Sano Permanente Lan Naekal so Panagbusol!
Anggano naekal tayod puso tayo so panagbusol, agtayo nakontrol so kagagawa tan ugali na arum. Siansia nin wala ray inosentin totoo ya bubusolen. Kanian, antoy permanentin solusyon ed sayan problema?
Si Jehova a Dios labat so permanentin makapangitunda ed pambubusolan. Atan a mismo so impromisa na Biblia ya gawaen to.—Proverbio 20:22.
EKALEN NA DIOS SO PANLALAPUAN NA PANAGBUSOL
-
1. SATANAS YA DIABLO. Si Satanas, say rebelden anghel, so panlalapuan na pambubusolan ya nanenengneng tayo natan. Deralen na Dios si Satanas tan amin ya mangaalig ed sikato.—Salmo 37:38; Roma 16:20.
-
2. MAUGES A MUNDO YA IIMPLUENSYAAN NEN SATANAS. Ekalen na Dios so amin ya mansusugsog na panagbusol, kaiba la ray kurakot ya politiko tan lider na relihyon. Ekalen met na Dios iray masaol, kurakot, tan mapagsamantala ya negosyante.—2 Pedro 3:13.
-
3. AG-INKAPERPEKTO NA TOO. Ipapaliwawa na Biblia ya amin ya totoo et akatawir na ag-inkaperpekto. Kanian walay tendensia ran manisip, makalikna, tan manggaway aliwa. (Roma 5:12) Lapud satan ya makasalanan ya tendensia, mainomay na sakey so nasakitan tan busolen so arum. Sarasarag itayon tulongan na Dios ya nalabanan itan ya kakapuyan pian permanente lan naekal so panagbusol.—Isaias 54:13.
IMPROMISA NA BIBLIA YA NAEKAL SO PAMBUBUSOLAN ED MUNDO
-
1. HUSTISYA. Say mundo et uleyan na Panarian na Dios, sakey ya patas tan permanente ya gobierno ya manuley manlapud tawen. (Daniel 2:44) Diad satan, anggapo lay diskriminasyon tan aliwliwan panagtrato. Ipetek na Dios so amin ya ag-inkahustisya ya naeeksperiensya na totoo natan.—Lucas 18:7.
-
2. KAREENAN. Anggapo lay manirap lapud inkaruksa odino guerra. (Salmo 46:9) Safe lan panayaman na mareen ya totoo so mundo.—Salmo 72:7.
-
3. MAINAWA TAN ANGGAPOY ANGGAAN A BILAY. Diad satan, talagan manaaroan la so amin ya totoo. (Mateo 22:39) Anggapo la ray na-stress, tan anggapo met la ray manermen lapud aliwliwan apalabas. (Isaias 65:17) Lapud anggapo lay panagbusol, saray totoo et “manliket [ya] maong ed agnaparaan a kareenan.”—Salmo 37:11.
Labay moy manayam ed ontan ya klase na mundo? Natan ni labat et dakel lan totoo so makakaaral ya ekalen so pambusol ed puso ra ta uunoren da ray prinsipyo na Biblia. (Salmo 37:8) Ontan so gagawaen na minilyon ya Tasi nen Jehova diad interon mundo. Anggano nanduruma so lahi tan kultura da, singa ra mankakapamilya ya manaaroan tan mankakasakey.—Isaias 2:2-4.
Labalabay na Saray Tasi nen Jehova ya ipaamta so nanaaralan da, no panon dan asarag so aliwan patas ya panagtrato tan diskriminasyon. Makatulong ed sika so naaralan mo pian kalkalnam ya naekal so pambusol ed pusom tan nasalatan na panangaro. Naamtaan mo met no panon ya maaron tratoen so amin ya totoo—anggan saramay agda amtay misalamat odino mamubusol ed sika. Say resulta, magmaliw kan maliket natan tan ombalibali so relasyon mod arum. Say sankaimportantian ed amin, naaralan mo no antoy gawaen mo pian makapambilay ka diad Panarian na Dios sano permanente lan naekal so pambubusolan.—Salmo 37:29.
^ par. 15 Available ed arum ya lenguahe.
Ompan Nagustoan Mo Met
SAY PANAG-BANTAYAN
Antoy Gawaen na Panarian na Dios?
Amta nen Jesus ya say Panarian na Dios labat so gobierno ya manresolbe ed saray problema diad dalin. Anto lay agawaan na Panarian pian pantiwalaan tayo itan?
ONLIING!
Diskriminasyon—Say Permanentin Tambal
Anto ray apatiran gawaen na Panarian na Dios pian natambal so sakit ya diskriminasyon o panangidumaduma?
