നിങ്ങൾക്കുള്ള ഒരു ഗ്രന്ഥമോ?
നിങ്ങൾക്കുള്ള ഒരു ഗ്രന്ഥമോ?
“പുസ്തകം ഓരോന്നുണ്ടാക്കുന്നതിന്നു അവസാനമില്ല,” ഏതാണ്ട് 3,000 വർഷം മുമ്പ് ശലോമോൻ പ്രസ്താവിച്ചു. (സഭാപ്രസംഗി 12:12) ആ പ്രസ്താവന എന്നത്തെയും പോലെ ഇന്നും സത്യമാണ്. ഗുണനിലവാരമുള്ള കൃതികൾക്കു പുറമേ, ഓരോ വർഷവും ആയിരക്കണക്കിനു പുതിയ പുസ്തകങ്ങളാണ് അച്ചടിക്കുന്നത്. തിരഞ്ഞെടുക്കാൻ അനവധി പുസ്തകങ്ങളുള്ളപ്പോൾ എന്തിനു ബൈബിൾ വായിക്കണം?
വിനോദത്തിനോ വിജ്ഞാനത്തിനോ അല്ലെങ്കിൽ ഈ രണ്ടു കാരണങ്ങളും നിമിത്തമോ ആണ് പലരും പുസ്തകങ്ങൾ വായിക്കുന്നത്. ബൈബിൾ വായിക്കുന്ന കാര്യത്തിലും അതുതന്നെ സത്യമാണ്. വിജ്ഞാനത്തിനും വിനോദത്തിനും അത് ഉപകരിക്കും. എന്നാൽ ബൈബിൾ അതിലുമധികമാണ്. അത് അറിവിന്റെ അനുപമമായ ഒരു ഉറവിടമാണ്.—സഭാപ്രസംഗി 12:9, 10.
ദീർഘകാലമായി മനുഷ്യൻ മനസ്സിൽ കൊണ്ടുനടന്നിട്ടുള്ള, കഴിഞ്ഞ കാലത്തെയും ഇക്കാലത്തെയും വരുംകാലത്തെയും കുറിച്ചുള്ള ചോദ്യങ്ങൾക്കു ബൈബിൾ ഉത്തരം നൽകുന്നു. പലരും ചോദിക്കുന്നു: നാം എവിടെനിന്നാണു വന്നത്? ജീവിതത്തിന്റെ ഉദ്ദേശ്യമെന്താണ്? ജീവിതത്തിൽ നമുക്ക് എങ്ങനെ സന്തുഷ്ടി കണ്ടെത്താം? ഭൂമിയിൽ എക്കാലത്തും ജീവനുണ്ടായിരിക്കുമോ? നമ്മുടെ ഭാവി എന്തു കൈവരുത്തും?
ഇവിടെ അവതരിപ്പിച്ചിട്ടുള്ള സർവ തെളിവിന്റെയും സമസ്ത ശക്തി ബൈബിൾ കൃത്യമാണെന്നും ആധികാരികമാണെന്നും വ്യക്തമായി സ്ഥാപിക്കുന്നു. അർഥവത്തും സന്തുഷ്ടവുമായ ജീവിതം നയിക്കാൻ അതിന്റെ പ്രായോഗിക ബുദ്ധ്യുപദേശത്തിന് ഇന്നു നമ്മെ എങ്ങനെ സഹായിക്കാൻ കഴിയുമെന്ന് നാം ഇതിനോടകം കണ്ടുകഴിഞ്ഞിരിക്കുന്നു. ഇക്കാലത്തെക്കുറിച്ചുള്ള അതിന്റെ ഉത്തരങ്ങൾ തൃപ്തികരമായതുകൊണ്ട്, കഴിഞ്ഞ കാലത്തെക്കുറിച്ചുള്ള അതിന്റെ ഉത്തരങ്ങളും വരുംകാലത്തെക്കുറിച്ചുള്ള അതിന്റെ പ്രവചനങ്ങളും തീർച്ചയായും അവധാനപൂർവമായ ശ്രദ്ധ അർഹിക്കുന്നതാണ്.
പരമാവധി പ്രയോജനം നേടാവുന്ന വിധം
പലരും ബൈബിൾ വായിക്കാൻ തുടങ്ങിയിട്ടുണ്ട്, എന്നാൽ അതിലെ ചില ഭാഗങ്ങൾ മനസ്സിലാക്കാൻ ബുദ്ധിമുട്ടായപ്പോൾ അവർ വായന നിർത്തി. അതാണു നിങ്ങളുടെ അനുഭവമെങ്കിൽ, സഹായകമായിരുന്നേക്കാവുന്ന ചില കാര്യങ്ങളുണ്ട്.
വിശുദ്ധ തിരുവെഴുത്തുകളുടെ പുതിയലോക ഭാഷാന്തരം (ഇംഗ്ലീഷ്) പോലെ ആധുനിക ഭാഷയിലുള്ള ആശ്രയയോഗ്യമായ ഒരു വിവർത്തനം തിരഞ്ഞെടുക്കുക. a ചിലർ വായിച്ചുതുടങ്ങുന്നത് യേശുവിന്റെ ജീവിതത്തെക്കുറിച്ചുള്ള സുവിശേഷവിവരണങ്ങളാണ്. ഗിരിപ്രഭാഷണത്തിൽ കാണുന്നതുപോലുള്ള അവന്റെ പഠിപ്പിക്കൽ മനുഷ്യപ്രകൃതം സംബന്ധിച്ച സൂക്ഷ്മമായ ഒരു അവബോധത്തെ പ്രതിഫലിപ്പിക്കുകയും ജീവിതം മെച്ചപ്പെടുത്തേണ്ട വിധം വിവരിക്കുകയും ചെയ്യുന്നു.—മത്തായി 5-7 അധ്യായങ്ങൾ കാണുക.
ബൈബിൾ മുഴുവൻ വായിക്കുന്നതിനു പുറമേ, അതിന്റെ വിഷയോന്മുഖ പഠനം തികച്ചും വിജ്ഞാനപ്രദമായിരിക്കും. ഇതിൽ ഉൾപ്പെടുന്നത് ഒരു പ്രത്യേക വിഷയത്തെക്കുറിച്ച് ബൈബിൾ പറയുന്നത് അവലോകനം ചെയ്യുന്നതാണ്. ദേഹി, സ്വർഗം, ഭൂമി, ജീവൻ, മരണം, ദൈവരാജ്യം—അത് എന്താണെന്നതും അത് നിവർത്തിക്കാൻ പോകുന്നതും—എന്നിങ്ങനെയുള്ള വിഷയങ്ങളെക്കുറിച്ച് വാസ്തവത്തിൽ ബൈബിൾ പറയുന്നത് മനസ്സിലാക്കുമ്പോൾ നിങ്ങൾ അമ്പരന്നുപോയേക്കാം. b ബൈബിളിന്റെ വിഷയോന്മുഖ പഠനപരിപാടി യഹോവയുടെ സാക്ഷികൾക്കുണ്ട്, അതു സൗജന്യമാണ്. 2-ാം പേജിൽ പട്ടികപ്പെടുത്തിയിരിക്കുന്ന ഉചിതമായ വിലാസത്തിൽ ഇതിന്റെ പ്രസാധകരോടു നിങ്ങൾക്ക് എഴുതി ചോദിക്കാവുന്നതാണ്.
തെളിവു പരിശോധിച്ചശേഷം, തിരുവെഴുത്തുകൾ “യഹോവ” എന്നു തിരിച്ചറിയിക്കുന്ന ദൈവത്തിൽനിന്നാണു ബൈബിൾ വന്നിരിക്കുന്നതെന്ന നിഗമനത്തിൽ പലരും എത്തിച്ചേർന്നിരിക്കുന്നു. (സങ്കീർത്തനം 83:18) ബൈബിളിനു ദിവ്യ ഉറവുണ്ടെന്നു നിങ്ങൾക്ക് ഒരുപക്ഷേ ബോധ്യമില്ലായിരിക്കാം. എന്നാൽ അതു പരിശോധിച്ചുകൂടേ? അതിലെ കാലാതീത ജ്ഞാനം പഠിക്കുകയും ധ്യാനിക്കുകയും ഒരുപക്ഷേ അതിന്റെ പ്രായോഗിക മൂല്യം മനസ്സിലാക്കുകയും ചെയ്തുകഴിയുമ്പോൾ, ബൈബിൾ യഥാർഥത്തിൽ എല്ലാവർക്കും വേണ്ടിയുള്ള ഒരു ഗ്രന്ഥമാണ്, അതിലുപരി, അതു നിങ്ങൾക്കു വേണ്ടിയുള്ള ഒരു ഗ്രന്ഥമാണ് എന്നു നിങ്ങൾ മനസ്സിലാക്കുമെന്നു ഞങ്ങൾക്കുറപ്പുണ്ട്.
[അടിക്കുറിപ്പുകൾ]
a വാച്ച്ടവർ ബൈബിൾ ആൻഡ് ട്രാക്റ്റ് സൊസൈറ്റി പ്രസിദ്ധീകരിച്ചത്.
b വിഷയോന്മുഖ ബൈബിൾ പഠനത്തിനു പലരെയും സഹായിച്ചിട്ടുള്ളതാണ് വാച്ച് ടവർ ബൈബിൾ ആൻഡ് ട്രാക്റ്റ് സൊസൈറ്റി ഓഫ് ഇൻഡ്യ പ്രസിദ്ധീകരിച്ച നിത്യജീവനിലേക്കു നയിക്കുന്ന പരിജ്ഞാനം എന്ന പുസ്തകം.