Pinyruodh Nyasaye Nobi Karang’o?
Pinyruodh Nyasaye Nobi Karang’o?
“RUOTH, ndalogi e ma nidwokie pinyruoth ni Israel koso?” (Tich Joote 1:6) Joote ne gombo ahinya ng’eyo kinde ma Yesu ne dhi chungoe Pinyruodhe. E ndalogi, bang’ higini madirom 2,000, ji podi gombo ng’eyo ni: Pinyruodh Nyasaye nobi karang’o?
Nikech wach maduong’ ma Yesu ne lando ne en wach Pinyruoth, inyalo paro ni nyaka bed ni ne olero wachni. Kuom adier, ne otimo kamano! Ne owuoyo nyading’eny e wi kinde moro ma oseketi, ma ne oluongo ni kinde “bedoe mare.” (Mathayo 24:37, NW ) Kinde mar bedoe mareno otudore machiegni kod chungo Pinyruodh Mesia. To kare kinde mar bedoe mareni en kinde mane? We wanon ane adiera moko ang’wen ma Muma fwenyonwa kuom wach kinde bedoe mar Kristo.
1. Bedoe mar Kristo ne dhi chakore ndalo mang’eny bang’ thone. Yesu nochiwo ngero moro kowuoyo kuome owuon kaka jal ma ne odhiyo “e piny mabor ni mondo oyud pinyruoth.” (Luka 19:12) Wach ma ne okor e ngerono nochopo nade? En niya, Yesu ne otho, mi ochiere, kae to odhi wuoth “e piny mabor,” tiende ni e polo. Mana kaka Yesu nokoro e ngero machielo machalo gi mano, duoke e teko mar pinyruoth ne dhi timore mana “bang’ ndalo mang’eny.”—Mathayo 25:19.
Higini moko bang’ Yesu dhi e polo, jaote Paulo nondiko kama: “Kristo notimo misango achiel mosiko nyaka chieng’ nikech richo; kendo osebet piny e bad Nyasaye korachwich. Chakre kindeno orito nyaka wasike otim raten tiende.” (Jo Hibrania 10:12, 13) Omiyo, bang’ Yesu chopo e polo, ne orito kuom ndalo mang’eny. Ndalo mar ritono nochopo e gikone kane Jehova Nyasaye oketo Yesu Wuode mondo obed Ruoth e Pinyruodh Mesia, ma ne okor wachne chon. Mano e kinde ma bedoe mar Kristo ne ochakoree. Be dhano e piny ne dhi neno gima kende ma ne timoreni?
2. Kinde bedoe mar Kristo, ok ne gi wang’ dhano. Ng’e ni, Yesu nowuoyo kuom ranyis mar bedoe mare. (Mathayo 24:3) Ka bedoe mare en gima dhano ne dhi neno gi wang’, be ranyisi nochuno? Kaw ane ranyisini: Wawach ni idwaro dhi neno nam maduong’. Sama koro idhi, ineno sain kata ranyis mag ndara moket mondo otayi, to kisechopo e dho wath makoro nam nie nyimi kama, be podi ibiro dwaro ni ine sain kata gima ondiki gi nyukta madongo kawacho ni, “Nam” pod ni nyime? Ooyo! To kare ang’o ma podi nyalo miyo imany ranyisi mar gima ineno maler gi wang’i?
Yesu nochiwo ranyis mar bedoe mare, ok ni mondo onyis gimoro ma dhano ne nyalo neno gi wang’gi, to mana makonyogi fwenyo gimoro ma ne dhi timore e polo. Omiyo, Yesu nowacho ni: “Pinyruodh Nyasaye ok bi ka ukiye ni obiro.” (Luka 17:20) Kare ere kaka ranyisino ne dhi miyo joma nie piny ofweny ni bedoe mar Kristo osechakore?
3. Masiche madongo e pinyka, ne dhi chiwo ranyis mar bedoe mar Yesu. Yesu nowacho ni, lwenje, kech, yiengini mag piny, tuoche, koda ketho chik, ne dhi chiwo ranyis mar bedoe mare kaka Ruoth e polo. (Mathayo 24:7-12; Luka 21:10, 11) En ang’o ma ne dhi kelo chandruogegi duto? Muma lero ni, Satan ma en “jaloch pinyni,” opong’ gi mirima nikech ong’eyo ni ndalone koro tin ahinya, nikech bedoe mar Kristo kaka Ruoth osechakore. (Johana 12:31; Fweny 12:9, 12) Ranyisi mang’eny ma kamago manyiso mirimb Satan koda bedoe mar Kristo e loch osenenre ahinya e piny. To moloyo, chakre 1914, higa ma josomo oyie ni lokruok maduong’ ne otimore e piny, ranyisi bedoe mar Kristo e loch osenenore e okang’ maduong’ ahinya, kendo e piny mangima.
Gik matimoregi duto nyalo nenre ka weche ma ok chiw geno, to ok en kamano. Wechegi nyiso ni Pinyruodh Mesia sani locho e polo. E kinde mokayo machiegni, sirkandno biro bedo gi loch e wi pinyni duto. Kata kamano, dhano ne dhi ng’eyo nade wach Pinyruodhno mondo omi girwak lojno mi gibed e bwoye?
4. Tij lendo matimore e piny mangima en ranyisi mar bedoe mar Yesu. Yesu nowacho ni kinde mar bedoe mare ne dhi chalo ‘kaka ndalo mag Noa.’ * (Mathayo 24:37-39) Noa ok ne otiyo mana tij gero yie kende; to bende ne en “jayal wach makare.” (2 Petro 2:5) Noa ne siemo ji ni buch Nyasaye ne chiegni. Yesu nowacho ni, jolupne e piny bende ne dhi tiyo tich machalo kamano e kinde mar bedoe mare. Ne okoro kama: “Wach Maberni mar pinyruoth nolandre e pinje duto, mondo obed ranyis ni ogendini duto; eka giko nobi.”—Mathayo 24:14.
Mana kaka ne waneno e sula motelo, Pinyruodh Nyasaye biro ketho sirkande duto mag pinyni. Tij lendo miyo ji ng’eyo ni sirkand poloni chiegni kawo okang’, kendo tijno miyo ji duto thuolo mar tony e kethruok mabiro mondo gibi gibed e bwo Pinyruodhno. Omiyo, penjo maduong’ en mae, In ibiro timo ang’o?
Be Pinyruodh Nyasaye Biro Bedoni Wach Maber?
Wach ma Yesu ne lando ne en geno ma ok nyal poro gi machielo. Bang’ ng’anjo ma ne otimore e Eden higini gana mang’eny mosekalo, Jehova Nyasaye noketo dwaro mar chungo sirkal moro ma ne dhi rieyo gik moko, ka duoko dhano makare e ngima ma Nyasaye ne dwaronegi kar chakruok, tiende ni, ngima manyaka chieng’ e paradis e pinyka. En wach mane manyalo morowa maloyo ng’eyo ni sirkal ma ne osing wachne chonni, sani locho e polo? Sirkandno ok en mana gima iparo apara, to en sirkal ma nitie gadier!
Gie sani, Ruoth ma Nyasaye oseketo, locho e dier wasike. (Zaburi 110:2) E piny marach ma Nyasaye osekwedoni, Mesia chopo gombo mar Wuon mare mar manyo jogo duto madwaro ng’eyo Nyasaye gadier, kendo lame “e chuny kendo e adiera.” (Johana 4:24) Geno mar dak nyaka chieng’ e bwo loch mar Pinyruodh Nyasaye en mar ji mawuok e kit ogendini duto. (Tich Joote 10:34, 35) Wajiwi mondo ikaw thuolo majaber ma osemiyi. Puonjri wach Pinyruodh Nyasaye sani, mondo omi ibi idag e bwo loch makare nyaka chieng’!—1 Johana 2:17.
[Weche moler piny]
^ par. 10 Gima Yesu nowachono konyowa rieyo paro ma ok kare ma ji thoro bedogo nikech yo ma loko moko mag Muma lokogo wach ma Yesu notiyogo ni “bedoe.” Loko moko tiyo gi weche kaka “biro,” “chopo,” kata “duogo,” to wechegi duto nyiso mana kinde moro machuok ma kadho mapiyo. Kata kamano, ng’e ni, Yesu ok nowacho ni bedoe mare chalo gi Ataro mar pi, ma en gima ne otimore machuok, to nowacho ni bedoe mare chalo gi ‘ndalo mag Noa,’ ma en gima nokawo kinde. Mana kaka ndalogo, bedoe mar Kristo ne dhi kawo kinde, kendo e kindego ji ne dhi dich ahinya e ngimagi mapile ma ok gidew siem ma imiyogi.