandarte ya malinlinew ya inter na Dios tan aminpiga ton inulit.​—Deu. 13:14; 17:4; Exo. 20:14.