Yesu Kristo​—Misonari Maduong’ie Moloyo

‘Aa kuome, kendo En e ma noora.’​—JOHA. 7:29.

1, 2. Misonari en ng’ama timo ang’o, to en ng’a minyalo wachi ni e Misonari maduong’ie moloyo?

ANG’O mabiro e pachi kiwinjo kiwacho ni, “misonari”? Gima biro e pach jomoko, en jomisonari mag jogo maluongore ni Jokristo ma ng’enygi ohero donjore gi siasa koda weche ohala e pinje ma gitiyoe. Kata kamano, kaka achiel kuom Joneno mag Jehova, nyalo bedo ni iparo jomisonari ma Bura Maduong’ mar Joneno mag Jehova osebedo ka oro mondo oland wach maber kuonde mopogore opogore e piny. (Math. 24:14) Jo misonarigi chiwore chuth e tiyo gi thuolo koda tekogi e timo tich maber mar konyo ji sudo machiegni gi Jehova Nyasaye, kendo mondo gibed gi winjruok majaber kode.​​—⁠Jak. 4:8.

² Weche ma itiyo godo ni “misonari” kata “jo misonari” ok yudore ei Muma mar New World Translation of the Holy Scriptures. Kata kamano, e Jo Efeso 4:​11, Muma mar Reference Bible nyiso ni wach ma oti godo e dho-Grik ni ‘joyal wach maber’ bende inyalo loki ni “jo misonari.” Jehova e Jayal wach maber maduong’ie moloyo, to kata kamano ok nyal luonge ni Misonari maduong’ie moloyo, nimar onge ng’ato ang’ata ma ne oore. Kata kamano, kowuoyo kuom Wuon mare manie polo, Yesu Kristo nowacho kama: ‘Aa kuome, kendo En ema noora.’ (Joha. 7:​29) Konyiso hera maduong’ ne oganda dhano e piny, Jehova nooro Wuode ma miderma e piny. (Joha. 3:​16) Inyalo luong Yesu ni Misonari maduong’ie moloyo, kendo maberie moloyo nikech achiel kuom gik ma ne omiyo oore e piny, ne en ni mondo ‘obed janeno kuom adiera.’ (Joha. 18:37) Ne otiyo tij lando wach maber mar Pinyruoth e yo maber chuth, kendo pod waneno ber mag tich ma ne otimono. Kuom ranyisi, wanyalo luwo yorege mag puonjo e tijwa mar lendo, kata bed ni omiwa migawo kaka jo misonari kata ok omiwa.

3. Gin penjo mage ma wabiro nono?

³ Migawo ma Yesu ni godo kaka jayal wach Pinyruoth miyo wapenjore penjogi: Ang’o ma notimore ne Yesu kane otiyo tije mar lendo? Ang’o momiyo yorege mag puonjo ne tiyo maber? Kendo ang’o ma ne omiyo ochopo tije mar lendo e yo maber chuth?

Bedo Joma Oikore Lendo Kuonde Manyien

4-6. Moko kuom lokruok ma ne otimore ne Yesu kane oore e piny ne gin mage?

⁴ Nyalo dwarore ni jo misonari ma kindegi kaachiel gi Jokristo moko ma dar to dhi kuonde ma joyal wach Pinyruoth dwaroree ahinya, ong’i kod ngima mayot mayudore kuondego mopogore gi kuonde ma giwuokie. Kata kamano, ok wanyal kata pimo pogruok ma ne nitie e ngima ma Yesu ne nigo e piny ka, koda  ma ne en-go e polo kuma ne odakie gi Wuon mare ka en e kind malaike ma ne tiyo ne Jehova gi chuny maler. (Ayub 38:7) Mano kaka ne en pogruok maduong’ ndi, dak e kind dhano ma joricho e piny marachni! (Mari. 7:​20-​23) Bende, nochuno Yesu nano nikech piemruok e kind jopuonjrene ma ne chiegni kode ahinya. (Luka 20:46; 22:24) En adier ni Yesu noloyo e yo maber chuth, chandruoge duto ma ne oromo godo kane en e piny.

⁵ Yesu ok ne opuonjore e yor hono dhok ma dhano tiyogo, to nochako puonjore dhokno ka en nyathi matin. Mano kaka ne en lokruok maduong’ ahinya kuom jal ma ne oyudo nigi teko mar chiko malaike e polo! Kane en e piny, Yesu ne tiyo gi achiel kuom “dhok mag ji.” Ne en dhok mopogore chuth gi ‘dho malaika.’ (1 Kor. 13:1) Kata kamano, kodok korka tiyo gi weche mang’won, onge dhano ma ne osewuoyoe kaka Yesu.​​—⁠Luka 4:​22.

⁶ Par ane yore mamoko ma lokruok madongo ne otimore ne Wuod Nyasaye kane obiro e piny. Kata obedo ni ne ok onyuol Yesu e richo mar Adam, ne obedo dhano, mana kaka jogo ma ne dhi bedo “owetene,” kata jolupne mowal kuom roho. (Som Jo Hibrania 2:​17, 18.) Otieno mogik kapok otho, Yesu ok nokwayo Wuon mare manie polo mondo oorne “ogend malaika mag lweny ma kwangi okadho apar gariyo.” To kata kamano, par ane malaike ma en owuon ne ochiko ka en Mikael malaika Maduong’! (Math. 26:53; Juda 9) Ee, Yesu notimo honni; to kata kamano, gigo ma notimo ka en e piny ne tin kipimo gi gigo ma ne dotimo e polo.

7. Yesu ne winjo nade kane oneno kaka Jo-Yahudi ok lok tiend Chik e yo makare?

⁷ Ka Yesu ne nie polo ka en “Wach,” nyaka bed ni en ema ne en Jal ma ne wuoyo e lo Nyasaye ka tayo Jo-Israel e thim. (Joha. 1:1; Wuok 23:​20-​23) Kata kamano, ne gin ‘jo ma noyudo Chik ma malaika nokelo, to ok ne gimako.’ (Tich 7:​53; Hibr. 2:​2, 3) Kuom adier, jotend din mar Jo-Yahudi ma nodak e kinde Yesu, ok ne ofwenyo tiend bedo gi Chik. Kaw ane chik Sabato kaka ranyisi. (Som Mariko 3:​4-6.) Jondiko gi Jo Farisai ne ‘weyo weche madongo ma Chik dwaro; kaka ng’ado bura kare, bedo mang’won, kendo bedo ja adier.’ (Math. 23:23) Kata kamano, mano ne ok onyoso chuny Yesu moweyo lando adiera.

8. Ang’o momiyo Yesu nyalo konyowa?

⁸ Yesu ne nigi chuny moikore konyo. Hera ma ne en-go kuom ji ne omiyo obedo gi gombo ahinya mar konyogi. Ne ok olalo chuny mar lando wach maber gi kinda. To nikech ne omakre motegno gi Jehova ka en e piny, Yesu “nodoko jachiw warruok mochwere ni jogo duto ma winjo wachne.” E wi mano, “en owuon osekadho e tem mar neno masira, omiyo onyalo konyo jogo [kaka wan] mitemo.”​​—⁠ Hibr. 2:​18; 5:​8, 9.

Ne Otiege Maber Kaka Japuonj

9, 10. Yesu ne oyudo tiegruok machalo nade kane pok oore e piny?

⁹ Kapok oor Jokristo ma kindegi kaka jo misonari, Bura Maduong’ losonegi chenro mondo giyud tiegruok. Be Yesu Kristo ne oyudo tiegruok? Ee, to kata kamano ne ok osomo e skunde mag jo Rabbi kapok ne owale kaka Mesia; to bende ne ok opuonje e nyim jotelo moko ma ne ong’ere ahinya mag din. (Joha. 7:​15; pim gi Tich Joote 22:3.) Kare ang’o momiyo Yesu ne olony ahinya e puonjo?

¹⁰ Kata bed ni Yesu ne oyudo tiegruok manade kuom Mariam min mare koda Josef wuon mare ma ne opidhe, ne oyudo tiegruok maduong’ moloyo e tije mar Nyasaye kowuok kuom Japuonj mamalo moloyo chuth. Kaluwore gi wachno, Yesu ne owacho kama: “Ok asewacho gi tekona awuon, to Wuoro ma noora, en ema nomiya chik gi ma onego awachi, kendo gi ma onego aluw.” (Joha. 12:49) Ne ni ne onyis Wuowi weche ratiro ma ne onego opuonj. Kapok ne obiro e piny, onge kiawa ni Yesu ne okawo kinde mang’eny ka owinjo puonj mag Wuon mare. Be nitie ng’at ma ne nyalo miye puonj maber maloyo Jehova?

11. Ang’o ma Yesu ne opuonjore kuom neno paro ma Wuon mare ne nigo kuom dhano?

 ¹¹ Chakruok ne chweye, Wuowi ne nigi winjruok machiegni ahinya gi Wuon mare. Kane pok obedo dhano, Yesu noneno paro ma Nyasaye ne nigo kuom dhano koneno kaka Jehova ne timo ne dhano. Hera ma ne Nyasaye nigo kuom dhano ne onenore kuom Wuowi, e okang’ ma kane iwuoyo kuome kaka rieko e bug Ngeche, Wuowi ne nyalo wacho kama: “Namor gi yawuot ji.”​​—⁠Ngeche 8:​22, 31.

12, 13. (a) Yesu ne opuonjore e yo mane kuom neno kaka Wuon mare ne timo ne Jo-Israel? (b) Yesu ne otiyo nade gi tiegruok ma ne oyudo?

¹² Tiegruok ma Wuowi ne oyudo ne oriwo nyaka neno kaka Wuon mare ne timo sama weche ne dhi matek. Kuom ranyisi, par ane kaka Jehova ne otimo ne Jo-Israel ma ne ng’anjo. Nehemia 9:​28 wacho kama: “Bang’ ka gisebet gi kuwe, ne gichako gitimo maricho e nyimi kendo; kuom mano nijwang’ogi kiweyogi e luet jowasikgi, mondo gibed gi loch kuomgi: to ka ne giduogo kendo yuakni, niwinjogi gi e polo; ndalo mang’eny niresogi mana nikech miwafu mari.” Kuom tiyo gi Jehova kendo neno kaka ne otimo gik moko, Yesu bende ne obedo gi chuny mar kecho ji e alwora mare.​​—⁠Joha. 5:​19.

¹³ Yesu ne otiyo gi tiegruok ma ne oyudo kuom kecho jopuonjrene. E otieno ma ne othoe, jootene duto ma ne ohero ahinya “noweye, mi giringo.” (Math. 26:56; Joha. 13:1) Kata mana jaote Petro ne okwede didek! Kata kamano, Yesu ne oweyo ne jopuonjrene thuolo mar duogo ire. Ne owacho ne Petro kama: “Asesayoni, mondo yieni kik rem; kendo in kiselokori, sir oweteni.” (Luka 22:32) Oseger Israel mowal kuom roho e wi mise mar “joote gi johul wach,” kendo kite mag ohinga mar Jerusalem Manyien oting’o nyinge joote 12 ma ne ochung’ motegno, ma gin joote Nyarombo, Yesu Kristo. Nyaka chil kawuono, Jokristo mowal kuom roho kaachiel gi jowetegi ma gin ‘rombe mamoko,’ nya ahinya ka gin riwruok mar oganda  malando wach Pinyruoth manie lwet Nyasaye ma nigi teko, kendo e bwo telo mar Wuode mohero.​​—⁠Efes. 2:​20; Joha. 10:16; Fwe. 21:14.

Kaka Yesu Ne Puonjo

14, 15. Yo ma Yesu ne puonjogo ne opogore gi mar jondiko gi Jo Farisai nade?

¹⁴ Yesu ne otiyo nade gi tiegruok ma ne oyudo e puonjo jolupne? Ka wapimo kaka Yesu ne puonjo kod kaka jotend din Jo-Yahudi ne puonjo, waneno maler ni yo ma Yesu ne puonjogo ne ni malo moloyo. Jondiko kod jo Farisai ‘noketho chik Nyasaye nikech timgi.’ Mopogore gi mano, weche ma Yesu ne wacho ok ne a kuome owuon; ne omakre gi wach Nyasaye. (Math. 15:6; Joha. 14:10) Mano e gima wan bende onego watim.

¹⁵ Nitie gimachielo ma bende ne omiyo Yesu opogore gi jotend din. Kowuoyo kuom jondiko gi Jo Farasai nowacho kama: “Gigo duto ma giwacho mondo urit, rituru kendo timuru.To kik utim kaka gitimo; nikech giwacho, to ok gitim.” (Mathayo 23:3) Yesu ne timo kaluwore gi gigo ma ne opuonjo. We wanon ane ranyisi masiro wachno.

16. Ang’o momiyo inyalo wacho ni Yesu nodak kaluwore gi wechene mayudore e Mathayo 6:​19-​21?

¹⁶ Yesu ne ojiwo jopuonjrene mondo ‘okan mwandu e polo.’ (Som Mathayo 6:​19-​21.) Be Yesu owuon ne odak kaluwore gi wachno? Ee, nimar ne onyalo wacho kuome owuon gadier kama: “Bwe ni gi buchegi, kendo winy mag polo ni gi utgi; to Wuod dhano onge ka ma doketie wiye.” (Luka 9:​58) Yesu ne odak e ngima mayot. Tich maduong’ ma ne otimo ne en mar lando wach maber mar Pinyruoth, kendo ne onyiso tiend dak ma onge parruok mabedoe nikech kano mwandu e piny. Yesu ne onyiso kaka en gima ber moloyo kano mwandu e polo, “ka ma olwenda kata nyal ok kethoe, to jokuo ok pow kata kwaloe.” Be iluwo jip ma Yesu nochiwo kuom wach kano mwandu e polo?

Kido Ma Ne Ywayo Ji Ir Yesu

17. Gin kido mage ma ne omiyo Yesu nobedo jayal wach maduong’ie moloyo?

¹⁷ Gin kido mage ma ne omiyo Yesu obedo jayal wach maduong’ie moloyo? Achiel kuomgi ne en paro ma ne en-go kuom ji. Moko kuom kido mabeyo mag Jehova ma Yesu ne nyiso ne gin bolruok, hera koda kecho ji. Ne ane kaka kidogi ne ywayo ji mang’eny ir Yesu.

18. Ang’o momiyo inyalo wach ni Yesu ne obolore?

¹⁸ Bang’ yie ote mar biro e piny, Yesu “notimore obet nono, kokawo kit misumba, kendo kobet e kido machal gi dhano.” (Fili. 2:7) Mano ne en tim mar bolruok. E wi mano, Yesu ne ok ochayo ji. Ne ok en gi paro e chunye ni, nikech ne owuok e polo, koro en ema ji ne onego owinje. Mopogore gi mesia mag miriambo, Yesu ne ok wuothi ka opakore owuon ni en e Mesia madier. Kinde moko ne okwero ji mondo kik nyis jomoko ni ne en ng’a kata gima ne osetimo. (Math. 12:​15-​21) Yesu ne dwaro mondo ji oluwe kaluwore gi paro ma ging’ado kuom gima gin giwegi giseneno. Mano kaka jootene ne oyudo kony, nikech Ruodhgi ne ok en jal madwaro ni gitim gik moko ka malaike ma onge richo ma ne oyudo osedakgo e polo!

19, 20. Hera koda kecho ji nomiyo Yesu okonyo ji nade?

¹⁹ Yesu Kristo bende ne onyiso hera, ma e kido maduong’ie mar Wuon mare me polo. (1 Joha. 4:8) Yesu ne puonjo joma ne winje nikech hera ma ne en-go kuomgi. Kuom ranyisi, ne ane paro ma ne en-go kuom ruoth moro ma rawera. (Som Mariko 10:​17-​22.) Yesu ‘ne ohere’ kendo ne dwaro mondo okonye, kata kamano ruodhno ne ok oyie weyo mwandune mondo eka obed jalup Kristo.

²⁰ Achiel kuom kido mabeyo mag Yesu ne en kecho ji. Mana kaka dhano duto ma joricho, jogo ma ne rwako puonjne ne nigi chandruoge mopogore opogore. To nikech nong’eyo mano, Yesu ne puonjogi kokechogi kendo konenonegi miwafu. Kuom  ranyisi: Kinde moro, Yesu kaachiel gi jootene ne odich ahinya ma kata ne ok ginyal chiemo. Kata kamano, Yesu nowinjo nade e chunye kane oneno oganda maduong’ kochokre? “Nokechogi, nikech ne gin kaka rombe ma onge jakwath. To nochako puonjogi weche mang’eny.” (Mari. 6:​34) Yesu noneno kaka chal mar joma ne odak e alworane ne rach, mi nochiwore e puonjogi kendo timo honni mondo okonygi. Kidone mabeyo koda wechene ne oywayo jomoko mobedo jopuonjrene.

21. Ang’o ma wabiro puonjore e sula maluwo?

²¹ Nitie weche ma moko mang’eny mwanyalo puonjore kuom tij lendo ma Yesu ne otimo e piny, mana kaka sula maluwo biro nyiso. Gin yore mage mamoko mwanyalo luwogo ranyisi mar Yesu Kristo, ma en Misonari maduong’ie moloyo?

Inyalo Chiwo Dwoko Mane?

• En tiegruok mane ma Yesu noyudo kapok ne obiro e piny?

• Yo ma Yesu ne puonjogo ne oloyo nade yo ma jondiko gi Jo Farisai ne puonjogo?

• Gin kido mage ma ne ywayo ji ir Yesu?

[Penjo mag Puonjruok]

[Picha manie ite mar 18]

Yesu ne puonjo oganda ji e yo mane?