Injili mar Johana 13:1-38
13 Yesu nong’eyo ka sawo mar Pasaka pok ochopo ni sane mar a e pinyni kodok ir Wuoro nosechopo.+ Nosebedo kohero joge owuon ma ne ni e piny kendo noherogi nyaka giko.+
2 Chiemo modhiambo ne pod dhi nyime, kendo Jachien nosedonjo e chuny Judas Iskariot+ wuod Simon mondo ondhoge.+
3 Kuom mano, nikech Yesu nong’eyo ni Wuoro nosechiwo gik moko duto e lwete, ni noa ir Nyasaye kendo ne odhi dok ir Nyasaye,+
4 noa malo ka pod chiemo modhiambono dhi nyime, kae to noketo lepe ma oko tenge. Eka nokawo taulo mi otueyo e nungone.+
5 Bang’ mano, noolo pi e besen mi ochako lwoko tiende jopuonjrene kendo twoyogi gi taulo ma notueyo.
6 To ka nochopo ir Simon Petro, Petro ne openje niya: “Ruoth, idwaro lwoko tiendena adier?”
7 Yesu nodwoke kama: “Ok ing’eyo tiend gima atimo sani, to ibiro ng’eyo tiende bang’e.”
8 Petro nowachone niya: “Ok ibi lwoko tiendena ngang’.” Yesu nodwoke kama: “Ka ok alwoko tiendeni,+ to ionge gi pok koda.”
9 Simon Petro nowachone niya: “Ruoth, kik ilwok mana tiendena kende, to lwok lwetena kod wiya bende.”
10 Yesu nokone niya: “Ng’at moselwokore ilwokone mana tiendene kende, nimar dende duto ler. Un uler, to ok uduto.”
11 Nimar nong’eyo jal ma ne dhi ndhoge.+ Mano e momiyo nowacho ni: “Ok uler uduto.”
12 Ka noselwoko tiendegi mi orwako lepe ma oko, nobet kendo e mesa, mowachonegi niya: “Be ung’eyo tiend gima asetimonu?
13 Un uluonga ni, ‘Japuonj,’ kendo ni, ‘Ruoth,’ to un kare nikech an kamano.+
14 Kuom mano, ka an Ruoth kendo Japuonj e ma aselwoko tiendeu,+ un bende onego* ulwok tiende joweteu.+
15 Nimar aketonu ranyisi, mondo utim kaka asetimonu.+
16 Adier, adier, awachonu ni, misumba ok duong’ moloyo ruodhe, kata ng’at moor ok duong’ moloyo ng’at moore.
17 Kung’eyo wechegi, un jo mamor ka utimogi.+
18 Ok awuo kuomu uduto; ang’eyo jo ma aseyiero. To en kamano mondo Ndiko ochop+ ma wacho niya: ‘Ng’at ma ne chiemo koda oselokore jasika.’*+
19 Chakre sani ka dhi nyime, awachonu wachno ka pok otimore mondo ka otimore to uyie ni anie en.+
20 Adier, adier, awachonu ni, ng’at ma rwako ng’at ma aoro, orwaka an bende,+ kendo ng’at ma orwakano, orwako bende Jal ma ne oora.”+
21 Bang’ wacho wechegi, chuny Yesu nochandore, kendo nochiwo neno niya: “Adier, adier, awachonu ni, ng’at achiel kuomu biro ndhoga.”+
22 Jopuonjrene nong’iyore ka giwuoro ni en ng’a ma nowuoyo kuome.+
23 Japuonjre moro ma Yesu nohero ahinya+ nobet bute.
24 Omiyo, Simon Petro nogwelo japuonjreno mopenje niya: “Wachnwae ni owuoyo kuom ng’a.”
25 Kuom mano, japuonjreno nomedo sudo machiegni gi Yesu mopenje kama: “Ruoth, en ng’a?”+
26 Yesu nodwoko kama: “En ng’atno ma abiro miyo makate ma aseluto e bakul.”+ Ka noseluto makate, nomiyo Judas, wuod Simon Iskariot.
27 Bang’ ka Judas nosekawo makateno, Satan nodonjo kuome.+ Omiyo, Yesu nowachone kama: “Gima idwaro timo, time mapiyo.”
28 Kata kamano, onge ng’ato kuom jo ma nobet e mesa ma nong’eyo gimomiyo nowachone kamano.
29 Nikech Judas ne jating’o sandug pesa,+ moko kuomgi ne paro ni Yesu ne wachone ni, “Ng’iew gik ma dwarore ni watigo e sawo,” kata ni onego omi jo ma odhier gimoro.
30 Bang’ kawo makateno, nowuok oko gikanyono. To ne en otieno.+
31 Ka koro Yesu nosewuok oko, nowachonegi niya: “Koro Wuod dhano osemi duong’,+ kendo Nyasaye yudo duong’ kokalo kuome.
32 Nyasaye owuon biro miye duong’,+ kendo obiro miye duong’ gikanyono.
33 Osiepena,* pod an kodu mana kuom kinde matin. Ubiro manya; to mana kaka nawacho ne Jo-Yahudi ni, ‘Kama adhiyoe ok unyal biroe,’+ koro awachonu un bende.
34 Amiyou chik manyien, ni ubed gi hera e kindu; mana kaka aseherou,+ un bende herreuru e kindu.+
35 Ma e ma nomi ji duto ong’e ni un jopuonjrena ka un gi hera e kindu uwegi.”+
36 Simon Petro nopenje kama: “Ruoth, idwaro dhi kanye?” Yesu nodwoko niya: “Ka ma adhiyoe ok unyal luwae sani, to ubiro luwa bang’e.”+
37 Petro nokone kama: “Ruoth, ang’o momiyo ok anyal luwi sani? Abiro chiwo ngimana nikech in.”+
38 Yesu nodwoko niya: “Be inyalo chiwo ngimani nikech an? Adier, adier, awachoni ni, thwon-gweno ok bi kok ngang’ ka pok ikwer nyadidek ni ok ing’eya.”+
Weche Moler Piny
^ Kata, “un bende un gi ting’.”
^ Grik, “oseting’ona ofunj tiende.”
^ Grik, “nyithindo matindo.”
