Injili mar Johana 10:1-42

  • Jakwath kod kund rombe (1-21)

    • Yesu e jakwath maber (11-15)

    • “An gi rombe mamoko” (16)

  • Jo-Yahudi kwedo Yesu e Sawo mar Walo Hekalu (22-39)

    • Jo-Yahudi mang’eny otamore yie (24-26)

    • “Rombena winjo dwonda” (27)

    • Wuoyi ni e winjruok achiel gi Wuon mare (30, 38)

  • Ji mang’eny oyie kuom Yesu loka Jordan (40-42)

10  “Adier, adier, awachonu ni, ng’at ma ok luw dhoot sa ma odonjo e kund rombe, to odonjo gi yo machielo, ng’atno en jakuo kendo en jayeko.+  To ng’at ma luwo dhoot en jakwadh rombe.+  Jarit-dhoot yawone+ kendo rombe winjo dwonde,+ kae to oluongo rombene gi nyingegi, eka otayogi kogologi oko.  Ka osegolo rombene duto oko, otelo e nyimgi kae to rombego luwo bang’e, nikech ging’eyo dwonde.  Ok gibi luwo ng’at ma gikia ngang’, to gibiro ringo ng’atno, nikech ok ging’eyo dwond welo.”  Yesu nogoyonegi ngerono, to ne ok ging’eyo tiend gik ma nowachonegi.  Omiyo, Yesu nowachonegi kendo niya: “Adier, adier, awachonu ni, an e dhood rombe.+  Ji duto ma ne owuondore gi nyinga, gin jokuo kendo joyeko; to rombe ne otamore winjogi.  An e dhoot; ng’at ma donjo kokalo kuoma, ibiro rese, kendo obiro donjo iye mi owuog oko kendo onwang’ chiemo.+ 10  Jakuo biro mana ni mondo okwel, onek, kendo oketh gik moko.+ An to asebiro mondo rombe oyud ngima kendo giyude mogundho. 11  An e jakwath maber;+ jakwath maber chiwo ngimane ne rombe.+ 12  Jakwath mondiki ma ok en wuon rombe, ringo sa ma oneno ka ondiek biro mi ojwang’ rombe. Eka ondiek monjo rombe kendo keyogi. 13  Oringo nikech en ng’at mondik tich kendo ma ok dew rombe. 14  An e jakwath maber. Ang’eyo rombena kendo rombena bende ong’eya+ 15  mana kaka Wuora ong’eya to an bende ang’eyo Wuora;+ kendo achiwo ngimana ne rombe.+ 16  “To an gi rombe mamoko ma ok gin mag kundni;+ gin bende nyaka akelgi iye, kendo giniwinj dwonda, mi ginibed kueth achiel e bwo jakwath achiel.+ 17  Mano e momiyo Wuora ohera,+ nikech achiwo ngimana,+ mondo eka achak ayude kendo. 18  Onge ng’at ma nyalo mayago, to achiwe kuom dwacha awuon. An gi teko mar chiwe, kendo an gi teko mar yude kendo.+ Chikni nayudo koa kuom Wuora.” 19  Wechego nomiyo Jo-Yahudi+ obedo gi ywaruok kendo. 20  Thothgi ne wacho niya: “En gi jachien kendo neko omake. Ang’o momiyo uwinje?” 21  Jomoko ne wacho kama: “Magi ok gin weche mag ng’at ma nigi jachien. Be jachien nyalo yawo wenge muofni?” 22  Gie kindeno, Sawo mar Walo Hekalu ne timore Jerusalem. Ne en ndalo koyo, 23  to noyudo ka Yesu wuotho e hekalu e agola miluongo ni Agoch* Solomon.+ 24  Eka Jo-Yahudi nolwore mi gichako wachone niya: “Ibiro miyo wabed gi kiawa nyaka karang’o? Ka in e Kristo, wachnwa ayanga.” 25  Yesu nodwokogi kama: “Ne asewachonu, to e ma ok uyie. Tije ma atimo e nying Wuora chiwo neno kuoma.+ 26  To ok uyie nikech ok un rombena.+ 27  Rombena winjo dwonda, ang’eyogi kendo giluwa.+ 28  Amiyogi ngima ma nyaka chieng’,+ kendo ok nokethgi ngang’, bende onge ng’at ma nogolgi e lweta.+ 29  Gima Wuora osemiya en gima duong’ moloyo gik mamoko duto, kendo onge ng’at ma nyalo gologi e lwet Wuora.+ 30  An kod Wuora wan achiel.”*+ 31  Kendo Jo-Yahudi nokwanyo kite mondo gichielego. 32  Yesu nowachonegi kama: “Ne anyisou tije mabeyo mang’eny moa kuom Wuora. Kuom tijego, en tich mane momiyo uchiela gi kite?” 33  Jo-Yahudi nodwoke niya: “Wachieli gi kite, ok nikech tich moro maber, to nikech ichayo Nyasaye;+ nimar kata obedo ni in dhano, iketri ni in nyasaye.” 34  Yesu nopenjogi kama: “Donge ondik e Chiku ni, ‘Ne awacho ni: “Un nyiseche”’?*+ 35  Ka Nyasaye noluongo jo ma wach Nyasaye nobironegi ni ‘nyiseche’+—to ok nyal lok Ndiko — 36  an ng’at ma Wuora nopwodho mi ooro e piny, be duwachna ni, ‘Ichayo Nyasaye,’ mana nikech ne awachonu ni, ‘An Wuod Nyasaye’?+ 37  Ka ok atim tije mag Wuora, kik uyie kuoma. 38  To ka atimogi, kata obedo ni ok uyie kuoma, yieuru kuom tijego,+ eka ung’e kendo udhi nyime ng’eyo ni Wuora ni e winjruok achiel koda, kendo an e winjruok achiel kod Wuora.”+ 39  Omiyo, ne gitemo make kendo, to ne odhi ka ma ne ok ginyal yudee. 40  Eka nowuok modhi loka Jordan kendo, ka ma Johana ne batisoe ji kinde motelo,+ mi nobet kuno. 41  Kendo ji mang’eny nobiro ire mi gichako wacho niya: “Johana ok notimo kata ranyisi achiel, to gik moko duto ma Johana nowacho kuom ng’atni, osetimore adier.”+ 42  Kendo ji mang’eny ma ne ni kanyo noketo yie kuome.

Weche Moler Piny

Magi gin kuonde miluwo ma nigi sirni molworogi kod tado e wigi.
Kata, “e winjruok achiel.”
Kata, “jo ma chal gi Nyasaye.”