Fweny mar Johana 22:1-21
22 Kendo nosiemona aora moro mar pi ngima,+ pi maler ka kidi mar krustal, mamol koa e kom-loch mar Nyasaye kod mar Nyarombo,+
2 koridore e dier ndara maduong’ mar dalano. E bath aorano koni gi koni ne nitiere yiende mag ngima ma nyago olembe 12, yiendego ne nyago olembegi dwe ka dwe. Oboke yiendego e ma ne ichangogo ogendni.+
3 Bende, kuong’ moro amora ok nobedie kendo. To kom-loch mar Nyasaye kod mar Nyarombo+ nobed ei dalano, kendo wasumbnine biro tiyone;
4 mi ginine wang’e,+ kendo nyinge nobed e lela wang’gi.+
5 Bende, otieno ok nobedie kendo,+ ok ginidwar ler mar taya kata mar wang’-chieng’, nikech Jehova* Nyasaye biro menyonegi ler,+ kendo giniloch kaka ruodhi nyaka chieng’.+
6 Ne owachona kama: “Wechegi gin weche migeno kendo madier;+ ee, Jehova,* Nyasaye ma nowuoyo kokalo kuom jonabi,+ oseoro malaikane mondo onyis wasumbnine gik ma nyaka timre machiegni.
7 Neuru! Abiro mapiyo.+ Ng’at mamor en ng’atno ma luwo weche mokor mag buk modolni.”+
8 To an Johana, an e ma ne awinjo kendo neno gigo. Ka ne awinjogi kendo nenogi, ne apodho piny mondo alam e tiend malaika ma nosebedo ka nyisa gigo.
9 To nowachona kama: “Oooyo ngang’! Kik itim kamano! An mana misumba wadu gi mar oweteni ma gin jonabi kod mar jo ma luwo weche manie bugni. Lam Nyasaye.”+
10 Bende, nowachona niya: “Kik ilor weche mokor mag bugni kendo kik ituegi, nimar kinde ma noseket chiegni.
11 Ng’at ma ok kare osik e tim ma ok kare, kendo ng’at mochido osik e tim mochido; to ng’at makare osik e tim makare, kendo ng’at maler osik e tim maler.
12 “‘Neuru! Abiro mapiyo, kendo an-gi mich ma achiwo, mondo achul ng’ato ka ng’ato kaluwore gi timne.+
13 An e Alfa kendo an e Omega,*+ Jal mokwongo kendo mogik, chakruok kendo giko.
14 Jo mamor gin jo ma lwoko kandhogi+ mondo gibed gi thuolo mar dhi nyaka e yiende mag ngima,+ kendo donjo e dalano ka gikalo e rangeyene.+
15 Oko mar dalano nitiere guogi,* gi jo ma timo timbe-juok, gi joterruok,* gi jonek, gi jo ma lamo sanamu, gi ji duto mohero miriambo kendo ma timo timbe mopong’ gi wuond.’+
16 “‘An Yesu, e ma ne aoro malaikana mondo ochiwnu neno e wi gigi nikech jo ma ni e kanyakla. An e koth Daudi+ kendo anyuola mare, kendo an e sulwe mokinyi+ ma rieny maler.’”
17 To roho maler kod miaha+ siko ka wacho niya, “Bi!” kendo ng’ato ka ng’ato ma winjo mondo owach ni, “Bi!” kendo ng’ato ka ng’ato ma riyo omako mondo obi;+ ng’ato ka ng’ato mohero mondo omodh pi ngima nono.+
18 “Achiwo neno ne ng’ato ka ng’ato ma winjo weche mokor manie bugni: Ng’at momedo gimoro amora e wechegi,+ Nyasaye biro medone masiche mondik e bugni;+
19 to ng’at mogolo gimoro amora e weche mokor manie bugni, Nyasaye biro maye kare e yiende mag ngimago+ kod dala malerno,+ ee, weche mondik ei bugni.
20 “Jal ma chiwo neno e wi gigo wacho kama, ‘Ee, abiro mapiyo ahinya.’”+
“Amin! Bi, Ruoth Yesu.”
21 Ng’wono mogundho mar Ruoth Yesu mondo obed gi jo maler.
Weche Moler Piny
^ Som Apendiks A5.
^ Som Apendiks A5.
^ Kata, “An e A kendo Z.” Alfa e nyukta mokwongo e dho Grik, to Omega e nyukta mogik.
^ Tiende ni, jo ma timbegi odwanyore e wang’ Nyasaye.
^ Som Tiend Weche, “Terruok.”
