Samuele wa Ntlha 18:1-30
18 Fa Jonathane+ a sena go utlwa se Dafide a neng a se bolelela Saulo, ba ne ba nna ditsala tse di atamalaneng thata,* mme Jonathane o ne a simolola go mo rata jaaka a ithata.+
2 Go tloga ka letsatsi leo, Saulo o ne a tsaya Dafide a nna le ene, mme ga a ka a mo letla go boela kwa lelapeng la ga rraagwe.+
3 Mme Jonathane le Dafide ba ne ba dira kgolagano,+ ka gonne o ne a mo rata jaaka a ithata.+
4 Jonathane o ne a apola seaparo se se se nang mabogo se a neng a se apara a bo a se naya Dafide, mmogo le seaparo sa gagwe sa tlhabano, tšhaka ya gagwe, bora jwa gagwe le lebanta la gagwe.
5 Dafide o ne a simolola go ya ntweng mme gongwe le gongwe kwa Saulo a neng a mo roma gone, o ne a atlega.*+ Ka jalo, Saulo o ne a mo tlhoma gore a okamele banna ba ntwa+ mme seno se ne sa itumedisa batho botlhe le batlhanka ba ga Saulo.
6 Fa Dafide le ba bangwe ba ne ba boa ba tswa go kgemetha Bafilisitia, basadi ba ne ba tswa mo metseng yotlhe ya Iseraele ba opela+ e bile ba bina ba itumetse ba tla go kgatlhantsha Kgosi Saulo ka meropana+ le ka dilutu.
7 Basadi bano ba ba neng ba itumetse ba ne ba opela ba re:
“Saulo o bolaile dikete,Mme Dafide ene o bolaile dikete di le masome.”+
8 Saulo o ne a galefa fela thata,+ mme pina eno e ne ya se ka ya mo itumedisa ka gonne o ne a re: “Ba re Dafide o bolaile dikete di le masome, mme nna ke bolaile dikete. Go setse fela gore ba mo neye bogosi!”+
9 Go tloga mo letsatsing leo go ya pele, ka metlha Saulo o ne a belaela Dafide.
10 Letsatsi le le latelang, moya o o bosula o o tswang kwa Modimong o ne wa tla mo go Saulo,+ mme o ne a simolola go itshwara ka tsela e e sa tlwaelegang* mo ntlong, fa Dafide ene a ne a letsa harepa+ jaaka mo makgetlong a mangwe. Saulo o ne a tshwere lerumo mo seatleng sa ga gagwe,+
11 mme o ne a konopa lerumo+ leo a ipolelela jaana: ‘Ke tla phunyeletsa Dafide mo loboteng!’ Le fa go ntse jalo, Dafide o ne a tshaba fa go ene makgetlo a le mabedi.
12 Foo Saulo o ne a boifa Dafide ka gonne Jehofa o ne a na le ene,+ mme o ne a tlogetse Saulo.+
13 Ka jalo, Saulo o ne a mo tlosa fa go ene a bo a mo tlhoma go nna molaodi wa sekete, mme Dafide o ne a tle a etelele masole pele go ya ntweng.*+
14 Dafide o ne a tswelela a atlega*+ mo go sotlhe se a neng a se dira, mme Jehofa o ne a na le ene.+
15 E rile Saulo a lemoga gore o ne a atlega thata, o ne a mmoifa.
16 Le fa go ntse jalo, Iseraele le Juda yotlhe e ne e rata Dafide, ka gonne o ne a ba etelela pele mo matsholong a bone.
17 Moragonyana Saulo o ne a raya Dafide a re: “Morwadiake yo mogolo e bong Merabe+ ke yono. Ke tla go mo naya gore e nne mosadi wa gago.+ Le fa go ntse jalo, o tswelele o ntirela ka bopelokgale e bile o tlhabana dintwa tsa ga Jehofa.”+ Gonne Saulo o ne a ipolelela jaana: ‘Ga nkitla ke tlhoka go bolaya Dafide. Bafilisitia e tla nna bone ba mmolayang.’+
18 Foo Dafide o ne a raya Saulo a re: “Tota nna ke mang e bile ba losika lwa me, ba lelapa la ga rre mo Iseraele, ke bomang gore ke nne mogwe wa kgosi?”+
19 Le fa go ntse jalo, fa nako ya gore Dafide a newe morwadia Saulo e bong Merabe e goroga, Merabe o ne a setse a neilwe Aderiele+ wa Momehola gore a mo nyale.
20 Jaanong morwadia Saulo e bong Mikale+ o ne a rata Dafide, mme Saulo o ne a begelwa ka gone, mme o ne a itumelela seno.
21 Ka jalo, Saulo o ne a re: “Ke tla mo mo naya gore e nne leano la go tshwara Dafide, gore Bafilisitia ba tle ba mmolaye.”+ Go tswa foo, Saulo o ne a raya Dafide lekgetlo la bobedi a re: “O tla dira kgolagano ya lenyalo le nna* gompieno.”
22 Mo godimo ga moo, Saulo o ne a laela batlhanka ba gagwe jaana: “Buang le Dafide mo sephiring mme lo re, ‘Kgosi e a go itumelela, le batlhanka ba yone botlhe ba a go rata. Ka jalo, dira kgolagano ya lenyalo le kgosi.’”
23 E rile batlhanka ba ga Saulo ba bolelela Dafide dilo tseno, Dafide o ne a re: “A ke selo se sennye mo go lona go dira kgolagano ya lenyalo le kgosi fa nna ke le monna yo o humanegileng e bile ke tseelwa kwa tlase?”+
24 Go tswa foo, batlhanka ba ga Saulo ba ne ba mmegela jaana: “Ano ke mafoko a Dafide a a buileng.”
25 Foo Saulo o ne a re: “Lo reye Dafide lo re, ‘Kgosi ga e batle bogadi+ bope ntle le matlalo a bonna a Bafilisitia a le 100,+ gore e ipusolosetse mo babeng ba kgosi.’” Gonne Saulo o ne a loga leano la gore Dafide a we ka seatla sa Bafilisitia.
26 Ka jalo, batlhanka ba gagwe ba ne ba begela Dafide mafoko ano, mme Dafide o ne a itumelela go dira kgolagano ya lenyalo le kgosi.+ Pele ga nako e e beilweng,
27 Dafide o ne a tsamaya le banna ba gagwe ba bo ba kgemetha banna ba Bafilisitia ba le 200, mme Dafide o ne a tlisa palo e e feletseng ya matlalo a bone a bonna kwa kgosing, gore a dire kgolagano ya lenyalo le kgosi. Ka jalo, Saulo o ne a mo naya morwadie e bong Mikale gore e nne mosadi wa gagwe.+
28 Saulo o ne a lemoga gore Jehofa o ne a na le Dafide+ le gore morwadie e bong Mikale o ne a rata Dafide.+
29 Seno se ne sa dira gore Saulo a boife Dafide le go feta, mme Saulo o ne a nna mmaba wa ga Dafide botshelo jotlhe jwa gagwe.+
30 Dikgosana tsa Bafilisitia di ne di tle di tswe di ya tlhabanong, mme gantsi fa di ne di tswa, Dafide o ne a atlega thata* go feta batlhanka botlhe ba ga Saulo;+ mme leina la gagwe le ne la tseelwa kwa godimo thata.+
Dintlha Tse di Kwa Tlase
^ Kgotsa “pelo ya ga Jonathane e ne ya bofagana le pelo ya ga Dafide.”
^ Kgotsa “o ne a dira ka botlhale.”
^ Kgotsa “go itshwara jaaka moporofeti.”
^ Seheb., “mme o ne a tswa a bo a tsena fa pele ga batho.”
^ Kgotsa “a dira ka botlhale.”
^ Kgotsa “O tla nna mogwe wa me.”
^ Kgotsa “o ne a dira ka botlhale thata.”
