Koɛɛg soab sebre 5:1-20
5 Fo sã n kẽng Wẽnnaam doogẽ wã bɩ f gũus ne f naoã.+ Fo sẽn na n kolg n kelge,+ n são f sẽn na n kolg n maan maoong wa yalembã.+ Bala b pa mi tɩ bũmb ning b sẽn maandã yaa wẽng ye.
2 Ra yɩ yãg-yãg n yiis gomd f noorẽ, la ra bas tɩ f sũurã kɩt tɩ f gom Wẽnnaam taoor n pa reng n tags ye.+ Bala Wẽnnaam bee saasẽ, tɩ fo be tẽngã zugu. Rẽ n so tɩ f goamã pa segd n yɩ wʋsg ye.+
3 Bala tagsg wʋsg wata ne zãmsdo,+ la yalembã gom-toogã kɩtdame tɩ b gomd yaare.+
4 Fo sã n pʋlem Wẽnnaam bũmbu, bɩ f pids-a n da bas tɩ kaoos ye.+ Bala a sũur pa noom ne yalembã ye.+ Fo sã n pʋlem bũmb bɩ f pidsi.+
5 Fo sẽn na n pa pʋlem bũmb n são f sẽn na n pʋlem n pa pidsi.+
6 Ra bas tɩ f noor kɩt tɩ f* maan yel-wẽnde,+ la ra yeel malɛkã* taoor tɩ f tudgame ye.+ Bõe yĩng tɩ f na n maan n yik Wẽnnaam sũur ne f no-goam t’a sãam f nusã tʋʋmã?+
7 Tagsg wʋsg wata ne zãmsdo.+ Woto me, ned sã n gomd wʋsgo, a goamã yaa zaalem. La bɩ f zoe Wẽnnaam.+
8 Fo sã n yã tɩ nin-naab weoogd naong soaba, n kaood bʋʋd kɛgr la a maand sẽn pa zems fo babgẽ wã, bɩ f ra bas tɩ rẽ ling-f ye.+ Bala sẽn yɩɩd yẽ n gɛt-a, la neb n be n yɩɩd bãmb me.
9 Sẽn paase, b pʋɩtã tẽngã yõod bãmb ne taab sʋka. La baa rĩmã meng rɩta tẽngã bõn-koaadlã yõodo.+
10 Ned sã n nong wanzuri, wanzuri pa sekd-a ye. Ned sã n nong arzɛgs me, baa a paoongã paasda, pa sekd-a ye.+ Rẽ me yaa zaalem.+
11 Bõn-sõma sã n paasdẽ, b rɩtbã me sõor paasdame.+ La bõe yõod la a soabã paamda, sã n pa a sẽn get-b ne a nifã bala?+
12 Tʋm-tʋmd rɩt wʋsg tɩ yaa bilfu, a gõeem noom-a lame. La arzɛk soab paoongã sẽn yaa wʋsgã pa basd-a t’a gũs ye.
13 Yel-be-kãseng a ye la mam yã tẽngã zug* ka: Yaa arzɛgs wʋsg ned sẽn bĩngi, tɩ na n maan-a wẽnga.
14 Arzɛg-kãens menema b sẽn maan bũmb tɩ pa yãk neng yĩnga, t’a soabã sã n wa rog biig bɩ a pa le tar baa fʋɩ ye.+
15 Ninsaal yii a ma pʋgẽ zaala. Woto me, a na n looga a zaala.+ A pa tõe n zã baa fʋɩ n loog a tʋʋm-toogã fãa yĩng ye.+
16 Yãoã me yaa yel-be-kãsenga: A sẽn wa to-to wã, woto bal la a na n looge. Bõe yõod la ned sẽn tʋmd wʋsg sobg yĩng paamda?+
17 Sẽn paase, daar fãa a rɩta lik pʋgẽ ne sũ-sãams wʋsgo, ne bãas la sũ-yikri.+
18 Ad bũmb ning mam sẽn yã tɩ yaa sõma: Yaa tɩ ninsaal segd n dɩɩme la a yũ, la a noog a sũuri, tʋʋm-toog+ ning fãa yẽ sẽn namsd n tʋmd tẽngã zug ka wã yĩnga, wakat bilfã Wẽnnaam sẽn kõ-a wã tɛka. Bala rẽ n yaa a keoore.*+
19 Sẽn paase, Wẽnnaam sã n kõ ninsaal arzɛk la paoongo,+ la a kõ-a tõog t’a tõe n dɩ b yõodo, a segd n deega a keoorã* la a noog a sũur a tʋʋm-toogã yĩnga. Yaa Wẽnnaam kũuni.+
20 A pa na n bãng* t’a rayã loogdame ye. Bala Wẽnnaam kɩtame t’a kɩdemd wakat fãa.+
Vẽnegr toor-toore
^ Ebre, “f yĩn-nemsã.”
^ Bɩ, “koe-taasdã.”
^ Ebre, “wĩntoogã tẽngr.”
^ Bɩ, “pʋɩɩre.”
^ Bɩ, “pʋɩɩrã.”
^ Bɩ “tẽeg.”
