Sekarea 14:1-21

  • Go tla nna le kobamelo ya boammaaruri fela (1-21)

    • Thaba ya Lotlhware e tla phatloga ka bogare (4)

    • Jehofa o tla nna mongwe fela, le leina la gagwe le tla nna lengwe fela (9)

    • Petso e e tla tlelang baganetsi ba Jerusalema (12-15)

    • Go ketekiwa Moletlo wa Diobo (16-19)

    • Pitsa nngwe le nngwe e tla nna boitshepo mo go Jehofa (20, 21)

14  “Bona! Letsatsi le etla, letsatsi la ga Jehofa, la fa dithoto tse di tserweng mo go wena* di tla bo di kgaoganngwa mo go wena.  Ke tla phutha ditšhaba tsotlhe gore di lwe le Jerusalema; mme motse o tla gapiwa e bile matlo a tla thukuthiwa le basadi ba tla betelelwa. Halofo ya batho mo motseng e tla ya botshwarwa, mme batho ba ba setseng ga ba kitla ba kgaolwa mo motseng.  “Jehofa o tla tswa a bo a lwa le ditšhaba tseo+ jaaka fa a lwa mo letsatsing la tlhabano.+  Mo letsatsing leo, dinao tsa gagwe di tla ema mo Thabeng ya Lotlhware,+ e e lebileng kwa Jerusalema ka fa botlhaba; mme Thaba ya Lotlhware e tla phatloga ka bogare, go tswa kwa botlhaba go ya kwa bophirima,* mme e tla dira mokgatšha o mogolo thata; halofo ya thaba eo e tla sutelela kwa bokone, mme halofo e nngwe kwa borwa.  Lo tla tshabela kwa mokgatšheng wa dithaba tsa me, ka gonne mokgatšha wa dithaba tseo o tla ya go fitlha fela kwa Asele. Lo tla tshwanelwa ke go tshaba, fela jaaka lo ne lwa tshaba ka ntlha ya thoromo ya lefatshe mo motlheng wa ga Kgosi Usia wa Juda.+ Mme Jehofa, Modimo wa me o tla tla, mme ba ba boitshepo botlhe ba tla bo ba na le ene.+  “Mo letsatsing leo, go tla bo go se na lesedi le le phatsimang,+ dilo di tla bo di gatsetse.*  Mme e tla nna letsatsi le le itsegeng e le la ga Jehofa.+ Ga go kitla go nna motshegare, e bile ga go kitla go nna bosigo; mme maitseboa go tla nna lesedi.  Mo letsatsing leo, metsi a botshelo+ a tla elela a tswa kwa Jerusalema,+ halofo ya one e ya kwa lewatleng le le kwa botlhaba*+ mme halofo e nngwe ya one e ya kwa lewatleng le le kwa bophirima.*+ Seo se tla diragala selemo le mariga.  Mme Jehofa o tla nna Kgosi e e okametseng lefatshe lotlhe.+ Mo letsatsing leo, Jehofa o tla nna mongwe fela,+ le leina la gagwe le tla nna lengwe fela.+ 10  “Lefatshe lotlhe le tla tshwana le Araba,+ go simologa kwa Geba+ go ya kwa Rimone+ kwa borwa jwa Jerusalema; mme Jerusalema o tla tsholetsega mo lefelong la gagwe,+ e bile batho ba tla nna mo go ene, go simologa kwa Kgorong ya Benjamine+ go ya go fitlha kwa lefelong la Kgoro ya Ntlha, go ya go fitlha kwa Kgorong ya Sekhutlo, le go simologa kwa Toreng ya Hananele+ go ya go fitlha kwa digatisetsong tsa beine* tsa kgosi. 11  Mme batho ba tla nna mo go ene; ga go kitla go tlhola go nna le phutso ya gore a senngwe gape,+ e bile batho ba tla nna mo Jerusalema ka pabalesego.+ 12  “Mme eno ke petso e Jehofa a tla e tlisetsang ditšhaba tsotlhe tse di tlhabanang le Jerusalema:+ Nama ya bone e tla bola ba ntse ba eme ka dinao, matlho a bone a tla bolela mo dikgapeng tsa one, le maleme a bone a tla bola mo melomong ya bone. 13  “Mo letsatsing leo, Jehofa o tla dira gore go nne le tlhakatlhakano mo go bone; mme mongwe le mongwe o tla tshwara seatla sa molekane wa gagwe, e bile motho o tla tlhasela yo mongwe.+ 14  Juda le ene o tla bo a le mo ntweng eo kwa Jerusalema; mme dikhumo tsa ditšhaba tsotlhe tse di mo dikologileng di tla phuthiwa di le dintsi thata, e leng gauta le selefera le diaparo.+ 15  “Mme petso e e tshwanang le eo e tla tlela dipitse, bommoulo, dikamela, ditonki le diruiwa tsotlhe tse di mo dikampeng tseo. 16  “Mongwe le mongwe yo o setseng mo ditšhabeng tsotlhe tse di tlhabanang le Jerusalema o tla ya go ikobela* Kgosi, e leng Jehofa wa masomosomo,+ le go keteka Moletlo wa Diobo*+ ngwaga le ngwaga.+ 17  Le fa go ntse jalo, fa motho wa setšhaba sengwe mo lefatsheng a sa ye kwa Jerusalema go ya go ikobela Kgosi, e leng Jehofa wa masomosomo, ga ba kitla ba nesediwa pula epe.+ 18  Mme fa batho ba Egepeto ba sa tlhatlogele mo motseng ono e bile ba sa tsene mo go one, ga ba kitla ba nna le pula. Go na le moo, ba tla tlelwa ke petso e Jehofa a e tlisetsang ditšhaba tse di sa tleng go keteka Moletlo wa Diobo. 19  Eno e tla nna kotlhao ya boleo jwa Egepeto le boleo jwa ditšhaba tsotlhe tse di sa tleng go keteka Moletlo wa Diobo. 20  “Mo letsatsing leo, mafoko a a reng ‘Jehofa o Boitshepo!’+ a tla bo a kwadilwe mo ditlelokong tsa dipitse. Mme dipitsa tse di apeelang*+ tse di mo ntlong ya ga Jehofa di tla tshwana le dikotlele+ tse di fa pele ga sebeso. 21  Mme pitsa nngwe le nngwe e e apeelang* e e kwa Jerusalema le e e kwa Juda e tla nna boitshepo e bile e tla nna ya ga Jehofa wa masomosomo, mme batho botlhe ba ba ntshang ditlhabelo ba tla tla ba bo ba bedisa nama ka dingwe tsa tsone. Mo letsatsing leo, ga go kitla go tlhola go nna le Mokanana* mo ntlong ya ga Jehofa wa masomosomo.”+

Dintlha Tse di Kwa Tlase

Go tewa motse o go buiwang ka one mo go temana 2.
Seheb., “kwa lewatleng.”
Kgotsa “di sa tshikinyege,” jaaka e kete di gatseditswe ke serame.
Go tewa Lewatle le le Suleng.
Go tewa Lewatle la Mediterranean.
Kgotsa “kwa ditshekegeng tsa segatisetso sa beine.”
Kgotsa “obamela.”
Kgotsa “dipitsa tse di apeelang tse di molomo o mogolo.”
Kgotsa “pitsa nngwe le nngwe e e apeelang e e molomo o mogolo.”
Kgotsa gongwe “mogwebi.”