Biiblã yetame tɩ d segd n nonga d meng tɩ zemse. Ned sẽn nong a meng geta a meng yelle, n waoogd a meng la a nand a menga. (Matye 10:31) Biiblã pa yeel tɩ d nong d meng tɩ loog noor ye.

Ãnd soab la d tog n nong pipi?

1. Yaa Wẽnnaam la d tog n nong pipi. Biiblã wilga tõog ning sẽn yaa kãseng n tɩ yɩɩdã. A yetame: ‘Bɩ f nong a Zeova sẽn yaa fo Wẽnnaamã ne f sũur fãa.’​—Mark 12:28-30; Tõodo 6:5.

2. Tõog a yiib-n-soab sẽn yaa kãsengã yetame yaa: “Nong f to wa f menga.”​—Mark 12:31; Maan-kʋʋre 19:18.

3. Yaa sɩd tɩ Biiblã pa yeel vẽeneg tɩ d tog n nonga d meng ye. La a sẽn yeel tɩ “nong f to wa f mengã” wilgdame tɩ d segd n nonga d mengã, la d waoogd d meng me. La d tog n maaname tɩ zemse.

Ãnd la a Zeezi ra nong pipi?

A Zeezi sõngda tõnd tɩ d bãng d sẽn tog n nong Wẽnnaam to-to, la d sẽn tog n nong d to la d mengã to-to me. Sẽn paase, a yeela a karen-biisã tɩ b rɩk yẽ togs-n-taare.​—Zã 13:34, 35.

1. A Zeezi ra nonga Wẽnnaam a Zeova pipi. A vɩɩmã tõre, yaa Wẽnnaam daabã la a lʋɩɩs taoore. Yẽ meng yeelame: “Yaa tɩ dũni na bãng tɩ mam nonga m ba, la tɩ mam maanda wa m ba sẽn yeel maamã.”​—Zã 14:31.

2. A Zeezi nonga neb a taabã. Neb a taabã yell n da pak-a, hal t’a sak n kõ a vɩɩmã tɩ yɩ maoongo.​—Matye 20:28.

3. A Zeezi nonga a mengã, la a ra pa maand tɩ loog noor ye. A ra vʋʋsdame, n dɩtẽ la a ra mi n naag a karen-biisã ne neb nins sẽn da tũud-a wã n noog a yõore.​—Mark 6:31, 32; Luk 5:29; Zã 2:1, 2; 12:2.

D sã n nong neb a taabã n yɩɩd tõnd mengã, rẽ yĩnga kɩtdame tɩ d pa le tar sũ-noog bɩ?

Ayo. Bala Wẽnnaam baooda neb a taabã neere. A yaool n naana tõnd a meng wẽnego. (Sɩngre 1:27; 1 Zã 4:8) Woto rat n yeelame t’a sẽn naan tõnd to-to wã kɩtame tɩ d nong d taabã. Yaa sɩd tɩ d tog n nonga d meng me, la tõnd sã n nong Wẽnnaam pipi, la d maand neb a taabã neere, d na n paama sũ-noog n yɩɩda. Biiblã meng yetame yaa: “Kũun wata ne sũ-noog n yɩɩd reegre.”​—Tʋʋmã 20:35, MN.

Rũndã-rũndã, neb wʋsg yetame tɩ yaa f sẽn na n tagsd f meng yell n yɩɩd la f paamd sũ-noogo. Sã n yaa ne bãmba, d pa segd n nong d taabã n yɩɩd d mens ye. La kaset wʋsg n be n wilgdẽ tɩ d sã n tũud Biiblã saglgã, paasda d yĩnsã laafɩ la d paamd sũ-noog wʋsgo. Ad Biiblã sẽn yete: “Bɩ ned baa a yembr da bao a meng sõngr ye, a bao a to rẽnda.”​—1 Korẽnt-rãmbã 10:24.