Sekarea 1:1-21

  • Ba kgothalediwa go boela kwa go Jehofa (1-6)

    • ‘Boelang mo go nna mme ke tla boela mo go lona’ (3)

  • Ponatshegelo 1: Bapalami ba dipitse ba ba mo gare ga ditlhare tsa moretela (7-17)

    • ‘Jehofa o tla gomotsa Siona gape’ (17)

  • Ponatshegelo 2: Dinaka di le nnê le badiri ba ba ditswerere ba le banê (18-21)

1  Mo kgweding ya borobedi mo ngwageng wa bobedi wa puso ya ga Dario,+ Jehofa o ne a bua le moporofeti Sekarea*+ morwa Berekia, morwa Ido a re:  “Nna Jehofa, ke ne ka galefela borraalona fela thata.+  “Raya batho bano o re, ‘Seno ke se Jehofa wa masomosomo a se buang: “‘Boelang mo go nna,’ go bua Jehofa wa masomosomo, ‘mme ke tla boela mo go lona,’+ go bua Jehofa wa masomosomo.”’  “‘Lo se ka lwa tshwana le borraalona, ba baporofeti ba pele ba neng ba ba raya ba re: “Jehofa wa masomosomo a re, ‘Tsweetswee, tlogelang* ditsela tsa lona tse di bosula le ditiro tsa lona tse di bosula.’”’+ “‘Mme ba ne ba se ka ba reetsa, e bile ba ne ba se ka ba ntlhwaela tsebe,’+ go bua Jehofa.  “‘Ba kae borraalona jaanong? E bile a baporofeti bao ba ne ba tshelela ruri?  Le fa go ntse jalo, mafoko a me le ditaelo tsa me tse ke neng ka di laela batlhanka ba me, e leng baporofeti, di ne tsa diragalela borraalona, a ga go jalo?’+ Ka jalo ba ne ba boela mo go nna mme ba re: ‘Jehofa wa masomosomo o re diretse go ya ka ditsela tsa rona le ditiro tsa rona, fela jaaka a ne a ikaeletse.’”+  Mo letsatsing la bo24 la kgwedi ya bo11, e leng kgwedi ya Shebate,* mo ngwageng wa bobedi wa puso ya ga Dario,+ Jehofa o ne a dira gore nna moporofeti Sekarea morwa Berekia, morwa Ido ke bone ponatshegelo eno:  “Go ne go le bosigo. Foo ke ne ka bona monna a palame pitse e khibidu, mme o ne a eme fela a sa tshikinyege mo gare ga ditlhare tsa moretela mo mokgatšheng; mme ka fa morago ga gagwe go ne go na le dipitse tse dikhibidu, tse dikhunou le tse ditshweu.”  Ka jalo, ke ne ka re: “Morena wa me, bano ke bomang?” Moengele yo o neng a bua le nna o ne a nkaraba a re: “Ke tla go bontsha gore bano ke bomang.” 10  Foo monna yo o neng a eme fela a sa tshikinyege mo gare ga ditlhare tsa moretela o ne a re: “Bano ke ba Jehofa a ba rometseng gore ba tle go tsamayatsamaya mo lefatsheng.” 11  Mme ba ne ba raya moengele wa ga Jehofa yo o neng a eme mo gare ga ditlhare tsa moretela ba re: “Re ne ra tsamayatsamaya mo lefatsheng, mme lefatshe lotlhe le didimetse e bile ga le na matshwenyego.”+ 12  Ka jalo, moengele wa ga Jehofa o ne a re: “Ao tlhe Jehofa wa masomosomo, o tla tsaya lobaka lo lo kae o sa utlwele Jerusalema le metse ya Juda botlhoko,+ e o ntseng o e galefetse dingwaga tseno tse 70?”+ 13  Jehofa o ne a araba moengele yo o neng a bua le nna ka bonolo le ka mafoko a a gomotsang. 14  Go tswa foo, moengele yo o neng a bua le nna o ne a nthaya a re: “Tlhaeletsa o re, ‘Seno ke se Jehofa wa masomosomo a se buang: “Ke ikemiseditse go femela Jerusalema le Siona.+ 15  Ke ne ke galefetse ditšhaba tse di iketlileng.+ Fa ke ne ke otlhaya batho ba me ka gonne ke ne ke ba galefetse, ga ba a ka ba boga thata.+ Mme ditšhaba tseo di ne tsa ba gobatsa go feta tsela e ke neng ke ikaeletse.”’+ 16  “Ka jalo, seno ke se Jehofa a se buang: ‘“Ke tla boela kwa Jerusalema gore ke e utlwele botlhoko,+ mme ntlo ya me e tla agiwa mo go ene,”+ go bua Jehofa wa masomosomo, “e bile mogala o o lekanyang o tla phuthulelwa mo godimo ga Jerusalema.”’+ 17  “Tlhaeletsa gape o re, ‘Seno ke se Jehofa wa masomosomo a se buang: “Metse ya me e tla boa gape e penologa ka dilo tse di molemo; mme nna Jehofa ke tla gomotsa Siona gape+ e bile ke tla tlhopa Jerusalema gape.”’”+ 18  Foo ke ne ka leba kwa godimo mme ka bona dinaka di le nnê.+ 19  Ka jalo, ke ne ka botsa moengele yo o neng a bua le nna ka re: “Dinaka tseno di kaya eng?” O ne a nkaraba a re: “Dinaka tseno di emela mebuso e e neng ya phatlalatsa Juda,+ Iseraele+ le Jerusalema.”+ 20  Go tswa foo, Jehofa o ne a mpontsha badiri ba ba ditswerere ba le banê. 21  Ke ne ka botsa jaana: “Bano ba tlile go dira eng?” O ne a re: “Tseno ke dinaka tse di neng tsa phatlalatsa Juda mo e leng gore go ne ga sala go se na ope yo o kgonang go tsholetsa tlhogo ya gagwe. Ba bangwe bano ba tlile go di tshosa, ba tlile go latlhela fa fatshe dinaka tsa ditšhaba tse di neng tsa tsholetsa dinaka tsa tsone di tlhasela naga ya Juda, gore di phatlalatse batho ba gagwe.”

Dintlha Tse di Kwa Tlase

Mo go kayang “Jehofa o Gakologetswe.”
Kgotsa “boang mo.”