ഈ ഗ്രന്ഥത്തിൽ അടങ്ങിയിരിക്കുന്നത്‌
ഈ ഗ്രന്ഥത്തിൽ അടങ്ങിയിരിക്കുന്നത്‌
ഒരു ലൈബ്രറിയിൽ ആദ്യമായി പ്രവേശിക്കുന്ന വ്യക്തി അമ്പരപ്പിക്കുന്ന പുസ്‌തകശേഖരം കണ്ടേക്കാം. എന്നാൽ പുസ്‌തകങ്ങൾ ക്രമീകരിച്ചിരിക്കുന്ന വിധം സംബന്ധിച്ച ചെറിയൊരു വിശദീകരണം കിട്ടിക്കഴിയുമ്പോൾ, ആവശ്യമുള്ള പുസ്‌തകങ്ങൾ എങ്ങനെ കണ്ടുപിടിക്കാമെന്ന്‌ അയാൾ പെട്ടെന്നു മനസ്സിലാക്കും. അതുപോലെ, ബൈബിളിൽ അടങ്ങിയിരിക്കുന്ന കാര്യങ്ങൾ എങ്ങനെ ക്രമീകരിച്ചിരിക്കുന്നുവെന്നു മനസ്സിലാകുമ്പോൾ അതു പരിശോധിക്കുന്നത്‌ കൂടുതൽ എളുപ്പമായിരിക്കും.
“പപ്പൈറസ്‌ ചുരുളുകൾ” അല്ലെങ്കിൽ “ഗ്രന്ഥങ്ങൾ” എന്നർഥമുള്ള ബിബ്ലിയ എന്ന ഗ്രീക്കു പദത്തിൽനിന്നാണു “ബൈബിൾ” എന്ന പദം വന്നിരിക്കുന്നത്‌.1 66 പുസ്‌തകങ്ങളുടെ ഒരു ശേഖരമാണ്‌, ലൈബ്രറിയാണ്‌, ബൈബിൾ. പൊ.യു.മു. 1513 മുതൽ പൊ.യു. 98 വരെയുള്ള ഏതാണ്ട്‌ 1,600 വർഷം വരുന്ന ഒരു കാലഘട്ടത്തിലാണ്‌ അതെഴുതപ്പെട്ടത്‌.
ബൈബിളിന്റെ നാലിൽ മൂന്നു ഭാഗം വരുന്ന ആദ്യത്തെ 39 പുസ്‌തകങ്ങൾ എബ്രായ തിരുവെഴുത്തുകൾ എന്നാണ്‌ അറിയപ്പെടുന്നത്‌, കാരണം അവ എഴുതപ്പെട്ടത്‌ പ്രധാനമായും ആ ഭാഷയിലായിരുന്നു. ഈ പുസ്‌തകങ്ങളെ പൊതുവേ മൂന്നു വിഭാഗങ്ങളായി തിരിക്കാം: (1) ചരിത്രം, ഉല്‌പത്തി മുതൽ എസ്ഥേർ വരെയുള്ള 17 പുസ്‌തകങ്ങൾ; (2) കാവ്യം, ഇയ്യോബ്‌ മുതൽ ഉത്തമഗീതം വരെയുള്ള 5 പുസ്‌തകങ്ങൾ; (3) പ്രവചനം, യെശയ്യാവു മുതൽ മലാഖി വരെയുള്ള 17 പുസ്‌തകങ്ങൾ. ഭൂമിയുടെയും മനുഷ്യവർഗത്തിന്റെയും ആദിമ ചരിത്രവും പുരാതന ഇസ്രായേൽ ജനതയുടെ രൂപീകരണം മുതൽ പൊ.യു.മു. അഞ്ചാം നൂറ്റാണ്ടുവരെയുള്ള അതിന്റെ ചരിത്രവുമാണ്‌ എബ്രായ തിരുവെഴുത്തുകളിൽ അടങ്ങിയിരിക്കുന്നത്‌.
ശേഷിക്കുന്ന 27 പുസ്‌തകങ്ങൾ ക്രിസ്‌തീയ ഗ്രീക്കു തിരുവെഴുത്തുകൾ എന്നാണ്‌ അറിയപ്പെടുന്നത്‌. കാരണം, അവ എഴുതപ്പെട്ടത്‌ അന്നത്തെ അന്താരാഷ്‌ട്ര ഭാഷയായിരുന്ന ഗ്രീക്കിലാണ്‌. അടിസ്ഥാനപരമായി, വിഷയപ്രതിപാദ്യത്തെ അടിസ്ഥാനമാക്കിയാണ്‌ അവ ക്രമീകരിച്ചിരിക്കുന്നത്‌: (1) 5 ചരിത്രപുസ്‌തകങ്ങൾ—സുവിശേഷങ്ങളും പ്രവൃത്തികളും, (2) 21 ലേഖനങ്ങൾ, (3) വെളിപ്പാട്‌. ക്രിസ്‌തീയ ഗ്രീക്കു തിരുവെഴുത്തുകൾ പ്രധാനമായും ശ്രദ്ധ കേന്ദ്രീകരിക്കുന്നത്‌ യേശുക്രിസ്‌തുവിന്റെയും പൊ.യു. ഒന്നാം നൂറ്റാണ്ടിലെ അവന്റെ ശിഷ്യന്മാരുടെയും പഠിപ്പിക്കലുകളിലും പ്രവർത്തനങ്ങളിലുമാണ്‌.
