Be Imedo Luwo Kristo Moloyo?

“Kaka usewuotho, . . . meduru timo kamano moloyo.”—1 THES. 4:1.

1, 2. (a) Gin gik mage madongo ma ji mang’eny ma ne odak e kinde Yesu noneno? (b) Ang’o momiyo kindewagi bende gin kinde makende?

BE ISEGAPAROE kaka nyaka bed ni ne en gima ber betie e kinde ma Yesu ne nie pinyka? Inyalo paro kuom kaka Yesu ne nyalo changi kendo kaka mano ne nyalo miyo kik ine chandruok moko mag del. Kata ne inyalo bedo gi mor mar neno kendo winjo Yesu—yudo thuolo mar puonjori kuome kendo neno kotimo honni. (Mari. 4:1, 2; Luka 5:3-9; 9:11) Mano kaka dine obedo thuolo makende bedoe e kinde ma Yesu ne otimo gigo duto! (Luka 19:37) Onge tieng’ moro amora moseneno gik ma kamago a kindeno, kendo gigo ma Yesu nochopo kokalo kuom “misango gi ringre owuon” ka en e piny, ok bi nwo.—Hib. 9:26; Joh. 14:19.

² Kata kamano, kindewa bende gin kinde makende. Nikech ang’o? En nikech sani wadak e kinde ma Ndiko luongo ni “kinde mar giko” kendo ni “ndalo mag giko.” (Dan. 12:1-4, 9, The Bible in Luo, 1976; 2 Tim. 3:1) E kinde mar ndalono, ne owit Satan piny koa e polo. Pod kinde matin, to ibiro tweye kendo wite e ‘bur matut.’ (Fwe. 12:7-9, 12; 20:1-3) Magi bende e kinde ma wan-gi migawo makende mar lando ‘wach maber mar pinyruoth’ e piny mangima, ka wawacho ne ji  wach geno mar Paradis mabiro—ma en tich maok bi nwo kendo.—Math. 24:14.

3. Matin kapok odhi e polo, en ang’o ma Yesu nowacho ne jolupne mondo otim, to mano ne dhi riwo tich mane?

³ Matin kapok odhi e polo, Yesu nowachone jolupne kama: “Unudok jonenona e Jerusalem, gi Judea duto, gi Samaria, kendo nyaka tung’ piny.” (Tich 1:8) Tijno ne dhi riwo tij puonjo ji e piny mangima. Tijno ne dhi chopo ang’o? Timo ji jopuonjre—ma en medo jolup Kristo kapok giko ochopo. (Math. 28:19, 20) Ang’o ma nyaka watim mondo wachop tich ma Kristo nomiyowa?

4. (a) Weche Petro e 2 Petro 3:11, 12 jiwo wach mane madwarore? (b) Onego wabed motang’ gi gik mage?

⁴ Non ane weche ma jaote Petro nowacho kama: “Onego ubed jo maler manadi e ngimau, kuluoro Nyasaye! ka pod urito kendo udwaro mondo chieng’no mar Nyasaye orure.” (2 Pet. 3:11, 12) Weche Petro jiwo gimomiyo dwarore ni wabed motang’ kwarito e kindegi mag giko, mondo wane ni timo dwaro mar Nyasaye e gima duong’ moloyo e ngimawa. Dwaro mar Nyasaye oriwo lando wach maber. Kuom mano, mano mor manade, neno kaka owetewa e piny mangima timo tich ma Kristo nomiyowa mar lendo! Bende, wang’eyo ni dwarore ni wabed motang’ mondo gik mwakedogo pile e piny manie bwo teko mar Satan koda gombowa mag ringruok, kik mi kinda ma wan-go mar tiyo ne Nyasaye odog chien. Kuom mano, we wanon ane kaka wanyalo neno ni wamedo luwo Kristo.

Bed Mamor gi Ting’ ma Nyasaye Omiyowa

5, 6. (a) Paulo ne opwoyo Jokristo wetene ma ne ni Jerusalem kuom ang’o, to ne ochiwonegi siem kuom wach mane? (b) Ang’o momiyo ok onego wakaw ting’ ma Nyasaye omiyowa e yo mayot?

⁵ E barua ma nondiko ne Jokristo man Jerusalem, jaote Paulo ne opwoyo Jokristo wetene kuom chung’ margi motegno ka ginano kata mana e bwo sand. Nowacho kama: “Paruru ndalo machon ka chunyu nonwang’o ler; ne utimo kinda kudhil e lweny mager kendo matek.” Ee, Jehova noparo kaka ne gichung’ motegno. (Hib. 6:10; 10:32-34) Nyaka bed ni weche mabeyo ma Paulo ne opwoyogo Jokristo ma Jo-Hibrania, nojiwogi ahinya. Kata kamano, e barupeno, Paulo nosiemogi bende kuom kido moro ma dhano nigo ma kapo ni ok otang’go, nyalo dwoko chien kinda ma ng’ato nigo mar tiyo ne Nyasaye. Nowacho ni, Jokristo onego obed motang’ mondo kik ‘gitamre,’ kata kwayo ni ong’wonnegi kuom luwo chike Nyasaye.—Hib. 12:25.

⁶ Siem ma nochiwo e wi chuny mar ‘tamruok’ kata kwayo ni ong’wonnwa kuom ting’o ting’ ma Nyasaye omiyowa, bende omako Jokristo e kindegi. Dwarore ni wang’ad e chunywa mondo kik wakaw ting’wa kaka Jokristo e yo mayot, kata weyo kinda ma wan-go e tij Nyasaye odog chien. (Hib. 10:39) Adier en ni, tiyo tich maler mar Nyasaye nyalo miyo ng’ato otho kata oyud ngima.—1 Tim. 4:16.

7, 8. (a) Ang’o mabiro konyowa dhi nyime bedo gi kinda e tiyo ne Nyasaye? (b) Kapo ni kinda ma ne wan-go osedok chien matin, ang’o monego wang’e wi Jehova kod Yesu?

⁷ Ang’o mabiro konyowa tang’ mondo kik wakwa ni ong’wonnwa kuom chopo ting’ ma wan-go e nyim Nyasaye? Yo achiel maduong’ mabiro konyowa kedo gi chuny ma kamano en kuom paro matut pile gimomiyo ne wasingore ka wachiwore ne Nyasaye. Adiera en ni, ne wasingo ne Jehova ni wabiro keto timo dwaro mare ema obed motelo e ngimawa, kendo wadwaro rito singono. (Som Mathayo 16:24.) Kuom mano, seche moko dwarore ni wakaw thuolo mar penjruok kama: ‘Be pod an gi gombo mar dak kaluwore gi chiwruokna ne Nyasaye kaka ne an sama ne ibatisa? Koso kinda ma  ne an-go kar chakruok oselal kaka higini osemedo kalo?’

⁸ Kapo ni wanonore gadier mi wafwenyo ni kinda ma ne wan-go e tij Nyasaye osedok chien e yo moro, biro bedo maber ka waparo kuom weche majiwo chuny ma janabi Zefania nowacho. Nowacho kama: ‘Kik lweti nyosre. Jehova Nyasachi ni e dieri. Ng’ama ratego, ma noresi. Noil kuomi gi mor.’ (Zef. 3:16, 17) Weche majiwo chunygi notiyo mokwongo kuom Jo-Israel machon, ma ne odok Jerusalem ka gia e twech Babulon. Kata kamano, wechego pod jiwo oganda Nyasaye e kindegi bende. Nikech tich mwatimo en tij Jehova, onego wabed ka wang’eyo ni Jehova kaachiel gi Wuode, riwowa lwedo kendo gitegowa mondo wachop chutho ting’ ma wan-go e nyim Nyasaye. (Math. 28:20; Fili. 4:13) Ka watimo matek dhi nyime tiyo ne Nyasaye gi kinda, obiro gwedhowa kendo konyowa timo dongruok.

Bedo gi Kinda e ‘Dwaro Pinyruoth Mokwongo’

9, 10. Tiend ngech Yesu mar nyasi mar chiemo en ang’o, to en puonj mane mwanyalo yudo kuom ngerono?

⁹ Kane en e gago moro e od ruoth ma ja Farisai, Yesu nochiwo ngero mawuoyo kuom ng’at ma ne oloso nyasi moro mar chiemo. E ngerono, nowuoyo kuom thuolo ma ne omi jo mopogore opogore, mondo gibi giluw yo ma ne dhi terogi e Pinyruodh polo. Ne olero bende tiend ng’ato ‘kwayo mondo oweye’ kata mondo ong’wonne. (Som Luka 14:16-21.) Welo ma ne ogwel e ngech Yesu, nochiwo weche manono ka gikwayo mondo owegi kik gibi e nyasino. Achiel kuomgi nowacho ni ne odwaro dhi neno puothe ma ne eka oa ng’iewo. Machielo ne owacho ni ne ong’iewo dhok kendo nodwaro dhi temogi kata nono wachgi. To machielo nowacho kama: ‘Aa kendo. Ok anyal biro.’ Mago ne gin kwayo manono. Ng’ama dwaro ng’iewo puodho kata dhok pile nonogi motelo, omiyo onge gima nyalo chune ahinya ni nyaka onon-gi bang’e. To be donjo e kend nyocha, onego omon ng’ato rwako gwel maduong’ ma kamano? Omiyo ok kawwa gi wuoro ni jaduong’ ot ne opong’ gi mirima kamano!

¹⁰ Jogo duto manie oganda Nyasaye nyalo yudo puonj kuom ngero mar Yesu. En puonj mane? Ok onego wawe ngang’ mondo dwarowa wawegi, kaka miwuoyoe e ngero mar Yesu, obednwa motelo moloyo tiyo ne Nyasaye. Kapo ni Jakristo ok oketo weche ma mage owuon kama giwinjorego, kinda mare mar tiyo ne Nyasaye biro dok chien mosmos. (Som Luka 8:14.) Mondo wageng’ mano kik timrenwa, onego wadag kaluwore gi jip ma Yesu nomiyowa niya: “Dwaruru mokwongo pinyruodhe, gi wachne makare.” (Math. 6:33) Mano kaka en gima jiwowa neno ka jotich Nyasaye—madongo koda matindo—tiyo gi puonj madwaroreno! Kuom adier, thothgi osekawo okang’ mar keto ngimagi obed mayot mondo omi giti ne Nyasaye kuom thuologi momedore. Giseneno e ngimagi giwegi ni dwaro Pinyruoth mokwongo kelo mor gi kuwe madier.

11. En ranyisi mane ei Muma manyisowa gimomiyo dwarore ni wati ne Nyasaye gi chunywa duto kendo gi kinda?

¹¹ Mondo wane kaka bedo gi kinda e tiyo ne Nyasaye en gima dwarore ahinya, non ane ranyisi mar gima notimore ne Joash ruodh Israel. Nikech noneno ni Jo-Suria ne nyalo loyo Jo-Israel, Joash ne odhi ywak ne Elisha. Janabino nochike ni odir asere kokalo e dirisa kochomo yo Suria, mondo mano onyis ni lwet Jehova oselocho e wi ogandano. Mano nonego omi ruodhno jing’o. Bang’e Elisha nowacho ne Joash mondo okaw aserini mage mondo ochielgo  piny. Joash ne ochielo nyadidek. Mirima ne omako Elisha, nikech chielo piny nyadibich kata nyadiuchiel ne dhi nyiso ni ‘ogo Suria nyaka otiekgi.’ Koro Joash ne dhi loyogi mana didek kende. Nikech ne ok onyiso kinda e timo gima ne ochike, Joash ne olocho mana matin. (2 Ruo. 13:14-19) En puonj mane mwayudo kuom ranyisini? Jehova biro gwedhowa e yo mogundho mana ka watiyone gi chunywa duto kendo gi kinda.

12. (a) Ang’o mabiro konyowa siko gi kinda e tij Nyasaye ka wakedo gi chandruoge mwayudo e ngima? (b) Ler ane ber ma ineno kuom bedo modich e tiyo ne Nyasaye.

¹² Chandruok mwaneno e ngima keto kindawa koda chiwruokwa ne tij Nyasaye e bwo tem. Owete koda nyimine mathoth kedo gi pek mag yuto. Moko to chunygi nyosore nikech tuwo monogi timo mathoth e tij Jehova. Kata kamano, ng’ato ka ng’ato kuomwa nyalo kawo okang’ mar neno ni wasiko ka wan gi kinda kendo medo luwo Kristo moloyo. Non ane moko kuom paro koda ndiko mochan e sanduk mawacho ni, “Ang’o Mabiro Konyi Dhi Nyime Luwo Kristo?” Par kuom kaka inyalo tiyo kodgi e yo malong’o chuth. Ka itimo kamano, ibiro yudo ber madier. Bedo modich e tij Nyasaye tegowa ka miyo kik ngimawa yiengni, kendo wabedo gi ngima maber, ka wan gi kuwe koda mor moloyo. (1 Kor. 15:58) E wi mano, tiyo ne Nyasaye gi chunywa duto konyowa ‘rito kendo dwaro mondo chieng’no mar Nyasaye orure.’—2 Pet. 3:12.

Non Ane Chal Mari Gadier

13. Ere kaka wan wawegi wanyalo ng’eyo ni watiyo ne Nyasaye gi chunywa duto?

¹³ Kata kamano, ber ng’eyo ni, ng’eny seche mwatiyogo e tij lendo ok ema nyis ni watiyo ne Nyasaye gi chunywa duto. Chal mar ng’ato ka ng’ato opogore. Ng’at malendo mana kuom sa achiel kata seche ariyo dwe ka dwe, nyalo bedo ni moro Jehova ahinya kapo ni mano ema onyalo timo kaluwore gi tekre ngimane. (Pim gi Mariko 12:41-44.) Kuom mano, mondo wang’e kabe watiyo ne Nyasaye gi chunywa duto wan wawegi, onego wanon gadier nyalo ma wan-go koda chal marwa. Kaka jolup Kristo, wabende wadwaro bedo gi paro machalo  kaka mare. (Som Jo Rumi 15:5; 1 Kor. 2:16) Ang’o ma Yesu noketo motelo e ngimane? Nowacho ne oganda ma ne ni Kapernaum niya: ‘Onego ayal wach maber mar pinyruodh Nyasaye e mier moko bende, nikech ma e momiyo ne oora.’ (Luka 4:43; Joh. 18:37) Kiparo kinda ma Yesu ne nigo e tij lendo, non ane chal mari mondo ine kapo ni inyalo tiyo tij lendo e okang’ momedore.—1 Kor. 11:1.

14. Gin yore mage mwanyalo medogo okang’ mwatimogo tij lendo?

¹⁴ Nono adimba chal marwa nyalo konyowa fwenyo ni wanyalo medo seche ma watiyogo e tij lendo. (Math. 9:37, 38) Kuom ranyisi, tara mang’eny mag rowerewa ma nyocha eka oa tieko skul osemedo okang’ ma gitiyogo e tij lendo, kendo koro giyudo mor ma tiyo kaka jopainia ma nigi kinda kelo. Be in bende diher yudo mor machalo kamano? Owete koda nyimine moko osenono chal margi mi ging’ado mar dar mondo gidhi kumachielo ei pinygi, kata e pinje mamoko ma jolendo mag Pinyruoth dwarore moloyo. Moko to osepuonjore dhok machielo mondo omi gilendi ne joma wacho dhokgo. Kata obedo ni timo tij lendo e okang’ momedore ok en gima yot, okelo gweth mogundho, kendo wanyalo konyo jomamoko mang’eny ‘ng’eyo adiera chuth.’—1 Tim. 2:3, 4; 2 Kor. 9:6.

Ranyisi mag Muma Mwanyalo Luwo

15, 16. Ranyisi mag ng’a gini mwanyalo luwo e bedo gi kinda kaka jolup Kristo?

¹⁵ Ere kaka jomoko notimo kane Kristo ogwelogi mondo gibed jolupne? Muma wacho kuom Mathayo kama: “Noweyo duto, nochungo, moluwe.” (Luka 5:27, 28) E wi Petro kod Andrea ma ne oyudo lupo, wasomo kama: “Gikanyono ne giweyo gokegi, ne giluwe.” Bang’e Yesu noneno Jakobo kod Johana, ma ne loso gokegi ka gin gi wuon-gi. Ang’o ma ne gitimo kane Yesu ogwelogi? “Gikanyono ne giweyo yie gi wuon-gi, mi ne giluwe.”—Math. 4:18-22.

¹⁶ Ranyisi machielo maber en mar Saulo, ma bang’e nobedo jaote Paulo. Kata obedo ni nosebedo kosando jolup Kristo e yo mager, ne oloko yorene mi obedo ‘gir tich moyier’ mar ting’o nying’ Kristo. ‘Gikanyono Paulo noyalo e sunagoke ni Yesu e Wuod Nyasaye.’ (Tich 9:3-22) Kendo, kata obedo ni ne okalo e bwo chandruoge koda sand mang’eny, kinda mar Paulo ne ok odok chien ngang’.—2 Kor. 11:23-29; 12:15.

17. (a) In gi gombo mane kuom wach luwo Kristo? (b) Gin gweth mage mwayudo nikech timo dwaro mar Jehova gi chunywa kod tekowa duto?

¹⁷ Kuom adier, wadwaro luwo ranyisi mabeyo mag jopuonjrego kendo rwako mapiyo gwel michiwonwa mar luwo Kristo, maok wadigni. (Hib. 6:11, 12) Gin gweth mage mwayudo kuom medo luwo Kristo moloyo kendo gi kinda? Wanwang’o mor madier kuom timo dwaro mar Nyasaye kendo wayudo ber mabedoe kuom yie mondo omiwa migepe koda ting’ momedore ei kanyakla. (Zab. 40:8; som 1 Thessalonika 4:1.) Ee, kaka wamedo timo matek e luwo ranyisi mar Kristo, wayudo gweth mogundho kendo masiko kaka bedo gi paro mokuwe, bedo jogo ma gik moko romo e ngima, joma Nyasaye oyiego, koda bedo gi geno mar dak nyaka chieng’.—1 Tim. 4:10.

Be Iparo?

• En tich mane maduong’ momiwa, to onego wanene e yo mane?

• En kido mane ma dhano nigo ma nyaka watang’go, to nikech ang’o?

• Ang’o momiyo onego wanonre gadier?

• Ang’o mabiro konyowa medo luwo Kristo?

[Penjo mag Puonjruok]

[Sanduk/Picha manie ite mar 27]

Ang’o Mabiro Konyi Dhi Nyime Luwo Kristo?

▪ Som Wach Nyasaye pile, kendo par matut kuom gik misomo.—Zab. 1:1-3; 1 Tim. 4:15.

▪ Lem pile kikwayo Nyasaye mondo omiyi roho mare okonyi kendo otayi.—Zek. 4:6; Luka 11:9, 13.

▪ Bedi e chokruok mar joma nyiso kinda mawuok e chunygi ne tij lendo.—Nge. 13:20; Hib. 10:24, 25.

▪ Ng’e ni kinde mwadakiegi gin mag giko.—Efe. 5:15, 16.

▪ Siki king’eyo kaka ‘kwayo mondo oweyi’ kata ong’wonni, nyalo kelo masira.—Luka 9:59-62.

▪ Pile ka pile par matut kuom chiwruok mari koda gweth mogundho miyudo nikech tiyo ne Nyasaye kod luwo Kristo gi chunyi duto.—Zab. 116:12-14; 133:3; Nge. 10:22.