Ang Hunahuna sa Bibliya

Ang Pagkamapaubsanon Kahuyangan ba o Kalig-on?

ANG mga garboso ug agresibo sagad gihulagway sa kalibotan ingong mga tawong angayng sundogon. Ang mga mapaubsanon ug malumo sagad giisip nga mahuyang, maulawon, o maayong mopalanalana aron makakuhag pabor. Apan kahuyangan ba gayod ang tinuod nga pagkamapaubsanon? Ug kalig-on ba gayod ang pagkagarboso? Unsay giingon sa Bibliya?

Buweno, ang Bibliya nag-uyon sa pipila ka matang sa garbo. Pananglitan, ang mga Kristohanon kinahanglang mapasigarbohon nga si Jehova mao ang ilang Diyos ug nga siya nakaila kanila. (Salmo 47:4; Jeremias 9:24; 2 Tesalonica 1:3, 4) Ang mga ginikanan makapasigarbo sa ilang mga anak kon sila maayog panig-ingnan sa Kristohanong pamatasan ug maisogong mobarog dapig sa matuod nga pagsimba. (Proverbio 27:11) Bisan pa niana, aduna usay daotang matang sa garbo.

Pagsusi Pag-ayo sa Garbo ug Pagkamapaubsanon

Ang usa ka kahulogan sa garbo mao ang sobrang pagtamod sa kaugalingon. Kanang matanga sa garbo mopabati sa usa ka tawo nga siya importante kaayo ug labaw sa uban, tungod tingali sa iyang katahom, rasa, maayong kahimtang diha sa katilingban, mga abilidad, o bahandi. (Santiago 4:13-16) Ang Bibliya naghisgot bahin sa mga tawong “nangburot sa garbo.” (2 Timoteo 3:4) Buot ipasabot, taas ang ilang paglantaw sa ilang kaugalingon, bisag wala silay katarongan sa paghunahuna niana.

Sa laing bahin, ang mga mapaubsanon naningkamot sa paglantaw sa ilang kaugalingon sa matinud-anon ug dili-mapihigong paagi, nga nag-ila sa ilang mga kahuyangan ug ubos nga kahimtang atubangan sa Diyos. (1 Pedro 5:6) Dugang pa, sila moila—malipay pa gani—sa maayong mga hiyas nga ilang makita sa uban. (Filipos 2:3) Busa, sila dili gayod madaog sa kasina. (Galacia 5:26) Nan, dayag nga ang tinuod nga pagkamapaubsanon moresultag maayong relasyon sa uban ug makahatag ug kalinaw ug kalig-on.

Tagda ang panig-ingnan ni Jesus. Sa wala pa moanhi sa yuta, siya maoy usa ka gamhanang espiritung linalang sa langit. Ug sa dinhi na siya sa yuta, siya hingpit ug walay sala. (Juan 17:5; 1 Pedro 2:21, 22) Dili hitupngan ang iyang katakos, kinaadman, ug kahibalo. Apan wala gayod siya magmapahitas-on kondili nagpamapaubsanon kanunay. (Filipos 2:6) Kas-a, iya pa ganing gihimasaan ang iyang mga apostoles; ug siya nagpakitag tim-os nga kaikag sa gagmayng mga bata. (Lucas 18:15, 16; Juan 13:4, 5) Sa pagkatinuod, uban sa usa ka bata sa iyang tupad, si Jesus miingon: “Bisan kinsa nga magapaubos sa iyang kaugalingon sama niining bataa mao ang labing dako sa gingharian sa mga langit.” (Mateo 18:2-4) Oo, sa panglantaw ni Jesus—ug sa iyang Amahan—ang tinuod nga pagkabantogan  maoy tungod sa pagkamapaubsanon, dili sa garbo.—Santiago 4:10.

Ang Pagkamapaubsanon Maoy Kalig-on

Bisan tuod siya sulondan sa pagkamapaubsanon, si Jesus dili gayod mahuyang. Siya maisogong misulti sa kamatuoran ug wala gayoy kahadlok sa tawo. (Mateo 23:1-33; Juan 8:13, 44-47; 19:10, 11) Busa, siya gitahod bisan gani sa pipila niya ka magsusupak. (Marcos 12:13, 17; 15:5) Apan si Jesus dili gayod mahariharion. Hinunoa, pinaagi sa pagkamapaubsanon, kalulot, ug gugma, iyang nadani ang mga tawo, mao nga siya gihigugma sa mga tawo sa paagi nga dili gayod mahimo sa mga garboso. (Mateo 11:28-30; Juan 13:1; 2 Corinto 5:14, 15) Bisan karon, minilyon ang maunongong nagpasakop kang Kristo tungod kay sila adunay tiunay nga gugma ug halalom nga pagtahod kaniya.—Pinadayag 7:9, 10.

Ang Pulong sa Diyos nagpasiugda sa pagkamapaubsanon tungod kay ang tawong mapaubsanog kasingkasing andam modawat ug tambag ug daling tudloan. (Lucas 10:21; Colosas 3:10, 12) Sama kang Apolos, nga usa ka hanas nga Kristohanong magtutudlo sa unang siglo, sila malipay sa pagpasibo sa ilang panglantaw sa dihang ipakita kanila ang mas hustong impormasyon. (Buhat 18:24-26) Ug sila dili mahadlok sa pagpangutana, samtang ang mga garboso sagad dili mangutana sa kahadlok nga basig mahibaloan nga sila walay kabangkaagan.

Matikdi pananglitan ang usa ka Etiopianhong eunuko sa unang siglo nga nalibog bahin sa usa ka teksto sa Kasulatan. “Nakasabot ka ba gayod sa imong ginabasa?” siya gipangutana sa Kristohanong tinun-an nga si Felipe. Ang Etiopianhon mitubag: “Sa pagkatinuod, unsaon ko man pagkasabot, gawas kon adunay magtudlo kanako?” Pagkamaayong panig-ingnan sa pagkamapaubsanon—ilabina kon atong hunahunaon nga ang eunuko maoy usa ka tinamod nga tawo sa iyang yutang natawhan! Tungod sa iyang pagkamapaubsanon, siya nakadawat ug lalom nga pagsabot sa Kasulatan.—Buhat 8:26-38.

Ang Etiopianhon lahi ra kaayo sa Hudiyohanong mga eskriba ug mga Pariseo, nga nag-isip sa ilang kaugalingon nga sila ang hawod nga relihiyosong mga tawo sa ilang panahon. (Mateo 23:5-7) Inay mapaubsanong maminaw kang Jesus ug sa iyang mga sumusunod, sila ilang gitamay ug gipangitaan ug sayop. Busa, ang ilang garbo maoy nakaingon sa ilang pagkaignorante sa kabubut-on ug mga katuyoan sa Diyos.—Juan 7:32, 47-49; Buhat 5:29-33.

Ikaw ba Sama sa Humok o sa Gahi nga Yutang Kulonon?

Ang Bibliya nagpakasama kang Jehova sa usa ka magkukulon, ug ang mga tawo samag yutang kulonon. (Isaias 64:8) Ang pagkamapaubsanon motabang sa usa ka tawo nga mahisama sa humok nga yutang kulonon diha sa mga kamot sa Diyos, usa nga mahimo niyang umolon ngadto sa usa ka nindot nga sudlanan; samtang ang mapahitas-on nahisama sa uga, gahi nga yutang kulonon nga igo lang pulpogon. Usa ka iladong pananglitan niini mao ang garbosong si Paraon sa karaang Ehipto nga misukol kang Jehova mao nga siya namatay. (Exodo 5:2; 9:17; Salmo 136:15) Ang kamatayon ni Paraon nag-ilustrar niini nga panultihon: “Ang garbo nagauna sa pagkahagsa, ug ang mapahitas-ong espiritu nagauna sa pagkapukan.”—Proverbio 16:18.

Kini wala magpasabot nga ang katawhan sa Diyos wala makigbisog sa garbo. Pananglitan, ang mga apostoles ni Jesus kanunayng naglalis kon kinsa kanila ang labing dako. (Lucas 22:24-27) Bisan pa niana, wala sila magpadaog sa garbo apan sila naminaw kang Jesus ug, sa ngadtongadto, nagbag-o sa ilang tinamdan.

“Ang sangpotanan sa pagpaubos ug pagkahadlok kang Jehova maoy bahandi ug himaya ug kinabuhi,” misulat si Solomon. (Proverbio 22:4) Pagkamaayong mga katarongan sa pag-ugmad sa pagkamapaubsanon! Dili lamang kini usa ka lig-on ug makapadani nga hiyas kondili makatabang usab kini sa pagbaton sa pag-uyon sa Diyos ug sa ganti nga kinabuhing walay kataposan.—2 Samuel 22:28; Santiago 4:10.

NAHIBULONG KA BA?

◼ Daotan ba ang tanang matang sa garbo?—2 Tesalonica 1:3, 4.

◼ Sa unsang paagi ang pagkamapaubsanon makapauswag sa kahibalo sa usa?—Buhat 8:26-38.

◼ Kinahanglan bang ugmaron sa mga alagad sa Diyos ang pagkamapaubsanon?—Lucas 22:24-27.

◼ Unsay palaaboton sa mga mapaubsanon?—Proverbio 22:4.

[Hulagway sa panid 20]

Ang mga bata nadani kang Jesus kay siya mapaubsanon