Hiziqeeli 9:1-11
9 Hakkiinni qoonqosi gotti asse ani macciishshanna togo yii: “Katama qorichishshannori, mittu mittunku gudannoha olu bagado anga adhite dagganno gede woshshe!”
2 Anino alba aliyye widira hige noohu aliidi waalchi widiidinni lewu manni daanna laummo; mittu mittunku cancanannoha olu bagado anga adhite no; qoleno shalaalatenni gannoonni uddano uddiꞌrinohu, hallisira borreessaanchunniha qalamete buuda* wodhinohu mittu manchi insa ledo no; insano eꞌe, camotenni seekkinoonnihu kakkalote dargi mule uurritu.
3 Hakkiinni Israeelete Magani ayirrinyi kirubeelete iimaanni noowiinni kae, qullaawu mini waalchi xullicho mari; hakkiinni isi, shalaalatenni gannoonni uddano uddiꞌrinohanna halloho borreessaanchunniha qalamete buuda wodhino mancho woshsha hanafi.
4 Yihowa iso togo yii: “Yerusaalamete katami giddoonni higge sai; katamu giddo assinannihu tiyyiꞌnanni coy baalunni kainohunni dadillanninna uranni noo manni albira malaate wori.”
5 Kuꞌuri kayinni ani macciishshanna togo yii: “Katamu giddo isi hoode hadhinanni manna shiiyye. Illeꞌne laꞌe marartoonke; godowano shaqqitinoonte.
6 Geercho, wedellicha, seemo, qaaqqonna meento coꞌo assitine gudde. Kayinni malaate worroonnihu aye manchiwano martinoonte. Qullaawu miniꞌyanni hanaffe.” Konni daafira qullaawu minira albaanni noo cimeeyyenni hanaffu.
7 Hakkiinni togo yiinsa: “Qullaawa mine batteesse; hooweteno reeshshu woꞌmanno gede asse. Hadhe!” Konnira insa hadhe katamaho noo manna shitu.
8 Insa shitanni heedheenna, ani callu gatummo; hakkiinni gombisame uwe, “Woꞌmunkura Aliidi Mooticha Yihowa, baysibao! Yerusaalamete aana hanqokki dirrisse Israeelete giddonni gattinore baala gudattoraati?” yee raarummo.
9 Isino togo yiie: “Israeeletenna Yihudu mini cubbi lowo, lowo geeshsha batiꞌrino. Gobbate aanano lowo mundee duꞌnantino; katamahono bunshe batidhino. Korkaatuno insa ‘Yihowa baatto facci asse agurino; Yihowa dilaꞌꞌanno’ yitanno.
10 Ani kayinni lae dimarareemmo;* godowano dishaqqeemmo. Doogonsa gumano uminsa aana abbeemmo.”
11 Hakkiinni shalaalatenni gannoonni uddano uddiꞌrinohu, qalamete buuda halloho wodhino manchi galagale higanna laummo; isi togo yii: “Hajajoottoere yoottoe garinni assoommo.”
