1, 2. Ano nga pagbag-o an nahitabo han Pentekostes 33 C.E., ngan hin-o an nagin membro han bag-o nga katawohan ni Jehova? (Kitaa an retrato hini nga pahina.)

HAN Pentekostes 33 C.E., may daku nga pagbag-o nga nahitabo ha kasaysayan han katawohan ni Jehova. Hito nga adlaw, pinaagi han espiritu ni Jehova, nag-establisar hiya hin usa nga bag-o nga nasud—an espirituwal nga Israel, o “an Israel han Dios.” (Gal. 6:16) Ha siyahan nga higayon tikang ha panahon ni Abraham, an katawohan han Dios diri na makikilala pinaagi han pisikal nga pagturi. Lugod, may kalabotan ha tagsa nga membro hito nga bag-o nga nasud, hi Pablo nagsurat: “An totoo nga pagturi ginhihimo ha kasingkasing pinaagi han espiritu.”—Roma 2:29.

² An siyahan nga mga membro han bag-o nga nasud han Dios amo an mga apostol ngan an sobra 100 nga disipulo ni Kristo nga nagkatirok ha usa nga igbaw nga kwarto ha Jerusalem. (Buh. 1:12-15) Ginbuboan hira han baraan nga espiritu, salit nagin espiritu nga mga anak hira han Dios. (Roma 8:15, 16; 2 Cor. 1:21) Ginpamatud-an hini nga ginkarawat ni Jehova an halad ni Kristo, ngan an Balaud nga kasabotan ginsaliwnan hin bag-o nga kasabotan. (Luc. 22:20; basaha an Hebreo 9:15.) Salit ini nga mga disipulo nagin membro han bag-o nga nasud ni Jehova, an iya bag-o nga katawohan. An baraan nga espiritu bumulig ha ira nga makasangyaw gamit an magkalain-lain nga  pinulongan han mga Judio ngan mga proselita. Ini nga mga tawo tikang ha iba-iba nga lugar ha Imperyo han Roma nga kumadto ha Jerusalem basi magselebrar han Piyesta han mga Semana, o Pentekostes. Nabatian nira ngan nasabtan ha ira mismo pinulongan an “gamhanan nga mga buhat han Dios” nga iginsangyaw han dinihogan nga mga Kristiano.—Buh. 2:1-11.

3-5. (a) Hadton Pentekostes, ano an ginsiring ni Pedro ha mga Judio? (b) Ano an sunod-sunod nga panhitabo nga nakabulig basi magtikadamu an membro han bag-o nga nasud ni Jehova?

³ Gin-gamit ni Jehova hi apostol Pedro nga aghaton an mga Judio ngan proselita nga magin membro han Iya bag-o nga nasud, an kongregasyon han dinihogan nga mga Kristiano. Han Pentekostes, maisugon nga ginsidngan ni Pedro an mga Judio nga kinahanglan nira karawaton hi Jesus, an tawo nga ira ‘iginraysang ha kahoy,’ tungod kay “ginhimo [hiya] han Dios nga Ginoo ngan Kristo.” Han nagpakiana ini nga mga tawo kon ano an sadang nira buhaton, hi Pedro binaton: “Magbasol kamo, ngan magpabawtismo an tagsa ha iyo ha ngaran ni Jesu-Kristo basi mapasaylo an iyo mga sala, ngan makakarawat niyo an waray bayad nga regalo nga baraan nga espiritu.” (Buh. 2:22, 23, 36-38) Hito nga adlaw, mga 3,000 an nahidugang ha bag-o nga nasud han espirituwal nga Israel. (Buh. 2:41) Katapos hito, damu pa an kumarawat han kamatuoran tungod han madasigon nga pagsangyaw han mga apostol. (Buh. 6:7) Nagtikadamu an membro han bag-o nga nasud.

⁴ Ha urhi, ginsangyawan liwat an mga Samaritano, ngan nagkaada ito maopay nga resulta. Damu an nabawtismohan tungod han pagsangyaw han ebanghelisador nga hi Felipe, pero waray dayon makarawat hini nga mga Samaritano an baraan nga espiritu. An nagmamando nga lawas ha Jerusalem nagsugo kanda apostol Pedro ngan Juan nga kumadto hinin nakombirte nga mga Samaritano. Igintungbaw han duha nga apostol an ira mga kamot hini nga mga nakombirte, “ngan nakarawat nira an baraan nga espiritu.” (Buh. 8:5, 6, 14-17) Salit ini nga mga Samaritano nagin mga dinihogan liwat ngan nagin mga membro han espirituwal nga Israel.

⁵ Han 36 C.E., gin-gamit na liwat han Dios hi Pedro nga aghaton an iba pa nga magin membro han bag-o nga nasud han espirituwal nga Israel. Nahitabo ini han nagsangyaw hiya ha Romano nga opisyal nga hi Cornelio pati ha mga paryente ngan kasangkayan hito. (Buh. 10:22, 24, 34, 35) An Biblia nasiring: “Samtang nagyayakan pa hi Pedro . . . , an ngatanan [diri Judio] nga namamati han pulong han Dios nakakarawat han baraan nga espiritu. Ngan nahipausa gud an tinuri nga mga tumuroo nga inupod kan Pedro, kay an waray bayad nga regalo nga baraan nga espiritu iginbuhos liwat ha mga tawo han mga nasud.” (Buh. 10:44, 45) Salit yana, nagin membro na han bag-o nga nasud han espirituwal nga Israel adton mga tumuroo nga diri turi nga mga Hentil.

6, 7. Ano an ginbuhat han mga membro han bag-o nga nasud sugad nga ‘katawohan nga nagdadara han ngaran ni Jehova’? Ngan mationan-o kahaluag an lukop han ira nabuhat?

⁶ Ha usa nga katirok han nagmamando nga lawas han siyahan-siglo nga mga Kristiano hadton  49 C.E., an disipulo nga hi Santiago nagsiring: “Iginsaysay pa la ni Simeon [Pedro] nga ginkarawat na han Dios an mga nasud, basi tikang ha ira makapili an Dios hin katawohan nga magdadara han iya ngaran.” (Buh. 15:14) Inin bag-o nga katawohan nga nagdadara han ngaran ni Jehova ginkukompwesto han mga tumuroo nga Judio ngan diri Judio. (Roma 11:25, 26a) Ha urhi, hi Pedro nagsurat: “Kay hadto diri kamo katawohan han Dios, pero yana katawohan na kamo niya.” Iginsaysay ni Pedro an katuyoan hini nga bag-o nga nasud, hiya nagsiring: “Kamo ‘ginpili nga lahi, mga hadi nga saserdote, baraan nga nasud, ngan katawohan nga espesyal nga panag-iya han Dios, basi ipasamwak niyo ha bisan diin an pagkaharangdon’ han usa nga nagtawag ha iyo tikang ha kasisidman ngadto ha iya urusahon gud nga kalamrag.” (1 Ped. 2:9, 10) Kinahanglan nira dayawon an Usa nga ira ginrirepresentaran ngan himayaon an iya ngaran ha mga tawo. Kinahanglan magin maisugon hira nga mga saksi ni Jehova, an Soberano han Uniberso.

⁷ Sugad han literal nga Israel, an mga membro han espirituwal nga Israel amo an gintawag ni Jehova nga “katawohan nga akon ginhitsura para ha akon ngahaw, nga hira magdayaw ha akon.” (Isa. 43:21) Tungod kay iginbuhayhag hinin siyahan-siglo nga mga Kristiano an ngatanan nga buwa nga dios nga ginsisingba hadto nga panahon, maisugon nga naipasamwak nira nga hi Jehova amo an totoo nga Dios. (1 Tes. 1:9) Nagpamatuod hira mahitungod kan Jehova ngan kan Jesus “ha Jerusalem, ha bug-os nga Judea ngan Samaria, ngan tubtob ha pinakahirayo nga lugar ha tuna.”—Buh. 1:8; Col. 1:23.

8. Ano an iginpahamangno ni apostol Pablo ha katawohan han Dios ha siyahan nga siglo?

⁸ Hi Pablo usa nga maisugon nga saksi ni Jehova. Bisan ha atubangan han pagano nga mga pilosopo, iya ginpamatud-an nga hi Jehova amo la an totoo nga Dios. Nangatadongan hiya nga hi Jehova “an Dios nga naghimo han kalibotan ngan han ngatanan nga aada hito, ini nga Usa, an Ginoo han langit ngan han tuna.” (Buh. 17:18, 23-25) Ha ikatarapos han ikatulo nga pagbiyahe ni Pablo sugad nga misyonero, iya ginpahamangnoan an katawohan han Dios: “Maaram ako nga kon bumaya na ako, maabot ha iyo an mga tawo nga pariho hin mapintas nga mga lobo ngan mamaltratuhon an panon, ngan tikang mismo ha iyo may mga tawo nga magyayakan hin baliko nga katutdoan basi pasundon ha ira an mga disipulo.” (Buh. 20:29, 30) Ini nga igintagna nga apostasya nakita gud han pag-ikatarapos han siyahan nga siglo.—1 Juan 2:18, 19.

9. Kamatay han mga apostol, ano an nahitabo ha ‘katawohan nga nagdadara han ngaran ni Jehova’?

⁹ Kamatay han mga apostol, nagsarang an apostasya ngan nagkaada hin mga relihiyon han Kakristianohan. Imbes nga pamatud-an nga hira an ‘katawohan nga nagdadara han ngaran ni Jehova,’ ginkuha han apostata nga mga Kristiano an ngaran han Dios ha ira damu nga hubad han Biblia. Ginkarawat nira an pagano nga mga rituwal ngan ginpasiparahan an Dios tungod han ira diri Kasuratanhon nga katutdoan, nakigbahin hira ha baraan kunohay nga mga girra, ngan nagbuhat hin imoral. Salit ha sulod hin mga siglo, gutiay la an matinumanon nga magsiringba ni Jehova dinhi ha tuna ngan waray pa hiya organisado nga ‘katawohan nga nagdadara han iya ngaran.’

10, 11. (a) Ano an igintagna ni Jesus ha iya parabola mahitungod han mga trigo ngan mga banwa? (b) Paonan-o an parabola ni Jesus natuman katapos han 1914, ngan ano an resulta?

¹⁰ Ha parabola ni Jesus mahitungod han mga trigo ngan mga banwa, iya igintagna nga tungod han apostasya magigin makuri gud an pagkilala ha totoo nga relihiyon. Nagsiring hiya nga samtang “nangangaturog an mga tawo,” an Yawa magsasabwag hin mga banwa ha uma nga ginsabwagan han Anak han tawo hin mga binhi han trigo. Urosa ito nga matubo tubtob ha “ikatarapos hini nga sistema.” Iginsaysay ni Jesus nga “an maopay nga binhi” nagrirepresentar ha  “mga anak han Ginhadian” ngan “an mga banwa” amo “an mga anak han usa nga maraot.” Ha panahon han kataposan, susugoon han Anak han tawo an iya “mag-arani,” an mga anghel, basi ibulag an simboliko nga trigo tikang ha mga banwa. Titirukon an mga anak han Ginhadian. (Mat. 13:24-30, 36-43) Paonan-o ini nahitabo, ngan paonan-o ginpahinabo hini nga maorganisar utro an katawohan ni Jehova dinhi ha tuna?

¹¹ An “ikatarapos hini nga sistema” nagtikang han 1914. Durante han girra nga nagtikang hito nga tuig, an yinukot nga dinihogan nga Kristiano, “an mga anak han Ginhadian,” mga bihag pa ha espirituwal han Babilonya nga Gamhanan. Han 1919, gintalwas hira ni Jehova, ngan nagin matin-aw an kaibahan nira tikang ha “mga banwa,” o diri totoo nga mga Kristiano. Iya gintirok “an mga anak han Ginhadian” basi magin organisado nga katawohan, sugad nga katumanan han tagna ni Isaias: “Matatawo ba an tuna ha usa ka adlaw? Ig-aanak ba an usa nga nasud ha hinanali? Kay ha pagbati la han Sion, hiya nagpakatawo han iya mga anak.” (Isa. 66:8) An Sion amo an kan Jehova organisasyon han mga anghel. ‘Nag-anak’ ito han naorganisar sugad nga usa nga nasud an dinihogan nga mga Kristiano dinhi ha tuna.

12. Paonan-o iginpakita han mga dinihogan nga hira yana an ‘katawohan nga nagdadara han ngaran ni Jehova’?

¹² Pariho han siyahan-siglo nga mga Kristiano, an dinihogan nga “mga anak han Ginhadian” magigin mga saksi ni Jehova. (Basaha an Isaias 43:1, 10, 11.) Naiiba hira tungod han ira Kristiano nga panggawi ngan han ira pagsangyaw ‘hinin maopay nga sumat han Ginhadian sugad nga pamatuod ha ngatanan nga nasud.’ (Mat. 24:14; Fil. 2:15) Tungod hini nga buruhaton, damu an ira nabuligan. Ha pagkamatuod, minilyon an nagkaada hin duok nga relasyon kan Jehova.—Basaha an Daniel 12:3.

13, 14. Basi makagsingba ngan makag-alagad kan Jehova, ano an kinahanglan buhaton hadton diri mga dinihogan, ngan paonan-o ini igintagna ha Biblia?

¹³ Ha naglabay nga artikulo, hinbaroan naton nga ha kadaan nga Israel mahimo makagsingba kan Jehova an diri mga Israelita, pero kinahanglan  nira makig-upod ha katawohan nga pinili ni Jehova. (1 Hadi 8:41-43) Sugad man yana, adton diri mga dinihogan kinahanglan magsingba kan Jehova kaupod han iya dinihogan nga mga Saksi.

¹⁴ An pagdamu han mga nagsisingba kan Jehova kaupod han iya katawohan hinin panahon han kataposan igintagna hin duha nga propeta. Hi Isaias nagtagna: “Damu nga katawohan an makadto ngan masiring: Tana kamo, ngan sagka kita ngadto ha bukid ni Jehova, ngadto ha balay han Dios ni Jakob; ngan hiya magtututdo ha aton han iya mga dalan, ngan kita maglalakat ha iya mga agianan; kay tikang ha Sion magawas an balaud, ngan an pulong ni Jehova matikang ha Jerusalem.” (Isa. 2:2, 3) Hi propeta Sakarias nagtagna liwat nga “damu nga mga katawohan ngan magkusog nga mga nasud an makada pangita kan Jehova.” Iya iginhulagway hira sugad nga “napulo ka tawo tikang ha ngatanan nga yinaknan han mga nasud” nga ha simboliko nga paagi, makapot hira ha bado han espirituwal nga Israel, ngan masiring: “Kami maupod ha iyo, kay kami nakabati nga an Dios aada kaupod niyo.”—Sak. 8:20-23.

15. An “iba nga mga karnero” nasuporta ha mga dinihogan ha ano nga buruhaton?

¹⁵ An “iba nga mga karnero” ‘naupod,’ o nasuporta ha mga dinihogan ha pagsangyaw han maopay nga sumat han Ginhadian. (Mar. 13:10) Nagin bahin hira han katawohan han Dios, “usa nga panon” nga kaupod an mga dinihogan, nga ginpapangunahan han “maopay nga paraataman,” hi Kristo Jesus.—Basaha an Juan 10:14-16.

16. Ano an bubuhaton ni Jehova nga magpapahinabo basi magtikang an ultimo nga bahin han “daku nga kasakitan”?

¹⁶ Katapos mabungkag an Babilonya nga Gamhanan, makakaeksperyensya an katawohan ni Jehova hin duro nga pag-atake. Basi kita makatalwas, kinahanglan naton an proteksyon ni Jehova. Tungod kay ini nga pag-atake magpapahinabo nga magtikang an ultimo nga bahin han “daku nga kasakitan,” hi Jehova mismo an magmamaniobra basi mahitabo ini. (Mat. 24:21; Esek. 38:2-4) Hito nga panahon, aatakehon ni Gog an “mga tawo nga gintirok tikang ha mga nasud,” an katawohan ni Jehova. (Esek. 38:10-12) Ini nga pag-atake an magigin tigaman basi ipadapat an paghukom ni Jehova kan Gog ngan ha mga sakop hito. Hihimayaon ni Jehova an iya pagkasoberano ngan babaraanon an iya ngaran, kay hiya nasiring: “Ako magpapakilala ha akon ngahaw ha mga mata han damu nga nasud; ngan hira makakakilala nga ako hi Jehova.”—Esek. 38:18-23.

17, 18. (a) Kon atakehon na ni Gog an katawohan ni Jehova, ano nga instruksyon an ira makakarawat? (b) Kon karuyag naton proteksyonan kita ni Jehova, ano an kinahanglan naton buhaton?

¹⁷ Kon magtikang na an pag-atake ni Gog, hi Jehova masiring ha iya katawohan: “Kadi, katawohan ko, sulod ikaw ha imo mga sulod, ngan panadhi an imo mga ganghaan palibot ha imo: tumago ka ha madali nga panahon, ngada nga an kaaligutgot matapos.” (Isa. 26:20) Hito nga kritikal nga panahon, hi Jehova maghahatag hin instruksyon basi kita maluwas. An “mga sulod” nga kwarto posible nga may kalabotan ha aton tagsa nga kongregasyon.

¹⁸ Salit kon karuyag naton proteksyonan kita ni Jehova durante han daku nga kasakitan, kinahanglan naton karawaton nga may katawohan hiya dinhi ha tuna, nga gin-organisar sugad nga mga kongregasyon. Kinahanglan padayon kita nga dumapig ha ira ngan magpabilin nga duok ha aton tagsa nga kongregasyon. Pariho han salmista, hinaot bug-os-kasingkasing nga sumiring kita: “An kaluwasan kan Jehova: An imo pagbendisyon aada ha imo katawohan.”—Sal. 3:8.