Samuele wa Ntlha 12:1-25

  • Samuele o a laela (1-25)

    • ‘Lo se ka lwa sala dilo tsa lefela morago’ (21)

    • Jehofa ga a kitla a latlha batho ba gagwe (22)

12  La bofelo Samuele o ne a raya Baiseraele botlhe a re: “Ke dirile* sotlhe se lo neng lwa se nkopa, mme ke lo tlhometse kgosi gore e lo buse.+  Jaanong kgosi ke eno e e tla lo etelelang pele!*+ Fa e le nna, ke tsofetse e bile ke tlhogoputswa, mme bomorwaake ke bano ba na le lona,+ mme ke ne ka lo etelela pele go tloga bosheng jwa me go fitlha mo letsatsing leno.+  Ke nna yo. Ntatofatsang fa pele ga ga Jehofa le fa pele ga motlodiwa wa gagwe:+ Ke tsere poo kgotsa tonki ya ga mang?+ Kgotsa ke tsieditse mang e bile ke gateletse mang? Ke amogetse pipamolomo* mo seatleng sa ga mang gore a dire gore ke lebe go sele?+ Fa e le gore ke dirile jalo, ke tla di lo busetsa.”+  Fa a rialo ba ne ba re: “Ga o a re tsietsa, le gone ga o a re gatelela e bile ga o a amogela sepe gotlhelele mo seatleng sa ga ope.”  Ka jalo, o ne a ba raya a re: “Jehofa le motlodiwa wa gagwe ke basupi mo letsatsing leno gore ga lo a bona sepe se lo ka ntatofatsang ka sone.”* Foo ba ne ba re: “Ke mosupi.”  Ka jalo, Samuele o ne a raya batho a re: “Jehofa, yo o neng a dirisa Moshe le Arone le yo o neng a ntsha borraalonamogolo kwa lefatsheng la Egepeto,+ ke mosupi.  Mme jaanong emang mo maemong a lona, mme ke tla nna moatlhodi wa lona fa pele ga ga Jehofa ke bo ke lo gopotsa ditiro tsotlhe tse di siameng tse Jehofa a di diretseng lona le borraalonamogolo.  “Fela fa Jakobe a sena go goroga kwa Egepeto+ mme borraalonamogolo ba simolola go rapela Jehofa ba kopa thuso,+ Jehofa o ne a romela Moshe+ le Arone gore ba etelele pele borraalonamogolo go tswa kwa Egepeto le gore ba ba tlise mo lefelong leno gore ba nne mo go lone.+  Le fa go ntse jalo, ba ne ba lebala Jehofa, Modimo wa bone, mme o ne a ba tsenya*+ mo seatleng sa ga Sisera+ molaodi wa masole a kwa Hasore le mo seatleng sa Bafilisitia+ le mo seatleng sa kgosi ya Moabe,+ mme ba ne ba tlhabana le bone. 10  Mme ba ne ba goela kwa go Jehofa ba kopa thuso+ mme ba re, ‘Re leofile+ ka gonne re tlogetse Jehofa mme ra ya go direla Bobaale+ le ditshwantsho tsa ga Ashethorethe;+ jaanong re golole mo seatleng sa baba ba rona gore re tle re go direle.’ 11  Foo Jehofa o ne a romela Jerubaale+ le Bedane le Jefetha+ le Samuele+ mme o ne a lo golola mo seatleng sa baba ba lona ba ba lo dikologileng gore lo kgone go nna ka polokesego.+ 12  E rile lo bona gore Nahashe,+ kgosi ya Baamone, o ne a tlile go lo tlhasela, lo ne lwa nna lwa nthaya lwa re, ‘Nnyaa, re batla go busiwa ke kgosi!’+ le fa gone Jehofa, Modimo wa lona e le ene Kgosi ya lona.+ 13  Jaanong kgosi e lo e tlhophileng ke eno, kgosi e lo e kopileng. Bonang, Jehofa o tlhomile kgosi gore e lo buse.+ 14  Fa lo boifa Jehofa,+ lo mo direla+ mme lo utlwa lentswe la gagwe+ e bile lo reetsa taelo ya ga Jehofa, mme lona mmogo le kgosi e e lo busang lo latela Jehofa, Modimo wa lona, go siame. 15  Le fa go ntse jalo, fa lo sa ikobele lentswe la ga Jehofa e bile lo sa reetse taelo ya ga Jehofa, Jehofa o tla lo otlhaya le borraalona.+ 16  Jaanong emang mo maemong a lona mme lo bone selo seno se segolo se Jehofa a se dirang fa pele ga matlho a lona. 17  A gompieno ga se thobo ya korong? Ke tla rapela Jehofa gore a dire gore go nne le tumo ya maru le pula; foo lo itse lo bo lo tlhaloganye gore lo dirile selo se se bosula mo matlhong a ga Jehofa ka go ikopela kgosi.”+ 18  Ka yone nako eo, Samuele o ne a rapela Jehofa, mme Jehofa a dira gore go nne le tumo ya maru le pula mo letsatsing leo, mo batho botlhe ba neng ba boifa Jehofa le Samuele thata. 19  Mme batho botlhe ba ne ba raya Samuele ba re: “Re rapelele kwa go Jehofa, Modimo wa gago+ e re ka re sa batle go swa, ka gonne re okeditse maleo a rona otlhe ka bosula jo bongwe fa re ne re ikopela kgosi.” 20  Ka jalo, Samuele o ne a raya batho a re: “Lo se ka lwa boifa. Gone lo dirile bosula jono jotlhe. Mme gone lo se ka lwa fapoga lwa tlogela go sala Jehofa morago,+ mme lo direle Jehofa ka pelo ya lona yotlhe.+ 21  Lo se ka lwa fapoga lwa sala dilo tsa lefela* morago,+ tse di se nang mosola+ e bile di ka se ka tsa golola, ka gonne ke dilo tsa lefela.* 22  Gonne ka ntlha ya leina la gagwe le legolo,+ Jehofa ga a kitla a latlha batho ba gagwe,+ ka gonne Jehofa o ne a ikemisetsa go lo dira batho ba gagwe.+ 23  Fa e le nna, go ka se direge gore ke leofele Jehofa ka go kgaotsa go lo rapelela, mme ke tla tswelela ke lo ruta tsela e e molemo le e e siameng. 24  Lo boife Jehofa+ lo bo lo mo direle ka boikanyegi,* ka pelo yotlhe ya lona, ka gonne lo bone dilo tse dikgolo tse a di lo diretseng.+ 25  Le fa go ntse jalo, fa ka botlhogoethata lo dira se se bosula, lo tla nyelediwa,+ lona le kgosi ya lona.”+

Dintlha Tse di Kwa Tlase

Seheb., “Ke reeditse lentswe la lona malebana le.”
Seheb., “e e tla tsamayang fa pele ga lona.”
Kgotsa “madi a a didimatsang motho.”
Seheb., “ga lo a bona sepe mo seatleng sa me.”
Seheb., “rekisetsa.”
Kgotsa “dilo tse e seng tsa mmatota.”
Kgotsa “dilo tse e seng tsa mmatota.”
Kgotsa “ka boammaaruri.”