Sekarea 6:1-15

  • Ponatshegelo 8: Dikara tse nnê (1-8)

  • Letlhogela o tla nna kgosi le moperesiti (9-15)

6  Go tswa foo, ke ne ka leba kwa godimo gape mme ka bona dikara tse nnê di tswa mo gare ga dithaba tse pedi, mme dithaba tseo e ne e le tsa kopore.  Kara ya ntlha e ne e gogwa ke dipitse tse dikhibidu, mme kara ya bobedi e ne e gogwa ke dipitse tse dintsho.+  Kara ya boraro e ne e gogwa ke dipitse tse ditshweu, mme kara ya bonê e ne e gogwa ke dipitse tse di marontho le tse di mebalabala.+  Ke ne ka botsa moengele yo o neng a bua le nna ka re: “Morena wa me, dilo tseno di kaya eng?”  Moengele o ne a nkaraba a re: “Dilo tseno di emela dibopiwa tse nnê+ tsa magodimo tse e reng fa di sena go ema fa pele ga Morena wa lefatshe lotlhe di bo di tswa.+  Ya* dipitse tse dintsho e ya kwa lefatsheng la bokone;+ dipitse tse ditshweu di ya ka kwa ga lewatle; mme dipitse tse di marontho di ya kwa lefatsheng la borwa.  Dipitse tse di mebalabala tsone di ne di ikemiseditse go ya go tsamayatsamaya mo lefatsheng lotlhe.” Foo o ne a re: “Tsamayang lo ye go tsamayatsamaya mo lefatsheng lotlhe.” Mme di ne tsa simolola go tsamayatsamaya mo lefatsheng lotlhe.  Go tswa foo, o ne a ntlhaeletsa mme a re: “Bona, dipitse tse di yang kwa lefatsheng la bokone di dirile gore moya wa ga Jehofa o nne mo lefatsheng la bokone.”  Jehofa o ne a bua le nna gape a re: 10  “Tsaya dilo tse Heledai, Tobija le Jedaia ba tlileng le tsone go tswa kwa bathong ba ba kwa botshwarwa; mme mo letsatsing leo, o ye kwa ntlong ya ga Josia morwa Sefania mmogo le batho bano ba ba tlileng ba tswa kwa Babelona. 11  O tseye selefera le gauta mme o dire serwalo* o bo o se rwesa Joshua+ morwa Jehosadake, yo e leng moperesiti yo mogolo. 12  Mme o mo reye o re,“‘Seno ke se Jehofa wa masomosomo a se buang: “Yono ke monna yo o bidiwang Letlhogela.+ O tla tlhoga mo lefelong la gagwe, e bile o tla aga tempele ya ga Jehofa.+ 13  Ke ene yo o tla agang tempele ya ga Jehofa, e bile ke ene yo o tla nnang le tlotlomalo. O tla nna mo setulong sa gagwe sa bogosi a bo a busa, mme gape o tla nna moperesiti a le mo setulong sa gagwe sa bogosi,+ mme go tla nna le tumalano ya kagiso fa gare ga bobedi jono.* 14  Mme serwalo* seo se tla nna mo tempeleng ya ga Jehofa e le segopotso sa ga* Heleme, Tobija, Jedaia+ le Hene morwa Sefania. 15  Batho ba ba tswang kgakala ba tla tla ba bo ba thusa fa go agiwa tempele ya ga Jehofa.” Mme lo tla tshwanelwa ke go itse gore Jehofa wa masomosomo o nthomile mo go lona. Mme seno se tla diragala fa e le gore lo tla reetsa lentswe la ga Jehofa, Modimo wa lona.’”

Dintlha Tse di Kwa Tlase

Go tewa kara.
Kgotsa “serwalo se sentle.”
Go tewa maikarabelo a gagwe e le mmusi le moperesiti.
Kgotsa “serwalo se sentle.”
Kgotsa “sengwe sa go gopola.”