Samuele wa Ntlha 2:1-36

  • Thapelo ya ga Hana (1-11)

  • Maleo a bomorwa Eli (12-26)

  • Jehofa o atlhola ba lelapa la ga Eli (27-36)

2  Go tswa foo, Hana o ne a rapela jaana: “Pelo ya me e itumetse ka ntlha ya ga Jehofa;+Jehofa o ne a nnaya maatla.* Ke kgona go araba baba ba me ke le pelokgale,Gonne ke itumelela ditiro tsa gago tsa poloko.   Ga go na ope yo o boitshepo jaaka Jehofa,Ga go na ope kwantle ga gago,+E bile ga go na lefika lepe le le tshwanang le Modimo wa rona.+   Lo se ka lwa nnela go bua ka mabela;A go se tswe sepe sa boikgogomoso mo melomong ya lona,Gonne Jehofa ke Modimo wa kitso,+E bile ke ene yo o tshwanetseng go tlhatlhoba ditiro tsa batho.   Bora jwa banna ba ba maatla bo robagantswe,Mme ba ba bokoa* ba newa nonofo.+   Ba ba neng ba ja sentle ba tshwanetse go kopa go thapiwa gore ba bone senkgwe,Mme ba ba tshwerweng ke tlala ga ba kitla ba tshwarwa ke tlala.+ Moopa o belege ba le supa,+Mme yo o neng a na le bana ba basimane ba le bantsi o setse a le nosi fela.*   Jehofa o a bolaya, e bile o boloka botshelo;*O folosetsa mo Lebitleng,* e bile o ntsha teng.+   Jehofa o a humanegisa e bile o a humisa;+O a kokobetsa e bile o a godisa.+   O kakatlolola motho wa maemo a a kwa tlase mo loroleng;O ntsha mohumanegi mo thotobolong ya matlakala,+Gore a ba nnise le dikgosana;O ba naya setulo sa tlotlo. Dipilara tsa lefatshe ke tsa ga Jehofa,+E bile o baya naga e e ungwang mo go tsone.   O disa dikgato tsa batho ba gagwe ba ba ikanyegang,+Mme ba ba bosula bone ba tla didimadiwa mo lefifing,+Gonne motho ga a fenye ka gonne a le maatla.+ 10  Jehofa o tla thubaganya ba ba lwang le ene;*+Fa a ba galefela, magodimo a tla duma.+ Jehofa o tla atlhola go ya go fitlha kwa mafelelong a lefatshe,+O tla naya kgosi ya gagwe maatla+E bile o tla godisa lonaka* lwa motlodiwa wa gagwe.”+ 11  Go tswa foo, Elekana o ne a ya kwa ntlong ya gagwe kwa Rama mme mosimane o ne a nna modiredi wa ga* Jehofa+ fa pele ga ga moperesiti Eli. 12  Jaanong bomorwa Eli e ne e le banna ba ba bosula;+ ba ne ba sa tlotle Jehofa. 13  Seno ke se ba neng ba se dira ka tshwanelo e baperesiti ba neng ba e newa e tswa mo bathong:+ Nako epe fela fa motho a ne a ntsha setlhabelo, motlhokomedi wa moperesiti o ne a tla a tshotse foroko e e meno mararo mo seatleng sa gagwe fa nama e ntse e apeilwe, 14  mme o ne a tle a e tsenye mo sekotleleng, mo pitseng e e apeelang e e melepo* mebedi, mo pitseng e kgolo kgotsa mo pitseng e nngwe fela e e apeelang. Sepe fela se foroko e neng e se ntsha, moperesiti o ne a se itseela. Ke sone se ba neng ba tle ba se dire Baiseraele botlhe ba ba neng ba tla kwa Shilo. 15  Gape, tota le pele ga motho yo o ntshang setlhabelo a fisa mafura gore a kuise mosi,+ motlhokomedi wa moperesiti o ne a tla a bo a mo raya a re: “Naya moperesiti nama gore a e bese. Ga a kitla a tsaya nama e e apeilweng mo go wena, o tla tsaya e tala fela.” 16  E ne e re fa motho yoo a mo raya a re: “Ba letle ba fise mafura gore a kuise mosi pele,+ go tswa foo o itseele sengwe le sengwe fela se o se eletsang,”* ene o ne a re: “Nnyaa, e nneye gone jaanong; go seng jalo, ke tla e tsaya ka dikgoka!” 17  Ka jalo, boleo jwa batlhokomedi bo ne jwa nna bogolo thata fa pele ga ga Jehofa,+ ka gonne banna bao ba ne ba sa tlotle setlhabelo sa ga Jehofa. 18  Jaanong Samuele o ne a direla+ fa pele ga ga Jehofa, a apere* khiba ya letsela le le boleta,+ le fa gone e ne e sa ntse e le mosimane. 19  Gape mmaagwe o ne a tle a mo direle seaparo se sennye se se se nang mabogo a bo a se tlisa kwa go ene ngwaga le ngwaga fa a tla le monna wa gagwe ba tla go ntsha setlhabelo sa ngwaga le ngwaga.+ 20  Mme Eli o ne a segofatsa Elekana le mosadi wa gagwe a re: “E kete Jehofa a ka go naya bana ka mosadi yono mo boemong jwa ngwana yo o adimilweng Jehofa.”+ Mme ba ne ba boela gae. 21  Jehofa o ne a gakologelwa Hana, mo e leng gore o ne a ima;+ mme o ne a tshola bana ba basimane ba le bararo le bana ba basetsana ba le babedi. Mme mosimane Samuele o ne a tswelela a gola fa pele ga ga Jehofa.+ 22  Jaanong Eli o ne a tsofetse thata, le fa go ntse jalo, o ne a tlhola a utlwa ka dilo tsotlhe tse bomorwawe ba neng ba di dira+ mo Iseraele yotlhe le kafa ba neng ba tle ba tlhakanele dikobo le basadi ba ba neng ba direla kwa kgorong ya tente ya bokopanelo ka gone.+ 23  O ne a tle a ba reye a re: “Ke ka ntlha yang fa lo nnela go dira dilo tse di ntseng jaana? Gonne dilo tse ke di utlwang ka ga lona mo bathong botlhe di bosula. 24  Nnyaa, bomorwaaka, pego e ke utlwang e buiwa mo bathong ba ga Jehofa ga e molemo. 25  Fa motho a ka leofela motho yo mongwe, mongwe a ka nna a kopa Jehofa gore a thuse motho yoo;* mme gone fa motho a ka leofela Jehofa,+ ke mang yo o tla mo rapelelang?” Le fa go ntse jalo, ba ne ba gana go reetsa rraabone, mme jaanong Jehofa o ne a ikemiseditse go ba bolaya.+ 26  Mo nakong eno yotlhe, mosimane Samuele o ne a ntse a gola, e bile Jehofa mmogo le batho ba ne ba tswelela ba mo rata.+ 27  Monna mongwe yo o boifang Modimo o ne a tla kwa go Eli mme a mo raya a re: “Seno ke se Jehofa a se buang: ‘A ga ke a ka ka ikitsise rragomogolo le ba lelapa la gagwe ka tlhamalalo fa ba ne ba le kwa Egepeto e le makgoba mo ntlong ya ga Faro?+ 28  Mme o ne a tlhophiwa mo ditsong tsotlhe tsa Iseraele+ gore a direle e le moperesiti wa me le gore a tlhatlogele kwa sebesong sa me+ gore a ntshe ditlhabelo, a fise maswalo* a bo a apare khiba fa pele ga me; mme ke ne ka naya ditlogolwana tsa ga rragomogolo ditlhabelo tsotlhe tse di dirwang ka molelo tsa Baiseraele.*+ 29  Ke ka ntlha yang fa lo nyatsa* setlhabelo sa me se ke laetseng gore se ntshiwe mo lefelong le ke nnang mo go lone?+ Goreng o nna o tlotla bomorwao go mpheta ka go inontsha ka dikarolo tsa ditlhabelo tse Baiseraele ba di tlisang gore di fisiwe ka molelo?+ 30  “‘Ke gone ka moo lefoko la ga Jehofa, Modimo wa Iseraele le reng: “Ruri ke ne ka re ba lelapa la gago le ba lelapa la ga rragomogolo ba tla tsamaya mo ditseleng tsa me ka metlha.”+ Mme jaanong Jehofa a re: “Go ka se direge ka nna, ka gonne ba ba ntlotlang ke tla ba tlotla,+ mme ba ba nnyatsang ba tla nyadiwa.” 31  Metlha e etla e mo go yone ke tla kgaolang nonofo* ya gago le ya ba lelapa la ga rrago, gore go se ka ga nna le motho ope mo lelapeng la gago yo o tla tshelang go fitlha a tsofala.+ 32  Ka nako ya fa ke direla Iseraele se se molemo, o tla leba mmaba wa gago mo ntlong ya me,+ mme ga go kitla go nna le motsofe gape mo lelapeng la gago. 33  Setlogolwana sa gago se ke sa se tlosang gore se se ka sa direla fa sebesong sa me, se tla dira gore matlho a gago a koafale e bile se tla dira gore o hutsafale, le fa go ntse jalo, bontsi jwa ba lelapa la gago ba tla swa ba bolawa ka tšhaka.+ 34  Mme se se tla diragalelang bomorwao ba babedi, Hofeni le Finease, e tla nna sesupo mo go wena: Boobabedi ba tla swa mo letsatsing le le lengwe.+ 35  Go tswa foo, ke tla itlhomela moperesiti yo o ikanyegang.+ O tla dira go dumalana le se pelo ya me e se eletsang;* mme ke tla mo agela ntlo e e tla nnelang ruri, mme o tla tsamaya fa pele ga motlodiwa wa me ka metlha. 36  Ope fela yo o setseng mo lelapeng la gago o tla tla a bo a mo ikobela gore a duelwe ka madi le ka senkgwe, mme o tla re: “Tsweetswee, nkabele nngwe ya ditiro tsa boperesiti gore ke je thathana ya senkgwe.”’”+

Dintlha Tse di Kwa Tlase

Seheb., “Lonaka lwa me lo godisitswe ke Jehofa.” Bona “Lonaka” mo Ditlhaloso Tsa Mafoko.
Kgotsa “kgopiwang.”
Seheb., “o omeletse.”
Kgotsa “o busetsa mo botshelong.”
Kgotsa “Sheole.” Bona Ditlhaloso Tsa Mafoko.
Kgotsa gongwe “Ba ba ganetsanang le Jehofa ba tla tshoga.”
Kgotsa “nonofo.” Bona Ditlhaloso Tsa Mafoko.
Kgotsa “o ne a direla.”
Kgotsa “megala.”
Kgotsa “se o se galelang.”
Seheb., “a ikgatlhile ka.”
Kgotsa gongwe “Modimo o tla mo atlholela.”
Kgotsa gongwe “a kuise mosi wa setlhabelo.”
Seheb., “bomorwa Iseraele.”
Seheb., “raga.”
Seheb., “lebogo.”
Kgotsa “le se se mo pelong ya me le mo mogopolong wa me.”