“Kaunoran, agagi, amin a bengatlan tua, amin a bengatlan importante, amin a bengatlan matunong, amin a bengatlan malinis, amin a bengatlan managyat na panangaro, amin a bengatlan positibo, amin a bengatlan maong, tan amin a bengatlan makapadinayew, itultuloy yo irayan nodnonoten.”—Filipos 4:8, Balon Mundo a Patalos.

 “Kaunoran, agagi, ganagana ’ray bengatlan matua, ganagana ’ray bengatlan gagalangen, ganagana ’ray bengatlan matunong, ganagana ’ray bengatlan malinew, ganagana ’ray bengatlan nababalita a maong: no wala so antokaman a kasimpitan, no wala so antokaman a daydayewen, morekdek yo so sarayan bengatla.”—Filipos 4:8, Say Biblia.

 Interesado so Dios ed nononoten na totoo, lalo la ta walay epekto na saray nononoten tayo ed saray gagawaen tayo. (Salmo 19:14; Marcos 7:20-23) Kanian saramay labay dan napaliket so Dios et agda labay so mannonot na mauges, imbes say nononoten da et saramay labay to.

 Diad sayan bersikulo, walay waloran klase na maong a bengatla ya nepeg ya ‘tuloytuloy ya nodnonoten’ na saray Kristiano.

•   “Tua.” Idedeskribe na sayan salita iray bengatlan maong tan napantiwalaan, singa saray impormasyon ya nabasa ed Salita na Dios, say Biblia.—1 Timoteo 6:20.

•   “Importante.” Ontutukoy iyan salita ed saray bengatlan talagan importante. Seryoso iratan, aliwa iratan ya ataptapew. No atan so nonoten na saray Kristiano, mas determinado dan gawaen so duga.—Tito 2:6-8.

•   “Matunong.” Ontutukoy iyan salita ed saray plano tan kagagawa ya akabase ed estandarte na Dios aliwan diad limitadon karunongan na too.—Proverbio 3:5, 6; 14:12.

•   “Malinis.” Ipapasabi na sayan salita so ideya ya nepeg ya malinis tan masanto iray iisipen tan motibo tayo, aliwa labat ya diad seksual, noagta diad amin a bengatla.—2 Corinto 11:3.

•   “Managyat na panangaro.” Ontutukoy iyan balikas ed saray bengatlan makapaliket, kanian nalikna tayoy panangaro imbes ya pambusol, sanok, odino agpantatalosan.—1 Pedro 4:8.

•   “Positibo.” Ontutukoy iyan salita ed saray bengatlan mangiter na maong ya reputasyon ed sakey ya too, kanian sikatoy respetoen met na saray manrerespeto ed Dios.—Proverbio 22:1.

•   “Maong.” Ontutukoy iyan salita ed saray ugalin sankaabigan base ed atagey ya estandarte na Dios. Anggapoy nibagan makapuy ed amin ya anggulo.—2 Pedro 1:5, 9.

•   “Makapadinayew.” Ontutukoy iyan salita ed saray ugalin makanepegan na komendasyon, lalo lad pakanengneng na Dios. Ontutukoy met iya ed saray makapadinayew ya gagawaen na Dios, ya importantin nodnonoten na saray totoo.—Salmo 78:4.

 Aka-house arrest si apostol Pablo nen sinulatan to ray Kristiano ed Filipos. Anggaman ontan, deneskribe na saray komentarista na Biblia so sulat to bilang “maliket a sulat” lapud maliket so paraan na impansalita to tan dakel so inusar ton salita ya mangipapanengneng ya papablien tan inar-aro to ra.—Filipos 1:3, 4, 7, 8, 18; 3:1; 4:1, 4, 10.

 Inar-aro nen Pablo iray agagi to ed Filipos, tan labay ton nalikna da met so liket tan kareenan ya nalilikna to. (Filipos 2:17, 18) Kanian diad sampot ya parte na sulat to et pinaseseg to ran magmaliw ya maliket, makatunongan, naynay ya mantiwala ed Dios panamegley na pikakasi, tan manpokus ed saray bengatlan mamapawalay mareen ya liknaan tan mareen ya relasyon ed Dios.—Filipos 4:4-9.

 Bantayan iyan antikey ya video pian nawalaan kay ideya ed libro na Filipos.