Numeros 12:1-16
12 Ginpakalain ni Miriam kag ni Aaron si Moises bangod nagpangasawa sia sing taga-Cus.+
2 Nagsiling sila: “Kay Moises lang bala nagapakighambal si Jehova? Indi bala nga nagapakighambal man sia sa aton?”+ Nabatian ini ni Jehova.+
3 Si Moises amo ang pinakamahagop sa tanan nga tawo*+ sa duta.
4 Nagsiling dayon si Jehova kay Moises kag kay Aaron kag kay Miriam: “Maggua kamo nga tatlo kag magkadto kamo sa tolda nga tilipunan.”* Gani naggua sila nga tatlo.
5 Kag nagpanaug si Jehova sa haligi nga panganod+ kag nagtindog sa puertahan sang tolda nga tilipunan. Dayon gintawag niya si Aaron kag si Miriam, kag nagpalapit sila nga duha.
6 Nagsiling sia sa ila: “Palihug, pamatii ninyo ako. Kon may yara sa inyo nga isa ka manalagna ni Jehova, magapakilala ako sa iya paagi sa palanan-awon,+ kag magapakighambal ako sa iya paagi sa damgo.+
7 Apang indi amo sina sa akon alagad nga si Moises! Gintugyan ko sa iya ang akon bug-os nga panimalay.*+
8 Direkta* ako nga nagapakighambal sa iya+ sing maathag kag indi paagi sa mga paktakon; kag nakita niya ang presensia ni Jehova. Kon amo, ngaa wala kamo mahadlok sa pagpakalain sa akon alagad nga si Moises?”
9 Gani nagdabdab ang kaakig ni Jehova sa ila, kag naghalin sia.
10 Nagpalayo ang panganod sa ibabaw sang tolda, kag gin-aro si Miriam nga pareho kaputi sang mapino nga yelo.+ Nagbalikid si Aaron kay Miriam, kag nakita niya nga gin-aro sia.+
11 Nagsiling dayon si Aaron kay Moises: “Maluoy ka, ginuo ko! Palihug indi pagkabiga nga kasal-anan ang kabuangan nga ginhimo namon.
12 Palihug, indi pagtuguti nga daw isa ka patay nga bata si Miriam, nga nabun-ag nga hagas na ang katunga sang iya lawas!”
13 Gani nagpakiluoy si Moises kay Jehova: “Palihug, O Dios ko, ayuha sia! Palihug!”+
14 Nagsiling si Jehova kay Moises: “Kon duplaan sia sang iya amay sa guya, indi bala nga mahuy-an sia sa sulod sang pito ka adlaw? Ikuarentina sia sing pito ka adlaw sa gua sang kampo,+ kag pagkatapos sini, mahimo na sia makabalik.”
15 Gani ginkuarentina si Miriam sa gua sang kampo sing pito ka adlaw,+ kag wala maghalin ang katawhan tubtob nakabalik si Miriam sa kampo.
16 Dayon naghalin ang katawhan sa Hazerot+ kag nagkampo sila sa kamingawan sang Paran.+
