Ka ku ya ka Bibele

Mulimu U na ni Sibupeho se si Cwañi?

BIBELE i talusa kuli: “Mulimu ki Moya, mi ba ba mu lapela, ba swanezi ku mu lapela ka Moya ni ka niti.” Taba ye i patulula niti ka za sibupeho sa Mulimu—Mulimu ki moya! (Joani 4:19-24) Kono mwa Bibele Mulimu u talusizwe sina mutu. Libizo la hae ki Jehova.—Isaya 12:2.

Babali ba bañwi ba Bibele ba bonisize kuli ha ba utwisisi hande za sibupeho sa Mulimu. Bakeñisa kuli Mulimu ki moya o sa bonahali, isiñi mubili o bonahala, ki kabakalañi ha ku na ni litaba ze ñata mwa Bibele ze talusa kuli Mulimu u na ni meeto, mazebe, ngo, pilu, mazoho, minwana ni mahutu? * Batu ba bañwi ba kona ku nga kuli Mulimu u na ni mubili o swana ni wa batu bakeñisa kuli Bibele i bulela kuli mutu na bupilwe ka siswaniso sa Mulimu. Ku nyakisisa ka butungi ze i bulela Bibele ku kona ku lu tusa kuli lu si ke lwa lyangana ka za taba ye.—Genese 1:26.

Ki Kabakalañi Mulimu ha Taluswa ka Tulemeno Twa Batu

Kuli ba tuse batu ku utwisisa mwa inezi Mulimu, bañoli ba Bibele ne ba susumelizwe ki moya wa Mulimu ku itusisa tulemeno twa batu ha ne ba ama ku Ya M’ata Ote. Bañoli ba Bibele ha ne ba itusisa tulemeno twa batu ku talusa mwa inezi Mulimu, ku bonisa kuli lipuo za batu ha li na manzwi a swanela hande a ku talusa mwa inezi Mulimu wa niti, Jehova. Mulelo ne li ku bonisa mwa inezi Mulimu luli ni ku talusa taba yeo ka linzila ze ba kona ku utwisisa batu. Kono fo ha ku talusi kuli lu swanela ku nga kuli Mulimu u na ni lilama za butu sina fela ha lu sa koni ku nga kuli lipulelo za mwa Bibele za kuli Mulimu “ki Yena Licwe,” ki “lizazi,” kamba “ki tebe” kuli kona mwa inezi luli Mulimu.—Deuteronoma 32:4; Samu 84:11.

Ka ku swana, kuli i lu tuse ku utwisisa kuli mutu u na ni tulemeno to tu bat’o swana ni twa Jehova, Bibele i bulela kuli mutu na bupilwe ka siswaniso sa Mulimu. Kaniti, Bibele ha i talusi kuli batu ki mioya kamba kuli Mulimu u na ni sibupeho sa butu.

Kana Mulimu ki Munna Kamba ki Musali?

Sina fela ha lu sa swaneli ku nga kuli Mulimu u swana ni batu bakeñisa kuli u talusizwe kuli u na ni lilama za butu, kacwalo ha lu swaneli ku  nga kuli Mulimu ki munna ka libaka fela la kuli u talusizwe sina munna. Ku bulela kuli sibupiwa se ki sa munna kamba ki sa musali ku eziwa fela kwa libupiwa za nama mi hape ku bonisa fela kuli lipuo za batu ha li na manzwi luli a swanelwa ku itusiswa kwa ku talusa hande mwa inezi Mulimu ya M’ata Ote, Jehova.

Bibele ha i mu biza ‘Ndate’ i lu tusa ku utwisisa kuli Mubupi wa luna u kona ku bapanywa ku ndate wa butu ya na ni lilato ni pabalelo. (Mateu 6:9) Kono ku eza cwalo ha ku talusi kuli lu swanela ku nga Mulimu, kamba nihaiba libupiwa ze ñwi za moya ze kwa lihalimu, kuli ki za banna kamba ki za basali. Libupiwa za moya ha li taluhanywi kuli ze ki za banna kamba za basali. Mane Bibele i bonisa kuli ba ba bizizwe ku yo busa hamoho ni Kreste mwa Mubuso wa hae wa kwa lihalimu ha ba libeleli kuli ba ka yo zwelapili ku ba banna kamba basali ha ba ka huliswa sina bana ba Mulimu ba moya. Muapositola Paulusi na ba hupulisize kuli mwahal’a bona “ha ku sa na [ku ba ni] munna kamba musali” ha ba ka huliswa sina bana ba Mulimu ba kwa moya. Mi hape ba taluswa ka swanisezo kuli ki “munyaliwa” wa Ngunyana, yena Jesu Kreste. Litaba zeo kaufela li bonisa kuli lipulelo ze bonisa kuli Mulimu, hamohocwalo ni Mwan’a hae wa libanda, Jesu, ni libupiwa ze ñwi za moya, ba na ni lilama za butu ha li swaneli ku ngiwa kuli li talusa kuli kona mo ba inezi luli.—Magalata 3:26, 28; Sinulo 21:9; 1 Joani 3:1, 2.

Bakeñisa kuli ne ba utwisisize hande misebezi ya peta munna, bañoli ba Bibele ha ne ba ama ku Mulimu ne ba talusize kuli ki munna. Bañoli ba Bibele ne ba ziba kuli munna ya pila ka ku ya ka likuka za Mulimu, u ka swaniseza hande lilato la Jehova, sina mushemi kwa bana ba hae ba fa lifasi.—Malaki 3:17; Mateu 5:45; Luka 11:11-13.

Kalemeno ka Katuna ka Mulimu

Nihaike kuli ki moya, Mubusi ya Pahami ka ku fitisisa ha si ya ikauhanyize kwa batu, ya sa zibahali, kamba ya sa amboli. Taba ya kuli Mulimu ki moya ha i palelwisi batu ba lipilu ze nde ku ituta za lilato la hae, m’ata a hae, butali bwa hae, ni katulo ya hae ye lukile, ili tulemeno hape to tu talusa mwa inezi ni to tu iponahalela hande mwa pupo.—Maroma 1:19-21.

Mwa inezi Mulimu ku kona ku taluswa ka bukuswani ka kalemeno ka hae ka katuna, kona ka lilato. Kalemeno kao ka lilato ka ipitezi hahulu kuli mane ka bonisa mwa inezi Mulimu. (1 Joani 4:8) Kalemeno kao ka kopanyeleza ni mikwa ye miñwi ya Mulimu, ye cwale ka sishemo, ku swalela, ni pilu-telele. (Exoda 34:6; Samu 103:8-14; Isaya 55:7; Maroma 5:8) Kaniti luli, Jehova ki Mulimu ya lilato ili ya lu mema kuli lu sutelele ku yena.—Joani 4:23.

[Litaluso za kwatasi]

KANA MU KILE MWA IPUZA KULI:

▪ Libizo la Mulimu ki lifi?—Isaya 12:2.

▪ Ki kai ko lu kona ku fumana tulemeno twa Mulimu?—Maroma 1:19-21.

▪ Ki kafi kalemeno ka katuna ka Mulimu?—1 Joani 4:8.