Fweny mar Johana 13:1-18
13 Kendo ne ochung’* kar tiende e kuoyo manie nam.
Eka ne aneno ondiek moro+ ka wuok ei nam,+ ne en gi tunge apar gi wiye abiriyo, kendo e wi tungenego ne nitie osimbo apar, to wiyenego ne nigi nyinge ma yanyo Nyasaye.
2 Koro ondiek ma ne anenono ne chalo gi kwach, to tiendene ne chalo gi tiende dubu, to dhoge ne chalo gi dho sibuor. Thuol mang’ongono+ ne omiyo ondiegno teko, gi kom-loch, kod telo maduong’.+
3 Achiel kuom wiyene ma ne aneno ne chalo ka gima nohinyore marach, kata kamano, koro nosechango,+ kendo piny duto noluwo ondiegno ka giwuoro kaka nolich.
4 Kendo ne gilamo thuol mang’ongono nikech ne osemiyo ondiegno teko mar loch, kendo ne gilamo ondiegno ka giwacho niya: “En ng’a ma chal gi ondiegni, kendo en ng’a ma nyalo kedo kode?”
5 Ne omiye dhok ma wacho gik madongo kod weche mag achaya, kendo ne omiye teko mar tich kuom dweche 42.+
6 Mi noyawo dhoge kowacho weche mag achaya+ e wi Nyasaye, mondo oyany nyinge gi kar dakne, to kata mana jo ma odak e polo bende.+
7 Ne oyiene kedo e lweny gi jo maler kendo loyogi,+ kendo ne omiye teko e wi dhoudi duto, gi pinje duto, gi dhok duto, kod ogendni duto.
8 Kendo ji duto modak e piny biro lame. Nyaka a chakruok mar piny, onge kata nying ng’ato achiel kuomgi mosendik e buk modol mar ngima+ mar Nyarombo ma ne oseyang’.+
9 Ng’at ma nigi it mondo owinji.+
10 Ka nitie ng’at ma nyaka ter e tuech, obiro dhi e tuech. To ng’at moneko gi ligangla,* nyaka nege gi ligangla.+ Mano biro dwaro ni jo malergo+ obed gi sinani+ kod yie.+
11 Eka ne aneno ondiek machielo ka wuok ei piny, kendo ne en gi tunge ariyo ka mag nyarombo, to nochako wuoyo kaka thuol mang’ongocha.+
12 Otiyo gi teko duto mag ondiek mokwongocha+ ka en e nyim ondiegno. Bende, omiyo piny kod jo modak e iye lamo ondiek mokwongono, ma koro wiye ne osechango.+
13 Kendo otimo ranyisi madongo, ka omiyo kata mana mach lor koa e polo nyaka e piny ka oganda dhano neno.
14 Owuondo jo modak e piny nikech ranyisi ma ne oyiene timo e nyim ondiegno, ka owacho ne jo modak e piny mondo gilos kido+ mar ondiek ma nosego gi ligangla to koro nosechango.+
15 Bende, ne oyiene miyo kido mar ondiegno muya, mondo kido mar ondiegno owuo kendo mondo omi oneg ji duto ma tamore lamo kido mar ondiegno.
16 Oketo ji duto e bwo achune—jo matindo gi jo madongo, jomwandu gi jo modhier, jo ma ni thuolo kod wasumbni—mondo oket ne jogo alama e lwetgi korachwich, kata e lela wang’gi,+
17 kendo mondo kik ng’ato ang’ata ong’iep kata ous, mak mana ng’at moseketne alamano, ma en nying+ ondiegno kata namba mochung’ ne nyingno.+
18 Mano dwaro ni ng’ato obed gi rieko: Ng’at ma nyalo nono weche e yo matut mondo ogo kwan mar namba mar ondiegno, nimar en namba mar dhano, kendo nambaneno en 666.+
