Maan-y y sẽn tõe fãa n kɩt tɩ y kãadmã tall pãnga
Maan-y y sẽn tõe fãa n kɩt tɩ y kãadmã tall pãnga
“Neb nins sẽn kẽ kãadmã, mam kõta yãmb tõ-kãnga, la a ka mam tõog ye, yaa Zusoabã tõogo.”—1 KOR. 7:10.
Y TÕE N WILGA A VÕOR BƖ?
Biiblã sẽn yeel tɩ pag ne rao sã n kẽ kãadem, Wẽnnaam n lagem-b ne taabã rat n yeelame tɩ bõe?
Wãn to la kãsem-dãmbã tõe n sõng kiris-neb sẽn tar zu-loees b kãadem pʋgẽ?
Tags-bʋg la d segd n tall kãadmã zugu?
1. Wãn to la kiris-nebã get kãadmã, la bõe yĩnga?
KIRIS-NEB sã n kẽ kãadem, b pʋlma taab Wẽnnaam taoore, tɩ pa reem bũmb ye. (Koɛ. 5:3-5) A Zeova sẽn yaa kãadmã Lugundã yĩnga, neb a yiib sã n kẽ kãadem, yaa yẽ n ‘lagem-b ne taaba.’ (Mark 10:9) Baa b sẽn kẽ kãadmã tẽng ning pʋgẽ wã noy sẽn yet bũmb ninga, Wẽnnaam nifẽ, kãadmã lagem-b-la taaba. Neb nins sẽn tũud a Zeova wã geta kãadmã wa loɛtg sẽn tar pãnga, baa b kãadmã sasa tɩ b sã n da nan pa tũud a Zeova.
2. Sogs-bʋs la d na n leok sõs-kãngã pʋgẽ?
2 Kãadem sẽn tar bark wata ne sũ-noog wʋsgo. La zu-loees sã n wa be kãadem pʋgẽ, bõe la neb a yiibã tõe n maane? Rẽ yĩnga kãadem a woto buud tõe n manegame bɩ? Neb nins sẽn tar zu-loees b kãadem pʋgẽ wã tõe n paama sõngr bɩ?
Y KÃADMÃ NA N WAA NE SŨ-NOOG BƖ?
3, 4. Ned sã n pa bãng n yãk kãad-n-taag ne yam, bõe n tõe n maane?
3 Kiris-neb kãadem sã n tar barka, kõt-b-la sũ-noogo, la waoogd a Zeova. La b kãadmã sã n kao, wata ne sũ-sãams la yɛl a taaba. Kiris-ned sẽn dat n kẽ kãadem sã n tũ Wẽnnaam sor-wilgri, a tõogdame t’a kãadmã wa yɩ sõma. La ned sã n pa bãng n yãk kãad-n-taag ne yam, a tõe n wa paama sũ-sãamse. Wala makre, kom-bɩɩs kẽer sɩngda taab roob tɩ b nan pa segl sõma kãadmã yĩng ye. Kẽer paamda ned ẽntɛrnetã pʋgẽ, tɩ b yɩ yãg-yãg n kẽ kãadem. La pa yãt n kaoos la b mik tɩ yaa zu-loees bala. Sãnda maanda yel-wẽn-kãseng b sẽn wat n dood taabã sasa. Rẽ tõe n kɩtame tɩ b pa le nand taab sõma ye. Woto yĩnga, b sã n baas n kẽ kãadem, b sɩngda b kãadmã ne zu-loeese.
4 Kiris-neb kẽer kɩɩsa noor ning sẽn yet tɩ d sã n na n kẽ kãadem, segd n yɩɩ ne “ned sẽn tũud Zusoabã balã.” Rẽ kɩtame tɩ b namsdẽ, b to wã sẽn pa tũud a Zeova wã yĩnga. (1 Kor. 7:39) Y sã n tara zu-loe-kãngã bɩ y pʋʋs a Zeova n kos-a sugr la sõngre. A pa na n yiis y yel-wẽndã biis ye. La sã n mik tɩ y sɩd teka yam n kot sugri, a na n sõng-y lame tɩ tõog toogo. (Yɩɩl 130:1-4) Bɩ y maan y sẽn tõe fãa n bao n ta a Zeova yam masã la wakat fãa yĩnga, tɩ ‘sũ-noog ning a sẽn kõtã yɩ yãmb pãnga.’—Neh. 8:10.
Y KÃADEM SÃ N WA RAT N KAO
5. Tags-bʋs la neb nins kãadem sẽn pa noomã pa segd n talle?
5 Neb nins kãadem sẽn pa noomã tõe n wa tagsda woto: ‘Rẽ yĩnga kãadem a woto manegr tara yõod bɩ? M sã n da tõẽ, m toeemda kãad-n-taaga!’ B tõe n wa getame tɩ b sẽn kaood b kãadmã n são, n tagsd woto: ‘Sẽn na yɩl n le paam m menga, m pa tõe n kao m kãadmã sɩda? Baa m sã n pa tõe n kao m kãadmã tɩ zems ne Biiblã noyã, m tõe n welga ne m kãad-n-taagã, n paam n vɩ wa m sẽn date.’ Kiris-neb pa segd n tagsd a woto ye. B pa segd n mamsd b vɩɩmã sẽn tõe n yɩ sõma to-to b sã n kao b kãadmã ye. B tog n maana b sẽn tõe fãa n bao Wẽnnaam sor-wilgri, n maneg b kãadmã.
6. Wilg-y-yã a Zezi goam nins sẽn be Matɩe 19:9 pʋgẽ wã võore.
6 Biiblã wilgame tɩ kiris-ned sẽn kao a kãadem tõeeme n pa tar sor n na n le kẽ kãadem ye. A Zezi yeela woto: “Ned sã n basd a pag tɩ ka yoob yĩng n dɩk a to, a maanda yoobo.” (Mat. 19:9) Gom-bil ning b sẽn lebg ka tɩ “yoobã” võor pa yoob bal ye. Manesem nins fãa sẽn pa zems lagengã wɛɛngẽ wã naagame. Kiris-ned pag wall a sɩd sã n yo t’a rat n kao b kãadmã, yɩta sõma t’a reng n pʋʋs Wẽnnaam sõma n bao sor-wilgri.
7. Kiris-neb kãadem sã n sãame, bõe la nebã tõe n yeele?
7 Kiris-neb sẽn kẽ kãadem sã n welg taab wall b kao kãadmã, tõe tɩ b ra pa tar zood sõma ne Wẽnnaam ye. Tʋm-tʋmd a Poll da soka sokr sẽn tar yõod wʋsgo. A soka woto: “Ned sã n ka tõe n ges a meng yir yelle, yẽ na n maana wãn n tall Wẽnnaam tẽedbã?” (1 Tɩm. 3:5) Sɩd me, neb a yiibã fãa sã n yetẽ tɩ b yaa kiris-neb tɩ b kãadmã yaool n sãame, nebã na n getame tɩ b pa tũud bũmb nins b sẽn moondã ye.—Rom 2:21-24.
8. Kiris-neb kãadem sã n sãame, tõe tɩ yaa bõe n wa ne yellã?
8 Kiris-neb sẽn kẽ kãadem sã n wa rat n welg taab wall b kao b kãadmã tɩ pa zems ne Biiblã sẽn yetã, yaa vẽeneg tɩ zood ning b sẽn tar ne a Zeova wã pa tar pãng ye. Tõe tɩ b nin-yɛng wall b yiibã fãa pa tũud Biiblã noy ye. B sã n da ‘teega a Zeova ne b sũur fãa,’ b ra na n tõogame tɩ b kãadmã yɩ sõma.—Karm-y Yelbũn 3:5, 6.
9. Wãn to la kiris-neb kẽer paam barka, b sẽn modg n pa kao b kãadem yĩnga?
9 Kãadem wʋsg sẽn da wõnd na n sãamame wa n lebga sõma. Naoor wʋsgo, kiris-neb nins sẽn pa yɩt tao-tao n kao b kãadem zu-loees yĩngã paamda barka. Wala makre, neb a yiibã nin-yend tõeeme n pa kiris-ned ye. Rẽ wɛɛngẽ, tʋm-tʋmd a Pɩɛɛr yeela woto: “Pagba, bɩ y sak yãmb mens sɩdba, tɩ kẽer sẽn ka sakd Wẽnnaam koɛɛgã na sak Wẽnnaam bãmb pagbã yel-manesem yĩnga, tɩ goam toor kaẽ ye, tɩ bõe, bãmb na n yãame tɩ yãmb maanda neere, la y yõkda y mense.” (1 Pɩɛ. 3:1, 2) Kiris-nedã manesem sã n yaa sõma, tõe n kɩtame t’a pagã wall a sɩdã sak tũudum hakɩkã. Ned sã n tõog n maneg a kãadem sẽn da rat n sãame, waoogda Wẽnnaam la nafd a zakã neb fãa.
10, 11. Bõe n tõe n wa ne zu-loees kãadem pʋgẽ, la kiris-ned tõe n kɩsa sɩd ne bõe?
10 Kiris-neb nins sẽn pa kẽ kãadmã fãa la bal sã n wa rat n kẽ kãadem, b baooda ned b tẽed-n-taasã sʋka, b sẽn tʋll n ta a Zeova yamã yĩnga. La ne rẽ fãa, yell ning tõe n wa ling-b lame. Wala makre, kẽer kãadem poore, raoã wall pagã tõe n wa bẽeda yam-ka-m-menga, wall a wa bas koɛɛgã moonego. A buud paama a Linda. * A yaa saam-bi-poak sẽn tar yẽesem wʋsg la sẽn nong a kambã. A sɩdã wa n sɩnga yel-kɛg maanego, tɩ koms a raood wʋsgo. La a sɩdã pa tek yam n kos sugri, tɩ b wa yiis-a tigingã pʋga. Kiris-ned sã n wa tar yell a woto a kãadem pʋgẽ tɩ wõnd tɩɩm kae, bõe la a segd n maane?
11 A tõe n sokda a meng woto: ‘M segd n kell n mao n manega m kãadmã baa yel-kãngã sẽn kẽ sʋkã bɩ?’ Y sã n be yell a woto pʋgẽ, ned pa tõe n wilg yãmb y sẽn segd n maanega, la ned pʋd n pa segd n maan dẽ ye. La bʋʋm wʋsg beeme n wilgdẽ tɩ baa d kãadem sã n pa noomẽ, d pa segd n bas tɩ sãam ye. Kiris-ned sã n tõogd toog a kãadem pʋgẽ a sũur-kasetã sẽn pa kõt-a sor t’a bas a to wã yĩnga, nooma Wẽnnaam. (Karm-y 1 Pɩɛɛr 2:19, 20.) A sã n maood n dat n maneg a kãadmã, a Zeova na n tũnuga ne a Gomdã la a vʋʋsem sõngã n sõng-a.
NEB SẼN DAT N SÕNG-YÃ
12. D sã n tɩ kos kãsem-dãmbã sõngre, b tagsg na n yɩɩ wãna?
12 Y sã n tara zu-loees y kãadmã pʋgẽ bɩ y kos kiris-neb sẽn tar minim sõma tɩ b sõng-yã. Kãsem-dãmbã yaa wa pe-kɩɩmba, n get tigingã neb yelle. B na n sõng-y-la ne yamleoog tɩ y bãng Biiblã sagls nins sẽn tõe n sõng-y tɩ y welg y zu-loɛɛgã. (Tʋʋ. 20:28; Zak 5:14, 15) Ra n tags-y tɩ y sã n tɩ togs kãsem-dãmbã, b pa na n le nand-y ye. B na n maneg n nong-y lame la b nand-yã, bala b na n yãame tɩ y rata ne y sũur fãa n ta Wẽnnaam yam.
13. Sagl-bʋs la 1 Korẽnt dãmb 7:10-16 kõt-do?
13 Kiris-ned kãad-n-taag sã n pa kiris-ned t’a wa kos kãsem-dãmbã sõngr zu-loees sẽn be a kãadmã pʋgẽ yĩnga, tõe tɩ b na n tika a Poll sagl-kãngã zug n sõng-a. A Poll yeela woto: “Neb nins sẽn kẽ kãadmã, mam kõta yãmb tõ-kãnga, la a ka mam tõog ye, yaa Zusoabã tõogo: Bɩ pag ra bas a sɩd ye. La yẽ sã n bas a sɩda, bɩ a kell n zĩnd a yembre, wall bɩ a maneg a yell ne a sɩdã n zĩnd ne-a. La bɩ rao me ra yiis a pag ye. . . . Tɩ bõe, paga, fo na n yɩɩ wãn n bãng tɩ fo ka na n fãag f sɩda? La raoa, fo na n yɩɩ wãn n bãng tɩ fo ka na n fãag f paga?” (1 Kor. 7:10-16) Kiris-ned sã n paam t’a pag wall a sɩd sẽn pa tũud a Zeova sak tũudum hakɩkã, sɩd yaa bark tɛkẽ!
14, 15. Bõe n tõe n wa kɩt tɩ saam-bi-poak rat n welg ne a sɩda, la bõe yĩng t’a segd n deng n pʋʋs la a tags sõma?
14 Bõe n tõe n wa kɩt tɩ saam-bi-poak yãk yam n ‘bas a sɩda’? Pagb kẽer yãka yam n welg ne b sɩdba, b sɩdbã sẽn tõe n ges b yell n yaool n pa maan dẽ yĩnga. Sãnda welgame, b sɩdbã sẽn pãbd-b wall b sẽn gɩdgd-b tɩ b pa tol n tõe n tũ Wẽnnaam yĩnga.
15 Yaa pagã wall sɩdã bal n segd n yãk a sã n na n welga ne a kãad-n-taagã bɩ a na n kell n zĩnda ne-a. La sẽn yaa-a kiris-nedã segd n deng n pʋʋsame la a tags sõma. Wala makre, a segd n deng n bao n bãnga sã n yaa a kãad-n-taagã manesem bal n kɩtd t’a pa tõe n tũ Wẽnnaam, bɩ yẽ me pa maand modgr wʋsg Biiblã zãmsgo, tigissã kẽnd la koe-moonegã wɛɛngẽ.
16. Bõe yĩng tɩ kiris-nebã pa yɩt yãg-yãg n kao b kãadem?
16 D sẽn nand zood ning d sẽn tar ne Wẽnnaamã, n paas d sẽn nand kãadmã sẽn yaa kũun a sẽn kõ-dã, d pa yɩt yãg-yãg n kao d kãadem ye. D sẽn yaa a Zeova tʋm-tʋmdbã, d pa sakd n maan bũmb sẽn na n kɩt tɩ nebã paoog a yʋʋrã ye. Rẽ n kɩt tɩ d pa maand sɩlem n zãmb d pag wall d sɩd sẽn na yɩl n paam n kẽ kãadem ne ned a to wã.—Zer. 17:9; Mal. 2:13-16.
17. Kiris-ned sã n modg a kãadem na yɩɩ neer t’a kãad-n-taagã baas n bas-a, kiris-nedã tara taal bɩ?
17 Kiris-ned pag wall a sɩd sã n pa kiris-neda, a segd n maana a sẽn tõe fãa sẽn na yɩl tɩ b kãadmã tall pãnga. La kiris-nedã sã n maan a sẽn tõe fãa t’a kãad-n-taagã baas n dat n bas-a, a pa segd n ning a meng taal ye. Tʋm-tʋmd a Poll yeela woto: “Ned ning sẽn ka tẽedã sã n dat n yi, bɩ y bas-a t’a yi. Ne yell a woto, a ka le be ba-bi-raoogã bɩ ba-bi-poakã zug ye. Wẽnnaam boola tõnd tɩ d zĩnd ne laafɩ.”—1 Kor. 7:15. *
TEEG-Y-YÃ A ZEOVA
18. Baa y sã n mak y kãadem manegr n pa tõoge, wãn to la y modgrã na n naf-yã?
18 Sẽn wa n yaa zu-loɛɛg ning fãa la y tar y kãadem pʋgẽ, y tõe n kosa a Zeova raoodo, la y kell n teeg-a. (Karm-y Yɩɩl Sõamyã 27:14.) D tẽeg a Linda yelle. A maana modgr yʋʋm wʋsg pʋgẽ n na n maneg a kãadmã, la wa n baas n sãamame. Rẽ yĩnga a getame t’a sãama a sẽk bɩ? Ad a sẽn yeele: “Mam pa maand m bãngẽ ye. Modgr ning mam sẽn maanã kɩtame tɩ nebã pẽgd-ma. M sũur-kasetã pa ningd-m taal ye. Sẽn yɩɩd fãa, modgr ning m sẽn maan yʋʋm-kãens pʋsẽ wã sõnga tõnd bi-puglã t’a kɩ yẽg sɩdã pʋgẽ. A wa n deega lisg n lebg a Zeova Kaset soab sẽn tar yẽesem sõma.”
19. Y sã n mao n na n maneg y kãadem, tõe n baasa wãna?
19 Saam-bi-poak a ye yʋʋr sẽn boond t’a Marilyn sũur yaa noogo, a sẽn teeg Wẽnnaam n mao ne a sũur fãa n na n maneg a kãadmã. Ad a sẽn yeele: “Mam da wa n dat n welga ne m sɩdã, a sẽn da tõdg m yell gesgo, la a ra kɩtdẽ tɩ m pa tõe n tũ Wẽnnaam sõma wã yĩnga. Baa a sẽn da yɩ kãsem-soabã, a wa n kẽe afɛɛr-dãmb pʋgẽ n pa reng n tags tɩrg ye. Rẽ kɩtame t’a sɩng tigissã vaalgo. Tõnd wa n pa le sõsd ne taab ye. Teerorist-rãmb n da kʋ neb tõnd sẽn vɩ galʋ-tẽng ningã pʋgẽ. Woto kẽesa maam rabeem hal tɩ m da pa le baood ned zĩig ye. La mam wa n bãngame tɩ ma-me tara taal tõnd zu-loɛɛgã pʋgẽ. Tõnd wa n lebs n sɩnga ne taab sõsga, n maand d zak pʋgẽ Biibl zãmsgã la d kẽnd tigissã yɛs n pa vaandẽ ye. Kãsem-dãmbã bʋka b mens n sõng-do. D kãadmã le lebga sõma. Kaoosg zugẽ, m sɩdã le wa n paamame tɩ b kõ-a tʋʋm tigingã pʋgẽ. Yaa sɩd tɩ pa yɩ nana ye. La baasa neere.”
20, 21. D sã n kẽe kãadem, bõe la d segd n yãk yam n na n maandẽ?
20 D kẽe kãadem tɩ d pa kẽ kãadem me, segdame tɩ wakat fãa bɩ d tall raood la d teeg a Zeova. D sã n segda zu-loees d kãadem pʋgẽ, d tog n maana d sẽn tõe fãa n welg-ba, la d ning d yamẽ tɩ neb sã n kẽ kãadem, b “ka leb n ya yiib yɛs ye, b yaa yĩng a yembre.” (Mat. 19:6) D tẽeg me tɩ d kãad-n-taagã sã n pa kiris-ned tɩ d kell n mao ne zu-loeesã, a tõe n wa saka tũudum hakɩkã tɩ yɩ-d noog wʋsgo.
21 Baa tõnd yɛlã sẽn yaa to-to fãa bɩ d mao n ket n maand neere, n tall yʋ-noog sẽn pa-b kiris-nebã nifẽ. D sã n tara zu-loees d kãadem pʋgẽ hal n wa rat n welg ne d kãad-n-taagã, segdame tɩ d fees d meng ne pʋ-peelem. Segdame me tɩ d maag d yĩng n bao sagls Wẽnnaam Gomdã pʋgẽ, la kãsem-dãmbã sõngre. La sẽn yɩɩd fãa, d segd n bao n ta a Zeova yam bũmba fãa pʋgẽ, la d wilgdẽ tɩ d sɩd nanda kãadmã sẽn yaa kũun a sẽn kõ-dã.
[Tẽngr not rãmbã]
^ sull 10 D toeema yʋyã.
^ sull 17 Ges-y Kell-y n pa-y “Wẽnnaam nonglmã pʋgẽ” sebrã neng 219-221 wã, yʋʋmd 1988 sɩpaolg kiuug pipi daar Gũusg Gasgã neng 26-27 wã, ne yʋʋmd 1975 bõn-bɩʋʋng kiuug rasem 15 Gũusg Gasgã neng 575.
[Zãmsgã sogsgã]
[Goam sẽn tar pãnga, seb-neng 20]
Kiris-neb nins sẽn segd zu-loees b kãadem pʋgẽ n pa yɩt yãg-yãg n kao-a wã wae n paamda barka
[Goam sẽn tar pãnga, seb-neng 22]
Teeg-y-yã a Zeova la y kot-a raoodo
[Foto seb-neng 19]
Kiris-neb sã n segd zu-loees b kãadem pʋgẽ n maood n dat n manege, a Zeova ningd-b-la barka
[Foto seb-neng 21]
Tigingã neb tõe n sõng-y lame la b keng y raoodo
