Manugwali 11:1-10
11 Ihaboy* ang imo tinapay sa tubig,+ kay makita mo ini liwat pagligad sang madamo nga adlaw.+
2 Maghatag ka sing isa ka parte sang imo pagkabutang sa pito, ukon bisan sa walo,+ kay wala ka makahibalo kon ano nga kapahamakan* ang matabo sa duta.
3 Kon ang gal-um madamol na, nagaulan sa duta; kag kon ang kahoy matumba sa bagatnan ukon sa aminhan, nagapabilin ini kon diin ini natumba.
4 Ang isa nga hangin lang ang ginabantayan indi magsab-ug sing binhi, kag ang isa nga gal-um lang ang ginatan-aw indi mag-ani.+
5 Subong nga wala ka makahibalo kon paano nagapanghikot ang puersa sang kabuhi* sa mga tul-an sang bata sa tiyan* sang iya iloy,+ wala ka man makahibalo sang binuhatan sang matuod nga Dios nga naghimo sang tanan nga butang.+
6 Isab-ug ang imo binhi sa aga tubtob sa gab-i;+ kay wala ka makahibalo kon diin ang magatubo, ini ukon ina, ukon pareho ini nga magtubo.
7 Ang kasanag matam-is, kag maayo sa mga mata nga makita ang adlaw.
8 Kay kon ang tawo mabuhi sing madamo nga tuig, dapat sia magkalipay kada adlaw.+ Apang dapat niya dumdumon nga mahimo nga madamo ang masubo nga mga adlaw; ang tanan nga magaabot wala sing pulos.+
9 Magkalipay ka, pamatan-on, samtang bataon ka pa, kag magkalipay ka sa adlaw sang imo pagkapamatan-on. Sunda ang dalanon sang imo tagipusuon kag sunda ang imo mga mata; apang dumduma nga hukman ka sang* matuod nga Dios sa tanan mo nga ginahimo.+
10 Gani kuhaa ang mga butang nga makapagamo sa imo tagipusuon; kag isikway ang mga butang nga makahalalit sa imo lawas, kay ang pagkapamatan-on kag ang paghingurusgan wala sing pulos.+
Footnote
^ Ukon “Ipadala.”
^ Ukon “kalamidad.”
^ Sa literal, “mga tul-an sa taguangkan.”
^ Nagapatuhoy man ini sa espiritu sang Dios.
^ Ukon “nga manabat ka sa.”
