Fweny mar Johana 14:1-20

  • Nyarombo kod ji 144,000 (1-5)

  • Weche moa kuom malaike adek (6-12)

    • Malaika ma huyo e kor polo gi wach maber (6, 7)

  • Joma mor gin joma tho ka gin e winjruok achiel gi Kristo (13)

  • Keyo ariyo mag piny (14-20)

14  Eka ne arango mi ne aneno Nyarombo+ kochung’ e Got Sayun,+ kendo ne en gi ji 144,000+ ma nyinge gi nying Wuon mare+ ondik e lela wang’gi.  Ne awinjo dwol moko ka wuok e polo ma chal gi mor mar pige mang’eny, kendo ma chal gi mor polo maduong’; to dwol ma ne awinjogo ne chalo gi mag jower ma goyo nyatiti.  Kendo ne giwero wer moro ma ne nenore ni en wer manyien+ e nyim kom-lojno, kendo e nyim chuech mangima ang’wen-go+ kod jodongogo,+ to onge ng’at ma ne nyalo puonjore wendno malong’o, mak mana ji 144,000,+ ma oseng’iew koa e piny.  Magi e jo ma ne ok ochidore gi mon; kuom adier, gin jo ma silili.+ Gin e jo ma luwo Nyarombo kamoro amora ma odhiyoe.+ Ne ong’iew jogi+ kuom oganda dhano mondo gibed kaka nyak mokwongo+ ne Nyasaye kendo ne Nyarombo,  kendo onge miriambo moro amora ma ne oyud e dhogi; gionge gi mbala moro amora.+  Eka ne aneno malaika machielo ka fuyo e kor polo ka en gi wach maber ma nyaka chieng’ molando ne jo modak e piny, ne ogendni duto, gi dhoudi duto, gi dhok duto, kod pinje duto.+  Ne owacho gi dwol maduong’ niya: “Luoruru Nyasaye kendo umiye duong’, nikech sane mar ng’ado bura osechopo,+ omiyo, koro lamuru Jalno ma nochueyo polo, gi piny, gi nam,+ kod sokni mag pi.”  Malaika machielo mar ariyo ne oluwo ka wacho niya: “Ero, osepodho! Babulon Maduong’+ osepodho,+ ma en dhako ma ne miyo ogendni duto madho divai mar owruok gi gombone mar terruok!”*+  Malaika machielo mar adek ne oluwogi kowacho gi dwol maduong’ niya: “Ka ng’ato olamo ondiegno+ kod kido mare, mi oket ne ng’atno alama e lela wang’e, kata e lwete,+ 10  ng’atno bende biro madho divai mar mirimb Nyasaye ma iolo e okombe mar mirimbe+ ma ok oruw gi gimoro, kendo ibiro sande gi mach kod salfa*+ e nyim malaike maler kendo e nyim Nyarombo. 11  Kendo yiro mar sand margi dum malo nyaka chieng’,+ kendo onge yueyo odiechieng’ gotieno ne jo ma lamo ondiegno kod kido mare, kaachiel gi jo miketonegi alama mar nyinge.+ 12  Mano e momiyo biro dwarore ni jo maler momakore gi chike Nyasaye kendo moyie chuth+ kuom Yesu otim sinani.”+ 13  Eka ne awinjo dwol moro mowuok e polo ka wacho niya, “Ndik kama: Chakre sani, jo mamor gin jo motho ka gin e winjruok achiel gi Ruoth.+ Ee, roho wacho ni mondo giyue kuom tijgi matek, nimar gik ma ne gitimo dhi kodgi.” 14  Eka ne ang’iyo mi ne aneno bor polo ma rachar, kendo ng’at ma nobet e bor polono ne chalo gi wuod dhano+ kosidho osimbo mar dhahabu e wiye, kendo ne en gi pand keyo mabith e lwete. 15  Malaika machielo nochopo koa e hekalu, koluongo jal mobet e bor polono gi dwol maduong’ niya: “Kaw pandi mondo ichak keyo, nimar sa osechopo mar keyo, nikech piny osechiek.”+ 16  Eka jal ma nobet e bor polono nochako tiyo gi pandeno kuom piny, mi ne okayo piny. 17  To malaika machielo nobiro koa e hekalu manie polo, en bende ne en gi pand keyo. 18  To malaika machielo nobiro koa e kendo mar misango, kendo ne en gi teko e wi mach. Eka noluongo jal ma ne nigi pand keyo mabithno gi dwol maduong’ kowachone niya: “Ti gi pandi mabith mar keyono e kayo saga mag mzabibu mag piny, nimar olemb mzabibune osechiek.”+ 19  Malaikano nokayo piny gi pandeno kendo ne ochoko mzabibu mag piny, mowitogi ka ma duong’ mibiyoe divai mar mirimb Nyasaye.+ 20  Ne onyon mzabibugo ka ma ibiyoe divai oko mar dala, kendo remo ne owuok ka ma ibiyoe divaino ka idho malo mochopo nyaka e dho farese, kendo ne okwako ka ma borne dirom kilomita 296.*

Weche Moler Piny

E dho Grik en porneia. Som Tiend Weche.
Ma en kit poda moro ma mako mach mapiyo ahinya, kendo sa ma oliel ogolo tik mager kendo marach.
Stadia 1,600. Som Apendiks B14.