Samuele wa Ntlha 16:1-23

  • Samuele o tlotsa Dafide go nna kgosi (1-13)

    • ‘Jehofa o bona se se mo pelong’ (7)

  • Moya wa Modimo o tlosiwa mo go Saulo (14-17)

  • Dafide o leletsa Saulo harepa (18-23)

16  La bofelo Jehofa o ne a raya Samuele a re: “O tla hutsafalela Saulo ka lobaka lo lo kae,+ e re ka nna ke sa batle gore a tswelele a busa e le kgosi ya Iseraele?+ Tlatsa lonaka lwa gago ka leokwane+ mme o tsamaye. Ke tla go roma kwa go Jese+ wa Mobethelehema, ka gonne ke itlhophetse kgosi go tswa mo go bomorwawe.”+  Le fa go ntse jalo, Samuele o ne a re: “Nka tsamaya jang? Fa Saulo a utlwa ka gone, o tla mpolaya.”+ Jehofa o ne a mo raya a re: “Tsaya kgongwana o tsamaye ka yone mme o re, ‘Ke tlile go ntshetsa Jehofa setlhabelo.’  O laletse Jese kwa setlhabelong; go tswa foo ke tla go bolelela gore o dire eng. O tshwanetse go ntloletsa yo ke tla go mo kaelang.”+  Samuele o ne a dira se Jehofa a se buileng. E rile a goroga kwa Bethelehema,+ bagolwane ba motse oo ba ne ba roroma fa ba kopana le ene, mme ba ne ba re: “A o tla ka kagiso?”  Fa ba rialo, o ne a re: “Ke tla ka kagiso. Ke tlile go ntshetsa Jehofa setlhabelo. Iphepafatseng,* mme lo tle le nna kwa setlhabelong.” Go tswa foo, o ne a phepafatsa Jese le bomorwawe, mme morago ga moo o ne a ba biletsa kwa setlhabelong.  E rile ba tsena mme a bona Eliabe,+ o ne a re: “Ruri fano fa pele ga ga Jehofa go eme motlodiwa wa gagwe.”  Le fa go ntse jalo, Jehofa o ne a raya Samuele a re: “O se ka wa tlhoma mogopolo mo tseleng e a lebegang ka yone le gore o moleele,+ ka gonne ke mo ganne. Gonne tsela e motho a bonang ka yone ga se tsela e Modimo a bonang ka yone, ka gonne motho o bona se se bonwang ke matlho fela, mme Jehofa ene o bona se se mo pelong.”+  Go tswa foo, Jese o ne a bitsa Abinadabe+ a bo a mo laela gore a fete fa pele ga ga Samuele, mme Samuele o ne a re: “Le yono Jehofa ga a mo tlhopha.”  Morago ga moo, Jese o ne a tlisa Shammahe,+ mme Samuele o ne a re: “Le yono Jehofa ga a mo tlhopha.” 10  Ka jalo, Jese o ne a fetisa bomorwawe ba ba supa fa pele ga ga Samuele, le fa go ntse jalo Samuele o ne a raya Jese a re: “Jehofa ga a tlhopha ope mo go bano.” 11  La bofelo Samuele o ne a raya Jese a re: “A bana ba gago ba basimane ba feletse?” Foo o ne a re: “Yo mmotlana mo go bone ga a yo;+ o disitse dinku.”+ Samuele o ne a raya Jese a re: “Roma mongwe gore a ye go mmitsa, ka gonne ga re kitla re ja go fitlha a tla fano.” 12  Ka jalo, o ne a roma mongwe gore a ye go mmitsa mme a mo tlisa. Jaanong o ne a le mohibidu, a na le matlho a mantle e bile a le montle.+ Foo Jehofa o ne a re: “Ema o mo tlotse, ka gonne yono ke ene yo ke mo tlhophileng!”+ 13  Ka jalo, Samuele o ne a tsaya lonaka lwa leokwane+ mme a mo tlotsa fa pele ga bomogolowe. Mme moya wa ga Jehofa o ne wa simolola go naya Dafide maatla go tloga mo letsatsing leo go ya pele.+ Moragonyana Samuele o ne a ya kwa Rama.+ 14  Jaanong moya wa ga Jehofa o ne o dule mo go Saulo,+ mme moya o o bosula o o tswang kwa go Jehofa o ne o mo tshwenya.+ 15  Batlhanka ba ga Saulo ba ne ba mo raya ba re: “O a bona gore moya o o bosula o o tswang kwa Modimong o a go tshwenya. 16  Tsweetswee, morena wa rona laela batlhanka ba gago gore ba batle monna yo e leng setswerere sa go letsa harepa.+ Nako epe fela fa moya o o bosula o o tswang kwa Modimong o tla mo go wena, o tla e letsa, mme o tla nna botoka.” 17  Ka jalo, Saulo o ne a raya batlhanka ba gagwe a re: “Tsweetswee, mpatleleng monna yo o nang le bokgoni jwa go letsa harepa, mme lo mo tlise kwa go nna.” 18  Mongwe wa batlhokomedi o ne a re: “Ke bone kafa morwa Jese wa Mobethelehema a leng setswerere sa go letsa harepa ka gone, e bile ke motlhabani yo o pelokgale le yo o maatla.+ O itse go bua, o montle+ e bile Jehofa o na le ene.”+ 19  Foo Saulo o ne a romela barongwa kwa go Jese a re: “Romela morwao e bong Dafide, yo o disang letsomane, kwa go nna.”+ 20  Foo Jese o ne a tsaya senkgwe, modutwana* wa beine le potsane mme a di belesa mo tonking a bo a di romela kwa go Saulo ka morwawe e bong Dafide. 21  Ka jalo, Dafide o ne a tla mo go Saulo mme a simolola go mo direla.+ Saulo o ile a mo rata thata, mme o ne a nna motsholadibetsa wa gagwe. 22  Saulo o ne a romela molaetsa ono kwa go Jese: “Tsweetswee, mma Dafide a tswelele a ntirela, ka gonne ke mo amogetse.” 23  Nako epe fela fa moya o o bosula o o tswang kwa Modimong o ne o tla mo go Saulo, Dafide o ne a tsaya harepa a bo a e letsa, mme Saulo o ne a gololesega a bo a nna botoka, mme moya o o bosula o ne o tswa mo go ene.+

Dintlha Tse di Kwa Tlase

Go tewa ba iphepafatsa go dumalana le molao wa Modimo.