സമൂഹത്തിന്‌ ഒരു മുതൽക്കൂട്ട്‌
സമൂഹത്തിന്‌ ഒരു മുതൽക്കൂട്ട്‌
സ്‌പെയിനിലെ ഉണരുക! ലേഖകൻ
നൂറ്റാണ്ടുകളായി സ്‌പെയിനിലെ നഗരങ്ങൾ ആരാധനാലയങ്ങളുടെ നിർമാണത്തിനായി സ്ഥലം അനുവദിച്ചുകൊടുത്തിട്ടുണ്ട്‌. മതവിശ്വാസം തങ്ങളുടെ സമുദായത്തിനു ഗുണം ചെയ്യുമെന്ന്‌ നഗരസഭ അധികൃതർ വിശ്വസിച്ചു. എന്നാൽ രാഷ്‌ട്രത്തിന്റെ ഔദ്യോഗികമതം കത്തോലിക്കാമതം ആയിരുന്നതിനാൽ കാലങ്ങളോളം ഈ ക്രമീകരണത്തിൽനിന്ന്‌ എല്ലായ്‌പോഴുംതന്നെ പ്രയോജനം അനുഭവിച്ചിരുന്നത്‌ കത്തോലിക്ക സഭ ആയിരുന്നു. എന്നാൽ കാലം മാറിയിരിക്കുന്നു.
മത സ്വാതന്ത്ര്യം പ്രഖ്യാപിച്ചുകൊണ്ട്‌ 1980-ൽ പുറപ്പെടുവിച്ച ഒരു സ്‌പാനിഷ്‌ നിയമം ഇങ്ങനെ പറയുന്നു: “ഏതെങ്കിലും ഒരു പ്രത്യേക മതം ഇനിമുതൽ രാഷ്‌ട്രത്തിന്റെ ഔദ്യോഗിക മതം ആയിരിക്കില്ല.” ഈ പ്രസ്‌താവന ഹേതുവായി നഗര അധികൃതരിൽ ചിലർ യഹോവയുടെ സാക്ഷികൾ നിർവഹിക്കുന്ന വേലയെ പരസ്യമായി അംഗീകരിക്കാൻ ഇടയായിരിക്കുന്നു. അവർ സാക്ഷികൾക്ക്‌ രാജ്യഹാളുകൾ പണിയാൻ സ്ഥലം സംഭാവന ചെയ്‌തിരിക്കുന്നു എന്നത്‌ ഈ അംഗീകാരത്തിന്റെ തെളിവാണ്‌.
സാക്ഷികളുടെ വേല ‘വിദ്യാഭ്യാസപരമായ ഒന്നായതിനാലും, അത്‌ പൊതുജനങ്ങൾക്കും സമൂഹത്തിനും പ്രയോജനം കൈവരുത്തുന്നതിനാലും’ ഇത്തരം സംഭാവനകൾ ലഭിക്കാൻ സാക്ഷികൾ തികച്ചും അർഹരാണ്‌ എന്ന അഭിപ്രായം വിവിധ നഗരസഭകൾ പ്രകടിപ്പിക്കുകയുണ്ടായി. ‘നഗരത്തിൽ യഹോവയുടെ സാക്ഷികളുടെ ശ്രദ്ധേയമായ സാന്നിധ്യത്തെയും ലാഭേച്ഛകൂടാതെയുള്ള അവരുടെ വേലയെയും’ കുറിച്ച്‌ മറ്റ്‌ ഉദ്യോഗസ്ഥന്മാർ എടുത്തു പറഞ്ഞിട്ടുണ്ട്‌.
പ്രത്യേക നിർമാണ രീതികൾ ഉപയോഗിച്ചുകൊണ്ട്‌ സാക്ഷികളായ സ്വമേധയാ സേവകരുടെ നിർമാണ സംഘം വെറും 48 മണിക്കൂറുകൊണ്ട്‌ പണിതിരിക്കുന്നവയാണു മിക്ക രാജ്യഹാളുകളും. തെക്കുപടിഞ്ഞാറൻ സ്‌പെയിനിലെ, ലാ ലീനേയാ നഗരത്തിന്റെ മേയർ ഇങ്ങനെ പറഞ്ഞു: “സ്വമേധയാ സേവകരുടെ നിസ്സ്വാർഥതയിൽ എനിക്കു വളരെ മതിപ്പുണ്ട്‌. ഇവർ നമ്മുടെ പിന്തുണ അർഹിക്കുന്നു എന്ന്‌ എനിക്കു തോന്നുന്നു. ഇന്നത്തെ വിഭജിത ലോകത്തിൽ ഇത്തരം മനോഭാവമാണ്‌ നമുക്ക്‌ ഏറെ ആവശ്യം.” അദ്ദേഹം പുതിയ രാജ്യഹാളിനെ “ഒരുമയുടെ സ്‌മാരകം” എന്നു വിളിച്ചു.
അയൽക്കാരും ഈ ഒരുമ ശ്രദ്ധിക്കാതിരുന്നിട്ടില്ല. ഉത്തര സ്‌പെയിനിലെ വിറ്റോറിയയിൽ ഒരു ഇരട്ട രാജ്യഹാൾ പണിത സമയത്ത്‌ അയൽക്കാരിയായ മാരിയൻ ഇപ്രകാരം പറഞ്ഞു: “സകലരും ഇത്തരം സ്‌നേഹം പ്രകടിപ്പിക്കുന്നവർ ആയിരുന്നെങ്കിൽ നാം ഇന്ന്‌ അഭിമുഖീകരിക്കുന്ന പ്രശ്‌നങ്ങൾ ഒന്നും ഉണ്ടാകില്ലായിരുന്നു.” പണി പുരോഗമിച്ചുകൊണ്ടിരിക്കെ തദ്ദേശവാസിയായ ഒരു വാസ്‌തുശിൽപ്പി പറഞ്ഞത്‌ ഇങ്ങനെയാണ്‌: “നിങ്ങളുടെ സന്തോഷം കാണുമ്പോൾ ഒരു യഹോവയുടെ സാക്ഷി ആയിത്തീരണം എന്ന്‌ എനിക്കും തോന്നുന്നു!”
വടക്കുകിഴക്കൻ സ്‌പെയിനിലെ, സരഗോസ നഗരത്തിൽ അധികൃതർ സാക്ഷികൾക്ക്‌ 600 ചതുരശ്ര മീറ്റർ സ്ഥലം സൗജന്യമായി നൽകി. യഹോവയുടെ സാക്ഷികൾ അവിടെ നിർമാണ പ്രവർത്തനങ്ങൾ തുടങ്ങിയപ്പോൾ ഒരു പ്രാദേശിക പത്രം ആ സ്ഥലത്തെ ഉപമിച്ചത്‌ “നൂറുകണക്കിന്‌ കുഞ്ഞുറുമ്പുകൾ ഒരുമയോടെ പണിയെടുക്കുന്ന ഒരു ഉറുമ്പിൻ കൂടിനോടാണ്‌.” അയൽക്കാർ നിർമാണ പ്രവർത്തകർക്കു ഹൃദ്യമായ സ്വീകരണം നൽകി. അവരിൽ ഒരാൾ ഇങ്ങനെ പറഞ്ഞു: “പുരോഹിതന്മാർ എന്റെ വിശ്വാസം നഷ്ടപ്പെടാനാണ്‌ ഇടയാക്കിയിട്ടുള്ളത്‌. നിങ്ങളോ അതു തിരികെ തന്നിരിക്കുന്നു.”
തങ്ങളുടെ ആരാധന സ്ഥലങ്ങൾ പണിയാനായി അധികാരികളും അയൽക്കാരും നൽകുന്ന എല്ലാ സഹായത്തിനും സാക്ഷികൾ നന്ദിയുള്ളവരാണ്‌. തങ്ങളുടെ സമുദായത്തിനു നൽകാവുന്നതിൽ വെച്ച്‌ ഏറ്റവും മികച്ച വിദ്യാഭ്യാസ വേലയ്‌ക്കായി തങ്ങളുടെ രാജ്യഹാളുകൾ ഉപയോഗിക്കാൻ അവർ ദൃഢചിത്തരാണ്‌—അതേ, ദൈവവചനം പ്രസംഗിക്കാനും അതു പഠിപ്പിക്കാനും. (g03 8/08)
[31-ാം പേജിലെ ചിത്രം]
കാഡിസിലെ ലാലീനേയാ, സ്‌പെയിൻ