Maan e suan Ɲanmiɛn Ndɛ’n nun like

?Ye benin yɛ Ɲanmiɛn i mmla’m be yo e ɔ?

Ndɛ akpasua nga tɛ kosan wie mɔ atrɛkpa’n amun fa usali amun wun’n be su. Yɛ ɔ kle e Biblu’n i bue nga e kwla kanngan nun naan y’a wun kosan sɔ’m be su tɛlɛ’n. Zoova i Lalofuɛ’m be klo kɛ bé yíyí ndɛ sɔ’m be nun klé amun.

1. ?Ngue ti yɛ ɔ fata kɛ e ɲin yi Ɲanmiɛn ɔn?

Kɛ mɔ Ɲanmiɛn yɛ ɔ yili e’n ti’n, e ɲin cɛ yɛ ɔ fata kɛ ɔ yi i ɔ. Zezi bɔbɔ i ɲin yili Ɲanmiɛn blɛ kwlaa nun. (Zan 6:38; Sa Nglo Yilɛ 4:11) Ɲanmiɛn i mmla’m be su falɛ’n maan e kwla kle kɛ e klo i.—An kanngan 1 Zan 5:3 nun.

Ɲanmiɛn Zoova i mmla’m be kwlaa be ti kpa man e. Be kle e mɛn dilɛ kpafuɛ’n. Kpɛkun be kle e like nga e ko yo naan cɛn wie lele’n y’a di ye tititi’n.—An kanngan Jue Mun 19:8, 12 nin Ezai 48:17, 18 nun.

2. ?Wafa sɛ yɛ Ɲanmiɛn i mmla’m be su falɛ’n sasa e tukpacɛ’m be lika ɔ?

Ɲanmiɛn i mmla ng’ɔ se e kɛ nán e nɔn nzan ngboko’n, ɔ sasa e tukpacɛ nin ninnge yaya nga be kwla fa e sie e wie nuan’n, be lika. Sran ng’ɔ nɔn nzan’n i ngboko’n, ɔ kaci nzan’n i kanga. Asa kusu’n, ɔ yo ninnge kɛ jinminwafuɛ sa. (Nyanndra Mun 23:20, 29, 30) Zoova man e atin kɛ e nɔn nzan. Sanngɛ i waan nán e nɔn e tratra su.—An kanngan Jue Mun 104:15 nin 1 Korɛntfuɛ Mun 6:10 nun.

Zoova waan e nian e wun, aɲinblɔɛ’n nin ya ble falɛ’n ɔ nin ninnge uflɛ wie mɔ be kwla saci e’n, be lika. Sɛ e fɛ i afɔtuɛ’m be su’n, tukpacɛ’n tó fúan e, yɛ kusu’n e kplo’n nun yó e kpa.—An kanngan Nyanndra Mun 14:30 nin Nyanndra Mun 22:24, 25 nun.

3. ?Wafa sɛ yɛ Ɲanmiɛn i mmla’m be sasa e ɔ?

Ɲanmiɛn i mmla’n wla e su nun kɛ nán maan e nin sran ng’ɔ timan e yi’n annzɛ e wun’n e si sua. (Ebre Mun 13:4) Kɛ yasua kun nin i yi’n be fɛ i sɔ mmla’n su’n, be wla gua ase. Be mma’m be kusu be wun be wun fɛ. Sanngɛ be nga be fɛmɛn i sɔ mmla’n su’n, tukpacɛ sa be. Be aja’n saci. Nzaje sa yɛ be yo ɔ. Be akunndan’n sanngan tɛtɛ kpa. Yɛ ba’m be ka be nin annzɛ be si ngunmin sa nun.—An kanngan Nyanndra Mun 5:1-9 nun.

Ninnge nga be kwla yo maan e nin sran kun m’ɔ timan e wun annzɛ e yi e si sua’n, kɛ e nian e wun be lika’n, ɔ ti e nin Ɲanmiɛn e janvuɛ mɔ e trali’n i sasalɛ. Asa kusu’n, i sɔ’n yo maan e boman e wiengu wla.—An kanngan 1 Tɛsalonikfuɛ Mun 4:3-6 nun.

  4. ?Sɛ e bu nguan’n i like dan’n, wafa sɛ yɛ i sɔ’n yó e ye ɔ?

Be nga be bu nguan mɔ Ɲanmiɛn mannin e’n i like dan mɔ be wla sa kɛ siklɛti nɔnlɛ sa annzɛ sa uflɛ m’ɔ saci sran’n be ase’n, be ɲɛn i su aunkpinndiɛ. (2 Korɛntfuɛ Mun 7:1) Ba ng’ɔ te o i nin klun bɔbɔ’n, i nguan’n ti like dan Ɲanmiɛn ɲrun. (Ezipt Lɔ Tulɛ 21:22, 23) I ti’n, ɔ fataman kɛ e ɲinfu e yo naan ba kun m’ɔ te o i nin klun’n, ɔ wu. Kusu’n, be nga be bu nguan’n kɛ Ɲanmiɛn fa bu i sa’n, be junman su lɔ o, be awlo lɔ o, yɛ loto nun o, be sasa be wun naan sa wie w’a ɲanman be annzɛ w’a ɲanman be wiengu. (Mmla’n 22:8) Asa’n, kɛ mɔ nguan’n fin Ɲanmiɛn ti’n, be kanman ngowa ng’ɔ kwla fa be nguan’n sie i wie nuan’n.—An kanngan Jue Mun 36:10 nun.

5. ?Kɛ mɔ mmoja’n ti like nanndoliɛ kpa’n ti’n, i su ye benin yɛ e ɲɛn i ɔ?

Mmoja’n ti like nanndoliɛ kpa lele kpe nun. Afin Ɲanmiɛn waan ɔ ti nguan m’ɔ o sran nin nnɛn’m be nun’n i nzɔliɛ. (Bo Bolɛ 9:3, 4) E ɲan Ɲanmiɛn i mmla mɔ i waan mmoja’n nin nguan’n be sɛ’n, i su ye. ?Wafa sɛ? Mmla sɔ’n ti’n Ɲanmiɛn kwla yaci e sa tɛ mun cɛ e.—An kanngan Saun Yolɛ 17:11-13 nin Ebre Mun 9:22 nun.

Kɛ mɔ fɔ w’a tranman Zezi nun ti’n, i mmoja m’ɔ guɛli i ase’n, ɔ lemɛn i wunsu. Zezi fali i mmoja’n m’ɔ ti i nguan i nzɔliɛ’n fa kleli Ɲanmiɛn. (Ebre Mun 9:12) I mmoja’n m’ɔ guɛli i ase’n ti’n, e kwla ɲan annanganman nguan.—An kanngan Matie 26:28 nin Zan 3:16 nun.

Sɛ amun kunndɛ kɛ amún sí nun ekun’n, an nian fluwa ?Ngue like yɛ Biblu’n kle i sakpasakpa ɔ? i ndɛ tre 12 nin 13 nun. Zoova i Lalofuɛ mun yɛ be yili ɔ.